السلام عليكم ورحمة الله وبركاته
هذه بعض الأدوات واللوازم الي نستخدمها في رمضان
منها الجديد ومنها القديم ومنها قديمة بس أول استخدام ان شاء الله
بصراحة نحب نشري أدوات وماعين المطبخ بس دائماً نحاول ما ناخذ الا اللازم
أو ناخذ شيء نستفيد منها في عدة أشياء ثانية مش لغرض واحد بس
طواجين السيليكون شريتهم للحاجات الباردة بس مش للفرن
وأيضا اشتريت2 طواجين دائرية الخاصة بالبيتزا ولوح تقطيع اللحم والخضرة حتى هم 2
وشريت 2 من أكياس شوي اللحم والدجاج بالفرن لأني نستعمل فيهم بكثرة فلازم يكونوا عندي
وأيضاً طنجرة للشربة تنفع للتقديم فقط وهي شاريتها من قبل بس ما استعملتها
وشريت طاجين مستطيل حافاته طويلة ومعاه بالصور آلة صنع البسكويت والبيتيفور
من زمان ندور فيها الي هي معدن مش بلاستيك
ومعاهم في الصورة 2 مصفاة نستخدم في الكبيرة للدقيق والصغيرة لهبلة حاجات منها للشاهي
وأيضاً الآلة العزيزة على قلبي وهي ست البيت
وفرحانة بيها هلبة لأنها أحسن من الأولى الي عطلت
حتى راجلي يضحك علي واني نتفرج عليها طول الوقت
فيها مميزات حلوة عجبتني ان شاء الله انزلها لكم بالتفصيل
في موضوع مستقل
وهذه قلاية البطاطا الي بملعقة زيت بس شاريتها من فترة بسيطة
واستخدمتها وعجبتني هلبة لأن معاها كتاب فيه بعض الوصفات
وهذه أيضاً حاجة عزيزة على قلبي وكلا ما نطلع ونلقى نوعية كويسة نشريها طول
وهي الحافضات لأنها عملية جداً وتنظم الثلاجة والفريز هلبة هلبة
هي عبارة عن 10 قطع بس انا صورت الاحجام الي موجودة بس
ان شاء الله تعجبكم حاجاتي
وفيه حاجات ثانية نستعمل فيها لكن مش جديدة
ان شاء الله لو لقيت وقت ننزلها قريب
وكل رمضان وانتم بخير يارب وهانين ومتهنين
كل عام وانتم بخير وخياتي
وهي نستنوا في أدوات مطبخكم ولوازم رمضان عندكم
سواء جديد او قديم المهم ورونا شنو داسين علينا
المفضلات