[ مشاركة في مسابقة الحلويات المعسلة ] صندوق الهدية بالمكسرات من مطبخ لوبا

**luba** · 07-19-2012, 08:22 PM

السلام عليكم ورحمة الله وبركاته

صندوق الهدية بالمكسرات

مقادير العجينة :

3\4 تلات ارباع كوب زبدة دائبة بحرارة الغرفة - 3 ملاعق زيت

بيضة - ملعقة سكر - نصف كوب عطر ( او نصف كوب ماء مخلط مع عطر او زهر او ورد )

ملعقة صغيرة بيكنج بودر - رشة ملح- دقيق للعجن ( حوالي 2 كوب يزيد او ينقص )

الحشو :

اللي تفضليه من المكسرات وهدي الخلطة انت تتحكمي في كمياتها
بالنسبة ليا خلطتي

كاكاوية محمصة ومرحية في فرامة اللحم العيون المتوسطه

لوز محمص ومجروش ( ضربته بالشوبك في كيس نايلون )

قليل من جوز الهند وسكر العادي

وملعقتين او حسب الحلاوة اللي تبيها شربات

واضفت عليه ماء فيه قطرات من ماء الورد ( او الموجود عندك من المنكهات )

يجب تكون الحشوة زي العجينة الرطبه لو جفت زيدي ماء او شربات

الشربات:
تقيله تكون 2 كوب سكر وواحد نصف كوب ماء
نحبها تكون فيها قرمشة شويه
ولو تبيها رطبه هلبه خلي شرباتك خفيفة

طريقة العجن :

توضع الزبدة والزيت والبيضة والسكر وتخلط كويس تم نضيف باقي مكونات العجين
لازم تكون العجينة متماسكه وناعمة عشان تقدري تفرديها يعني مش رطبة

نفرد العجينه ونقطعها مربعات او دوائر بالطاسه حسب الحجم اللي تبيه

نحط الحشوة في المربع او الدائرة ونرفع الزوايا بالنسبه للمربع ونضمهم مع بعض

او ترفعي حواف الدائرة واتبتي كل حافتين متقابلات مع بعض

ونتبتوهم بنصف حبة لوز

وننقشها وطبعا هدا المنقاش تطبيقي من الاخت زينب محمد بارك الله فيها ومعاه تجيني
النقشه رقيقة وحلوة غير الحكه اللي استعملتها صغيرة

وهدا الرابط طريقة صنع المنقاش من زينب محمد

نحطهم في فرن ساخن علي حرارة 175 مئوية

ونحمرهم من فوق

ونحطهم في الشربات وهما الحلويات ساخنه ونخليهم حوالي دقيقتين او اقل ونرفعهم

وهدي هديتي ليكم بمناسبة الشهر الكريم وكل عــــــــــــام وانتن بخير وكل ليبيا بخير وهني

**مغتربة 7** · 07-19-2012, 08:45 PM

شن ها الرعايش يالوبا شن درنالك

بسم الله ماشاء حلى ياخد العقل
تسلم الايادي الى تلتف بالحرير
مشاركة فى غاية الروووووووعة
تستاهلي احلى نجمااااااااااااااااااااااات

**أمـ ساره** · 07-19-2012, 09:02 PM

عندك الحق يا مغتربة

رعااااااااااايش شن درنالها يا حبيبتي

ماشاء الله لاقوة الا بالله

سلمت ايدياتك الحلوة لوبا

والله جت في خاطري يا بنت كيف بندير هي

المشكلة تبي وقت هلبة حتى بنطبقها

مشارك مميزة كالعادة حبوبة وتستحقي النجيمات

والتقيييم مش راضي يقيم

**بنت حواء** · 07-19-2012, 09:53 PM

ماشاء الله تبارك الرحمان عليك يالوبا
صنيديقات حليواااااات وأكيد طعمهم رهيب
ماشاء الله كان غير في من ياكل هالحلويات باهي
أصلا إبداعات في يومين؟؟ ماشاء الله
سلم يدياتك وبالتوفيق و 5 نجوووووووم