[استفسار] عن عجينة السمبوسة

[عطر ليبيا]

السلام عليكم أخواتي

من زمان واني خاطري نشارك في المنتدى لكن للأسف خط الهاتف ديما تاعب وفيه مشاكل وتوا حصلت واي ماكس من خوي قلت نغتنم الفرصة ونشارك في المنتدى حتى نبي نبدا نحط مشاركات في المنتدى من اطباقي ان شاءالله .
لكن اليوم نبي نسألكم عن السمبوسه علاش ماتقعدش مقرمشه لفترة طويلة اني عجنتها في البيت يعني العجينة مش جاهزة ومشكلتي معاها انها ماتقعدش فترة طويلة مقرمشة يعني بعد ماتبرد تصبح لينة. فياريت تفيدوني
ولكم جزيل الشكر والتقدير علي كل كلمة كتبتوها في المنتدى

[الصابرة]

اهلين بيك عطر ليبيا نورتينا
ونستنوا ماركاتك
وبالنسبة لسؤالك
وخيتي قوليلي طريقتك عشان نعرف الخطاء وين لان كل وحدة تعجن فيها شكل

[عطر ليبيا]

بارك الله فيك اختي علي اهتمامك
وبالنسبة لعجينتي كانت تتكون من كوبين دقيق ورشة ملح مع ملعقة بيكنبودر ومايعجنهم ماء وتكون العجينة متماسكة بحيث يمكن فردها.
وشكرا

[luba]

جربي انك لما تفرديها غلظيها شوي مرة غلطها قعدت مقرمشة والا وتيها

واقليها قريب المغرب

وجربي اضيفي لعجينتك الحليب المجفف البودر حوالي ملعقة كبيرة

لاني اني ندير فيها بالحليب المجفف وتقعد مقرمشة بس بالزبادي او الحليب العادي القرمشة تريح بعد فترة

وبعد اتجربي قولينا