[مشاركة في المسابقة المفتوحة للمقبلات الرمضانية] رول الدجاج من مطبخ طرابلس

**طرابلس** · 07-31-2012, 05:09 AM

السلام عليكم ورحمة الله
كل عام وانتم بخير ان شاء الله وينعاد عليكم

ليا فترة كل منجي منكتب ميصيرش لن سخر ربي اليوم وجبتلكم معاي رول الدجاج بالخضار فعلا يستحق التجربة

المكونات:_1 دجاج مفروم
2- بهارات (فلفل اسود واحمر,زنجبيل,قرفة,تابل تونسي)
3- بصل مبشور وثوم
4-ملح وزعتر جاف

الحشو:_ -1بطاطا مقلية
2-سبانخ او سلق(اني ستعملت سلق) مشوح في شوية زيت مع بصل وثوم ومتبل بفلفل اسود وملح
3-جزر مسلوق
4-بازليا
5-جبنة مبشورة ومثلثات وبيضة

لتغطية :_ بيض وخبز يابس (بقسماط)
وزيت للقلي

الطريقة:- تاخدي ورقة فويل وتدهنيها بزيت بعدين ترشها بالبقسماط ثم تضعي فوقها خليط الدجاج وافرديها

وبعدين حطي الحشو وساويه بحيث يكون شكله اسطواني

وابدي لفي زي ماواضح في صورة

لن تكملي لف واضغطي عليه من جهتين كويس وبعدين خليه في الفريز حوالي نص ساعة او اكثر لن تتماسك وطلعيه ادهنيه بالبيض ورشي بالبقسماط(لانه كبير صعب انك تغمسيه)
واقليه في زيت ساخن حتي ياخد لون من جيهتين

وطلعيه خليه يبرد وقصيه اني لقيته من داخل قاعد مش طايب البيض فدخلته للفرن لن شد روحه
وهذا شكله نهائي

ان شاء الله يعجبكم

ملاحظة: استخدمت طاجين للقلي لان كبير ممكن ديري اكثر من رول باش تقدري تقليه في طنجرة القلي
لفرد الدجاج الافضل انك تدهني ايديك بشوية زيت وافردي اسهل من الفرد بالنشابة

**الصابرة** · 07-31-2012, 05:15 AM

ماشاءالله عليك وسلم دياتك
وياريت شاركتي بيها معانا في المسابقة
وننتظر منك المزيد من الوصفات من تحت دياتك
ربي يبارك فيك

**بنت حواء** · 07-31-2012, 12:48 PM

ماشاء الله رول يشههههههههي
وفكرة الحشوة رهييييييييبة
مشكورة على الملاحظات والشرح الواضح
ولو حابة تشاركي بيها في المسابقة ندخلهالك
لأنها حلوة وتستاهل
سلمت يداك ولك 5 نجوووووووووم

**أم ميوسة** · 07-31-2012, 02:03 PM

تسلم ايدياتك

رول دجاج روعة

شكل وبنة اكيد

أحلى تقييم ليك حبيبة

ونتمنى انك تزيدي تمتعينا بوصفاتك

بارك الله فيك

**حبيبتهم** · 07-31-2012, 02:24 PM

ماشاء الله طريقة روعة

بارك الله فيك و ديمه اتحفينا بابداعاتك

**luba** · 07-31-2012, 05:41 PM

ماشاء الله عليك وصحيتي علي الشرح الوافي

سلم ايديك وننتظرك معانا لتشاركينا ما تبدعه يديك

جاري التقييم ليك وللموضوع

**barney** · 07-31-2012, 05:59 PM

ماشاء الله اتهبل رول دجاج مش عاديايسهف والحشوة اتهبل سلم ايدياتك وبارك الله فيك الى التقييم

**barney** · 07-31-2012, 06:03 PM

ماشاء الله اتهبل رول دجاج مش عادي ايسهف والحشوة اتهبل سلم ايدياتك وبارك الله فيك الى التقييم زدت عاودت قريته مرة ثانيا من كثر ماعجبني

**طرابلس** · 07-31-2012, 07:10 PM

شكرا الصابرة وبارك الله فيك علي كلامك الحلو
بنت حواء تسلمي حبوبة وياريت نخش للمسابقة حنكلمك ع الخاص نفهم منك اكثر
صحيتي ام ميوسة ويحفلك ميوسة ان شاء الله
حبيبتهم بارك الله فيك
lubaسلمك هذا من ذوقك*
barneyسلمك انتي اللي مش عادية *وصحيتي هلبا اخجلتيني*