[ايس كريم الدجاج وقرن الغزال الحار] من ماجن

**ماجن** · 07-03-2012, 06:16 PM

الاخت ليبية حرة

ليها فترة طويلة تبى تستفسر على اكلات في اعراس الصالات

جبتلها بعض الطرق من النت ومن اللى نعرفهم انى

اولا ايس كريم الدجاج

ناخد لحم صدور الدجاج مفرومات مع بصلة وملح ورشة فلفل اسود وبهارات

في ست البيت ويوضعوا فى التلاجة لحين الاستخدام ونجهز الحشو

عبارة عن بطاطا مسلوقة ومبروشة مع شوية زبدة وملح وفلفل اسود

وناخد لحم الدجاج من التلاجة ونطرحه فى راحة اليد ونضع ملعقة صغيرة

من الحشو ونلفها ونشكلها عل شكل طربوش الايس كيم غليضة من فوق

ومدببة قليلا من تحت وتوضع في التلاجة نصف ساعة لحين القلى

تغمس فى دقيق وبيض وخبزة مرحية وتقلى تم تغمس من الجهة الغليضة

فى جبن كريمى متع الكاسات تم تغمس في فستق مبروش ....

ثانيا قرن الغزال الحار

عبارة عن قرون فلفل موش حار مقلي قليلا في الزيت ومصفى

والحشو نفس حشو بوريك الجبدة طبعا نحى القرن الفوقى متع الفلفل

ونفتح الفلفل شوية من الجنب ونحشيه بالحشو ونلف علية اى عجينة

فطائر معتمدة عندك على شكل شرائط وتلف من فوق بحيت من وين

نححينا القرن الفوقى لاازم يبان منه شوية هو والحشوونلف متقارب على

بعضه حتى تحت تجي غليضة شوية من فوق ومدببة من تحت زي القرن

وتدهن حليب وبعد النضج شوية جبنة موزاريلا وحبات فى الوسط زيتون

اسود شرائح ....

خلاص تعبت من الكتابة

وان شاالله مرة تانية نكتب حاجات اخرى

والسلام عليكم ورمضان كريم

**أم أيوب** · 07-03-2012, 06:20 PM

بارك الله فيك ماجن عالشرح بس ياريت موضوعك كان مدعوم بالصور

**الصابرة** · 07-03-2012, 08:05 PM

شرح مفصل ماشاءالله عليك ...... لكن لوكان معاه صور كان حيكون اروع واحلى
سلمت يداك حكتلي عليه صاحبتي وشكلي بنديره في رمضان بعد شرحك .....بارك الله فيك ....
ونتظر منك مشاركات اكثر ويكونوا مدعومات بالصور ان شاءالله

**om_adnan** · 07-03-2012, 09:54 PM

مرحبتين ماجن...سلمك يارب على الطرق,شرح تعذيب بالتفصيل ما قصرتى,فى انتظار جديدك,ان شاء الله اتشوفه ليبية,أكيد حيعجبها.

**ترهونيه حره** · 07-04-2012, 01:39 AM

شرح رااااائع باراك الله فيك

**نسمه ليبيه** · 07-04-2012, 01:40 AM

الايس كريم فهمته
بس قرن الغزال مافهمتش انا ندير فيه لكن نلف العجينه عليه بشكل عادى مافهمتش انت شن تقصدى

ويسلموا وبانتظار جديدك

**الصابرة** · 07-04-2012, 04:47 AM

اختي نسمة ليبية
شوفي الرابط فيه الوصفة والطريقة

[وصفة منقولة] فطائــــــــــــــــــر قرون الفـــلفـــل

ان شاءالله اكون افدتك

**ماجن** · 07-06-2012, 07:35 AM

يااخت نسمة نقصد ان اللفة تكون قريبة من بعضها بحيت مايبانش الفلفل من الوسط يعنى مافيش فراغ زى الكباب الحلزونى فالكباب الحلزونى كباب عادى اصابع وتلف عليه عجينة فطائر متابعدة بحيت يكون فى فراغ يعنى يبان الكباب بوضوح والفلفل العكس