[مشاركة في مسابقة الحلويات المعسلة ] لقمة القاضي من مطبخ حبيبتهم

[حبيبتهم]

السلام عليكم

اليوم حبيت نقدم لكم لقمة القاضي ونحكيلكم حكايتي معاها




من سنوات واني نحاول ندير لقمة القاضي وتكون مقرمشة من برا ومليانة بالشراب من داخل وجربت هلبه وصفات
وصارت لي معاها مواقف هلبه ولكن لم ايأس وحاول وحاولت لوين وصلت للنتيجة اللي عجبتني من مواقفي مع اللقمة
مرة انفجرت عليا وهي في الزيت وحصلت شوية حروق
ومرة بغير انتباه دخلت المغرف االلي نصفي بيه اللقمات من الشراب في الزيت
ويطشطش عليا الزيت والمغرف انحرق عليه الشراب
ومرات ومرات طلعت لي اشكالها غريبة اللي تقول شكلها فيل واللي شكلها كيف
الحنش وفي اللي مش معروف شنو شكلها وفي النهاية تطلع حاجة ماتنفعش مرخية مش متقرمشة
والا ماتشربش الشراب وهذي طريقتي معتمدتها من سنوات وتطلع عالكيف واللي بتطبقها لازم تنتبه للشرح كله

المقادير

كوب ونصف دقيق
نصف ملعقة صغيرة
ملح ملعقة صغيرة خميرة فورية
كوب حليب

حبة بطاطا متوسطة مسلوقة ومهروسة ناعم جدا


مقادير الشراب

2كوب سكر
1 كوب ماء
عصرة ليمون
غليه ويكون شراب ثقيل


الطريقة

نخلط الدقيق والمح والخميرة بالحليب وتترك حتى تتخمر جيدا لازم حجمها يتضاعف وتبدا فيها عيون







بعد ماتتخمر جيدا ماتنفعش لو مش مختمرة تمام




نضيف البطاطا المهروسة ونعجنها زين وعلى طول نبدا في القلي



ونحط الزيت في قلاية عميقة ونخليه يسخن تمام ( اني نستعمل في الغاز المتوسط مش
الكبير ومش الصغير والنار في البداية تكون متوسطة )

انتبهي بيش ماينحرقش لو الزيت مش ساخن تمام لما تحطيها اتطول ماتنتفخش ويقعد
شكلها مسطح ولو ساخن زيادة تنحرق من برا وتقعد عجينة من جوا اني نشكل فيها بيدي واكتشف
ان هذي افضل طريقة بيش تطلع كور منتظمة ونفس الحجم تاخدي كاشيك صغير (كاشيك قهوة )
تمسكيه في يدك اليمين وبيدك اليسار اتدخليها في العجينة وتعصري منها شوية بين اصباعك الابهام والسبابة
واللي طلع تاخديه بالكاشيك وتنزليه في الزيت ولازم ايكون بحداك صونية
او كوب فيه شوية زيت كل مرة تغطسي الكاشيك في الزيت
وبعدها تقطعي بيه العجينة بيش تنزل بسهولة وماتلصقش لانها لو لصقت في الكاشيك
بتدير زوائد في الكورة ويطلع شكلها مشنشب ( مرة نسيت الزيت مادرتاش بحداي
و دخلت يدي في العجينة قلت هيا نغطسه حتى في الطنجرة ولما بناخد العجينة بالكاشيك حرقني
في يدي اول ماتحطي العجينة تنزل تحت وبعدها على طول تنتفخ وتطفح فوق اول ماتحطيها ماتحركيها لوين تطلع عالسطح







بعد تعبي الطنجرة تغسلي ايديك وتقعدي اتحركي فيها ماتوقفيش تحريك بكل لما تحسيها
بدت يابسة من برا وبدت تاخد لون شوية قوي عليها النار واقعدي حركي لوين تتحمر تمام من جميع الجهات









بعد ماتتحمر على طول طلعيها في الشراب ولازم ايكون بارد وحركيها وخليها فيه بين
ما تحطي الكمية الثانية في الزيت وبعدها طلعيها في مصفاية وخليها تتصفى



بعد ما تطلعيها من الزيت طفي عليه النار وخليه يبرد شوية وكملي باقي العجينة بنفس الطرقة




وهذا شكلها من الداخل امعبية شراب















وان شاء الله تعجبكم