[ ملف ] شاركينا طريقتك في اعداد اطباق الأرز

**أم أيوب** · 07-10-2012, 12:40 AM

جانا رمضان بالخير والاحسان وربي يتم عليكم الشهر بالعفو والغفران

يحكو على فالحة كل يوم تدير في فطورها أشكال وألوان

بس في حاجة كل يوم لازم في السفرة تبان

يوم مخلطة ويوم محببة ويوم صفراء بالزعفران

ويوم مبكبكة ويوم مسقية ويوم على مرقة عصبان

عرفتوها هالحاجة والا مازال السر مابان

أكيد عرفتوا وصفتنا اللي نحكو عليها من زمان

كل فالحة وكل ست بيت

تورينا كيف تجهز في الرزيزة ياريت

تشرحلنا خطوة خطوة بالصوره

كيف تقدم للغالي الرز مع فطوره

كيف تنسق وكيف تقدم وكيف تزين

عشان يطلع شكل الأكلة حلو وقنين

شروط المشاركة في الملف :

يكون الطبق من صنع ايديك والصور واضحة الله يرحم والديك

تلتزمي بكتابة العنوان حسب الأصول وحجم الخط والتنسيق يكون مقبول

ويكون العنوان بهالشكل والصورة

[مشاركة في ملف الأرز ] ....................................... من مطبخ .......

وعلى كل ما تقدمي للمنتدى مشكورة

نفتحوا الملف يوم الإربعاء 2012/7/18 باذن الرحمن ونقفلوه يوم 15 رمضان

وشرط مهم نبي نقوله وبالعين القويه

تكتبي اسمك واسم المنتدى عالصورة ومواضيعك تكون حصريه

لمنتدى المطبخ الليبي اللي يعز عليه

والرزيزة امتاعتنا تكون في الأطباق الليبية

ورزيزة غيرنا تكون في الأطباق العربية والعالمية

وهدا شعارنا حطيه في توقيعك لو بتكوني معانا

وكل عام وانت بخير يا حرة يا بنت الأحرار

وليبيا ربي يحفظها من شر كل حاقد مكار

**أمـ ساره** · 07-19-2012, 09:24 AM

ماشاء الله أم أيوب مسابقة حلوة

سلمتي على الافكار المبدعة

وفعلا الارز من الاطباق الي تكثر في رمضان

ان شاء الله تكون لي مشاركات معاك

ونستنوا تفاعل وخياتنا معانا

موفقة حبيبة

**om_adnan** · 07-19-2012, 12:57 PM

وعليك السلام أم أيوب...كل عام وانتى والامة الاسلاميه بخير,وان شاء الله يعم بلادنا الامن والامان ويحميها من أعدائها يارب,موضوع حلو وتقديم للموضوع أحلى,ان شاء الله حنشارك معاكم فى المسابقة.