[ مشاركة في مسابقة معجناتك الرمضانية ] برجر الطاجين من مطبخ أم أيوب

**أم أيوب** · 07-27-2012, 05:38 AM

السلام عليكم ورحمة الله وبركاته

اليوم عالفطور درت طاجين البرجر ومن كثر ماجاني حلو والله تم من وقت الفطور مع انها كمية كبيرة اللي درتها

عندنا العيلة يموتو عليه وياكلوه مع الشربة عالفطور

المقادير للعجينة :

دقيق حسب الكمية اللي تحبي تجهزيها + خميرة خبز ( ماتكثريش أنا على كيلو ونص دقيق درت نص ملعقة كبيرة )

نص ظرف بيكنج باودر + نصف كوب سمن + 6 ملاعق حليب بودرة + كوب حليب + كوب ماء دافي

نخلط المكونات في العجانة ونخليها تعجن كويس بعدين نغطيها ترتاح 10 دقايق ونعاود نعجنها

نكرر العملية 3 مرات عشان تجيك العجينة هشة وناعمة ... نغطيها تخمر لمدة ساعة

المقادير للحشوة :

عصاج مفروم متبل بفلفل أكحل وثوم وبصل بس ومطفية عليه قطعة فحم مشتعلة + بيض + جبنة شرائح + طماطم شرائح

الطريقة :

بعد ما اختمرت العجينة نزليها من الأجناب بس بدون عجن أو زي مانقولول اكسري خمرتها

عصاج المفروم متاعي جاهز

ناخد طاجين وندهنه بزيت ونفرد بالنشابة طبقة من العجينة ما تكونش سميكة ولا رقيقة عالاخر

تكون زي البيتسا ونغطيها بشرائح الطماطم بعدين الجبنة

بعدين عصاج المفروم ونخفق بيض ( الطاجين اللي استخدمته خدا مني 6 بيضات ) ونسكبها على المفروم ونراعي انه ما يوصلش للأطراف

عشان ما ينحرق البيض وتطلع ريحة العجينة مش حلوة ... واضافة مني شوية جبنة ايدام مبشورة

بعدين نفرد الطبقة التانية من العجينة وتكون رقيقة أرق من الأولى ونغطي بيها الحشوة

ندهنها من فوق بزبدة ذايبة ونرش عليها سمسم

وندخلها فرن ساخن من قبلها بنص ساعة عشان تنتفخ وتقعد طرية

نقطعها بعد ما تبرد شوي يعني تقعد دافية وهدي النتيجة

وهدي صورة من قريب عشان تشوفو الحشوة

ملاحظة صغيرة العجينة افرديها على دقيق

في أمان الله

**om_adnan** · 07-27-2012, 07:24 AM

وعليك السلام أم أيوب....سلم إيديك,منظرها يشهى,عندهم الحق كملت بسرعه,مافيش كيف خبزه طالعه من الفرن وفيها بنة البرجر,عند سؤال شنو قصدك,
بعد ما اختمرت العجينة نزليها من الأجناب بس بدون عجن أو زي مانقولول اكسري خمرتها
هل نأخذ العجينه ونحطها فى الطاجين بدون ما نكسر خمرتها,جزاك الله خيرا.

**مغتربة 7** · 07-27-2012, 07:59 AM

يمييييييييييييييييييييييي
ماشاءالله برجر تسهف
تسلم الايادي
جاري التقيييييييييييم

**بنت حواء** · 07-27-2012, 11:30 AM

ماشاء الله برجر يشهههههي
سلمت يداك

**عمة تسنيم** · 07-27-2012, 12:00 PM

شكلها ما شاء الله تسلم ايديك بس اني نديرلها في شرائح البطاطا المقلية بدل الطماطم

**أم أيوب** · 07-27-2012, 02:01 PM

غوغو و بنت حواء وعمة تسنيم بارك الله فيكم على ردكم الحلو

أم عدنان نقصد انه لما العجينة تنتفخ وتخمر

ناخد بروس صوابعي نضغطها من جنبات الفنجان اللي خمرت فيه في اتجاه تحت

فهمتيني نضغط لوطة من غير خما نعجنها بكف يدي

بهالشكل حتلقيها هبطت معاك بس لو عجنتيها عجن يريح مفعول خميرتها