[ تطبيق ] كيكة الشراب للصابرة من مطبخ عهود

**عهود** · 07-26-2012, 04:41 AM

السلام عليكم

تطبيقي لكيكة الشراب من مطبخ الصابرة

وهذا رابط الوصفة

www.libyan-kitchen.com/kitchen/showthread.php?6219

جت الكيكة للصابرة احسن مني مش قلتلكم ماعنديش عليها الحلويات

هذه لما طلعتها وحطيت عليها شراب الشوكولا

وهذي بعد قطعت منها طرف
ساحت الشوكولا ع الجناب

جت مفشوشة بالك علي خاطر لما شبحتها معبية في خلاط الكيكة خفت نحطها في طاجين متوسط تفوج في الكوشة
مشيت حطيتها في طاجين كبير هلبة
عيني خدعتني

وبالك حطيتها في الكوشة الكهربائية وحطيتها ع 120 درجة مشعولة من تحت بس
وكل مرة نغير مرة نفتحها تشعل من فوق ومرة من لوطى
ومرة من فوق ولوطى خخخخ
الحاصيلو قعدت نلعب عليها

تسلم ايديك الصابرة طعمها يهبل مع انها مش منفخة لاكن كيكة طعمتها صقع بكل

**عهود** · 07-26-2012, 04:44 AM

علي فكرة في عوض نحط الماء حطيت مكانه بنفس المقدار حليب

**luba** · 07-26-2012, 05:01 AM

عادي شكلها مش مفشوشه قنينة تطبيق رائع المهم هادي من المطبخ الجديد او لا
كان منه ان شاء الله تتهني بيه بداية موفقة فيه واختيار موفق
تسلم ايديك وايدين الصابرة وربي يعطيكن مافي بالكن
ليك وللموضوع التقييم

**عهود** · 07-26-2012, 05:22 AM

ايه ايه من المطبخ الجديد كمل والحمدلله الحوش كله تم
الحمدلله والشكر كيف كنت وكيف اصبحت

تسلمي لولو رفعتيلي معنوياتي هاااا هكي بنبدا نطيب وانجيب في وصفاتي هنايا ومافيش من يضحك عليا
مع اني ماعنديش هذيكا الابتكارات لاكن كلها تنقيل من امي ولا اخواتي ولا منكم

مشكورة حبيبة ع الرد والتواجد الجميل

**الصابرة** · 07-26-2012, 06:59 AM

ماشاءالله على السريع عيني عليك باردة
حبيبة هيا مش مفشوشة نحس فيها ومع هذا اخطاك ذكرتيهن بروحك
فتح الكوشة ديمة يخلي الهواء يدخل الى الكيكة فتهبط
وبعدين درجة الحرارة منخفضة هلبة اني اندير على 180 واذا الضي حاله باهي قوي يعني مش مشغلين التكيف انديره 150
وصدقيني المحاولة هيا احسن وسيلة للنجاح
امنا كان نحكيلك على قصصي مع الباسطي لليوم شنو تقولي تضحكي نين تعيي
وبالصحة عليك الحوش وتتهني بيه يارب
ويكون عتبة خير عليك ويعطيك ماتتمني
ونستنوا مشاركاتك ومافيش احلى من وصفات الام
ربي يحفظك وكتشجيع احلى تقييم ونجوم ليك

**بنت حواء** · 07-26-2012, 01:41 PM

هذا طرفي يمممممممم
ماشاء الله ياعهود كيكة تجنننننننن طالعة
عادي غليظة ولا رقيقة هذي من الطاجين الكبير
المهم أنها خفيفة وهشة مش (مكتلة)
ولا جاتك مكتلة هذا علاش صورتيه مقلوب؟
نبصر عليك
مبروك المطبخ والحوش كله ان شاء الله تتهني بيه
ومبروك التطبيقات والإبداعات المطبخية
يعني هبلتينا بالتصاميم وتبي تهبلينا بالماكلة
سلم يدياتك
و 5 نجوووووووووم

**لوتي** · 07-26-2012, 07:41 PM

تطبيق حلو معليشي كلنا نغلطو ونتعلمو ونبو منك وصفات جدد ومبروووك عليك المطبخ وللموضوع وليك أحلى تقيييم

**أم ميوسة** · 07-27-2012, 01:25 AM

اشيه اشيه كوجينة جديدة وتطبيق طوالي

مبروك مبروك الحوش والكوجينة

أن شاء الله عتبة مباركة عهود

وليك وحشة كبيرة كبيرة

وتطبيقك روعة وزي ما قالت بنت حواء

مش مهم الكيكة رقيقة ولا غليظة الفايدة في البنة يا بنتي

تسلم ايدياتك عهود

وصحة وهنا

**عهود** · 07-27-2012, 02:31 AM

الله يبارك فيكم حبيبات ع المباركة
وربي يعطيكم كل الخير

منورة الصابرة بردك وكلامك المشجع
وبوصفاتكم نتعلم واويني بديت بأول كيكة منك
وتعلمت منك درجة حرارة الكوشة الكهربائية وكيف نزبطها
مهو ماعنديش غاز فيه كوشي وغازي مسطح بلا كوشة والكوشة كهربائية و بروحها مستخطية
مشكورة حبيبة وربي يعطيك كل ماتتمني ويحقق امانيك

بنت حواء لا والله مش مكتلة هههههههه مفشوشة لاكن طايبة مليح
ضحكتيني متع تصويرها مقلوب
لا والله مش اني لي صورتها راجلي هو لي صورهالي من موبايله
صوره تطلع خير من موبايلي قعدت نراجي فيه لن روح وصورهالي وجت تصويرها هكي صدفة
مرة ثانية نصورها من بدايتها ونهايتها

غير نشري كاميرا ديجيتل بعتالي نبدا فيها تصوير واكلات علي ودنه
منورة حبيبة ومشكورة بردك المميز ورفع المعنويات ومرورك الجميل دااائما
بارك الله فيك

لوتي منورة بردك وتشجيعك واكيدة كلنا في البداية نتعلمو
لاكن اني تعليمي جي متأخر شوية
سنين عمري كلها لهيت في الدراسة بس
مشكورة ع تواجدك القيم

الله يسلمك ام ميوووس وصحة وهني ع قلبك
الله يبارك فيك
والله حتي انتي ليك وحشة كبيرة
منورة حبيبة بردك وتواجدك الجميل