[مشاركة في المسابقة المفتوحة للمقبلات الرمضانية ] شرائح البطاطا بالمفروم من مطبخ حبيبتهم

**حبيبتهم** · 08-02-2012, 01:04 AM

السلام عليكم
جايبتلكم اليوم معاي نوع مقبلات ساهل وسريع وماياخدش وقت

وتقدري اتديريه لما تكون عندك مكوناته باقية من اي نوع اخر

المكونات
بطاطا شرائح مملحة ومقلية

عصاج لحم طايب ومضاف له بيضة لكي يلتصق
صلصة بيتزا
جبنة شرائح
زيتون شرائح

الطريقة

هذي شكل البطاطا وعرضها قبل القلي

في البداية نقلي البطاطا
ثم

ناخذ شريحة بطاطا وندهنها بصلصة البتزا من جهة واحدة ونحط عليها عصاج وثم شريحة جبنة ثم شريحة زيتون

ونحطها في الفرن يشتغل من تحت ومن فوق لتذوب الجبنة ويطيب البيض اللي درته للعصاج

وتقدم

وان شاء الله تعجبكم

**بنت حواء** · 08-02-2012, 01:37 AM

ماشااااااااء الله وصفة راااااااائعة
أهو ليل ومتعشية وجوعتيني
سؤال تولعي من تحت قبل نين اطيب البطاطا؟
وبعدين تولعي من فوق؟
سلم يدياتك وصحة على قلب من كلاها
بالتوفيق ان شاء الله
ولك 5 نجووووووووم

**حبيبتهم** · 08-02-2012, 01:46 AM

اهلا وخيتي بنت حواء
البطاطا مقلية وطايبة
نولع من تحت وفوق بيش تجف شوية
وتذوب الجبنة ويطيب البيض اللي درته للعصلج

**أمـ ساره** · 08-02-2012, 02:02 AM

ماشاء الله عليك حبيبتهم

طريقة حلوة ونزاكة وساهلة هلبة

حتى اني كنت بنسألك على البطاطا وسبقتني بنت حواء

ياريت توضحيها في موضوعك

جاري التقييييم لك وللموضوع الحلو

**luba** · 08-02-2012, 02:41 AM

تسلم ايديك ماشاء الله ساهلة وشكلها قنين

عجبتني هلبه هلبه

جاري التطبيق والتقييم

**الصابرة** · 08-02-2012, 04:27 AM

سلمت دياتك ويعطيك الصحة
فكرة حلوة اني اندير فيها في طاجين واحد
لكن كل طرف بروحه فكرة حلوة
احلى تقييم ونجوم

**om_adnan** · 08-02-2012, 06:32 AM

وعليك السلام حبيبتهم...سلم إيديك,فعلا ساهل وسريع وفى نفس الوقت منظره حلو,صحتين وعافيه.

**ام امير** · 08-02-2012, 10:22 AM

سلم اليدين الى دارتها فكرة حلوة وبسيطة وماتاخدش منك وقت
جارى التطبيق لكن انى حنجربها بالدجاج لان حاشاك راجلى فى رمضان يتوحم على اللحم المفروم فنديرله فى حاجات بالدجاج

**حبيبتهم** · 08-02-2012, 04:18 PM

السلام عليكم

امـ سارة
اهلا بك وخيتي
وهذا من ذوقك الحلو
عدلته الموضوع وضفت الفقرة اللي لخبطتكم
مع اني في البداية كتبت بطاطا مملحة ومقلية

وتسلمي على مرورك

لوبا
اهلا بك وربي يسلمك
وتسلمي عالتقييم

الصابرة
اهلا بك وخيتي
وتسلمي على مرورك
لما اتديريها طريقتك وريهالنا
تسلمي عالتقييم

ام عدنان
اهلا بك والله ايسلمك
تسلمي على مرورك

ام امير
الله يسلمك حبيبتي
ونراجي في تطبيقك