[طلب] حلويات أعراس

[الصابرة]

عندي عرس اخي واختي عقبال العزاب يارب ويقوي سعدهم ويستر عليهم نبي اندير الحلويات بتاع العرس ومحتارةوكل ما انشوف في الطرق اللي في المنتدى تزداد حيرتي اكثر {ممنوع وحدة تقولي المنتدى معبي ودوري }لان كل ما اندور تزداد حيرتي طبعا رسيت على نوع وهو الصويبعات لوخيتي خدوج والباقي مش عارفةطبعا نبي نوعين اخرى ويكونن راقيات ولكن جزيل الشكر مقدما ويارب افتح على كل بنية ويرزقها بزوج كيف راجلي واعر شوي لكن طيبته وحنيته مافيش زيها {شوفوا البدخ دعوة مافيش منها هههههههه} نبصر المهم وليد حلال زي ماتبي كل وحدة يارب وطبعا المتزوجة ربي يخلي ليها راجلها هذي كوم دعوات مقدما هي ساعدوني

[دانة ليبيا]

ربي يتقبل دعواتك يارب
وربي يتمم لوخيك ووخيتك علي خير
بالنسبة للحلويات كانك تبي حاجة راقية اني نقترح عليك تارت جوز الهند لوخيتنا زينب نازك هلبة و قنين ,كذلك حلو الوردة وحلو العين لام سومة حتى هما ماشاء الله راقيات , واني والله مانستغنى ع المقروض والغريبة والمناسبة مافيها بنة من غيرهم وانشاء الله نكون افدتك

[luba]

اني مادام الاول فيه مكسرات اختاري تصنيفات مختلفه متلا غريبة الحلقوم من زينب محمد( دايما في اعراسنا الجديدة ) -

والوردة بالتمر من ام سجي (om saga( ديريها بدل المقروض

او اصابع اكنافه من زينب محمد

او الوردة لام ميوسه اللي باللوز لكن ممكن صعبه لعرس

او السله اللي بالكراميل والشكولاته وعليهم حبة شوكولاته مدورة

[luba]

ان شاء الله الافراح عامرة وان شاء الله بالرفاه والبنين والحياة السعيدة للعريس والعروس
ومش اطولي علينا يالصابرة وتلهي في العرس وتنسي خواتك وماتنسيش تصورينا حلويات العرس كلهم
حتي لو جوكم حلويات من برة لازم تورينا الابداعات والف مبرررروك رووووووووريييييي

[الصابرة]

مشكورات حبيباتي على الفزعة
اكيد الغريبة والمقروض بنديروهم من غير نقاش
وعجبني اقتراحاتكم
وتوا انشوف
وحبيبتي لوبا ماتخفيش على الصور من الحلويات الى العشاء
لان العرس في زليتن
فالصور اكيد
والغيبة لا مش هلبة قبل العرس لكن بعد اكيد
عشان بنقعد مع ماما
لاني زي ماقلت ليكم انا ماعنديش غير اخت وحدة وهي اللي بتتزوج
فطبعا نبي فترة مع الماما عشان الناس اللي بتبارك
خصوصا معازيمنا من امساعد لعند هون
شفتوا

[مغتربة 7]

حبيبتي الصابرة الف مبرووووووووك على خوك واختك ربي يهنيهم يارب

ماشاء الله البنات ماقصروا

حبيبة انتي كم حاطة فى راسك بديري يعني كم نوع ؟؟

الى اخترتيهم اغلبهم معسلات اختاري نوع بالشوكلاته

[luba]

يالصابرة سلميلي علي زليتن وااااجد
ويابختك وربي يعينك

[لوتي]

ماشاء الله البنات ما قصرو أني خشيت بنقولك مبروك علي خوك وأختك إن شاء الله ربي يهنيهم ويسعدهم

[om_adnan]

ألف مبروك الصابرة وان شاء الله ربى يقبل دعواتك وربى يهنيكم ويمشى العرس على خير,بنت حلال فعلا ردى بالك على الوالدة بعد العرس وخصوصا أنكم أثنين بس,مش دعاية لكن اذا كان عندك وقت جربى المسمنة محشية مكسرات ,أنا متأكدة حتعجبك وجديدة.

[شروق الشمس]

ماشاء الله ربي يبارك لكم في العريسين و يستركم مع الضيوف و يمشي العرس علي خير
و ربي يهني العروس و العريس و يسعدهم و يحفظهم
و يخلي لك الوالدة و يبارك لك في صحتك
و بخصوص طلبك و الله مانفهم فيهم الحاجات هذي و ان شاء الله خير