[مشاركة في ملف الأرز ] ارز مسقي من مطبخ لوبا

**luba** · 08-02-2012, 06:06 AM

السلام عليكم ورحمة الله

الارز المسقي

المكونات والطريقة :

لحم دجاج او احمر - 2 بصل مقطع جوانح متوسطة السمك

حمص منقوع - زيت حوالي ربع كوب - بطاطا مقطعة نصفين

ملعقة صغيرة ملح و نصف ملعقة كبيرة فلفل احمر بودرة -

ملعقة كبيرة معجون طماطم ( حكة)- ربع ملعقة صغيرة حرارات المشكله

نحط طنجرة الكسكاس الدور الاول علي النار

نحط فيه الحمص والزيت وقليل جدا من البصل واللحم نخليهم يسخنوا شوي ونضيف

الطماطم والملح والفلفل الاحمر و البهارات ويمكن اضافتها في الاخير بالنسبة للبهارات

نقليهم شوي نضيف كميه قليله من الماء ونخليهم يغلوا 3 دقائق

تم انضيف باقي الماء لين يغطي اللحم وبعد يغلي نحط البطاطا للانه البطاطا اللي عندي تاخد في نصف ساعه

يمكن اضافتها في الاخير ادا كانت سريعة الطهي

نغسلوا حوالي كوب ونصف او اكتر من الارز قصير الحبة ( المفضل عندي في المسقي )

نغسله كويس لين تصير اميته شفافه

نحطه في الدور التاني اللي هو الكسكاس

ونسكر عليه الغطاء ونخلي النار متوسطه

بعد مرور 10 دقائق نجهز ربع كوب او اكتر بقليل ماء ساخن وندوب فيه ربع ملعقة صغيرة ملح

ونرش بيهم الارز وهو في الكسكاس ونحركه ونغطي عليه ونخليه حوالي 20 دقيقة يبوخ

نفتح علي الارز ونحركه بالساقم ( الملعقة الكبيرة ) ونصبة في صحن غريق

وناخد من الطبيخة ( المرقة ) متاع اللحم ونصب علي الرز لين تحسيه شوي ويتغطي بالطبيخة

ونخليه يشرب المرقة كلها

تفضل شوي من الطبيخة لو مافضل كمية باهيه لتغطيه باقي البصل ضيفي شوية ماء

نحول لحم الدجاج والبطاطا لو طابوا ولو احمر يترك مع المرقه

اني نحب لحم الدجاج نشويه في الفرن او نقليه في شوية زيت قبل التقديم او يترك بدون

نصب باقي البصل في المرقة مش لازم تكون هلبه المهم تغطي البصل ونحركه كويس

ونسكر عليه بالكسكاس ونحط الارز في الكسكاس ونغطيه بالغطاء في الاول نقوي النار

لين يطلع البخار بعدين انقصوها للمتوسطة ونخلي البصل يطلع اميته مع المرقه والبخار يطيب باقي الارز

بعد حوالي 10 دقايق شوفي المرقه لو خترت واضغطي علي حبات الارز بين اصابعك لو نكسرت او انهرست يعني طاب

والمرقه نشوفها لو خاترة وبصلها طايب نرفعها ونسقي والا نخليها وانقص عليها النار

لين يطيبوا

وبعدها نحط علي الارز المبوخ في الكسكاس ملعقة صغيرة زبدة او سمن وربع ملعقة صغيرة قرفه

نحركهم كويس لين يدوب الزبدة

ونغرفها في الصحن ونسقيها بالطبيخة ( المرقة )

ونحط عليها اللحم

وهدي طريقتي ان شاء الله ماتعبتوا معاي كيف ماتعبت اني نحكي فيها

**الصابرة** · 08-02-2012, 06:11 AM

ماشاءالله ارز يجي في الخاطر
سلم دياتك وربي يبارك فيك
تستاهلي على التعب احلى نجوم

**om_adnan** · 08-02-2012, 06:28 AM

وعليك السلام لوبا...ربى ايخليك لينا,نحن الحق تمتعنا ما تعبنش,ان شاء الله فى ميزان حسناتك,صحتين وعافيه.

**بنت حواء** · 08-02-2012, 02:38 PM

ماشاء الله أنا الحق مش تعبت؟ تعذبت وأنا صايمة وجيعانة
ونتفرج على هالطبق اللذيييييييذ يممممممم
تعرفي ليا شهر ولا أكثر على الرز بنموووووووووت عليه
سلم يدياتك وربي يجازيك خير على التعب وتنزيل الحاجات الروعة
وصحة وهنا

**luba** · 08-02-2012, 04:01 PM

شكرا لمروركن وربي يعطيكن الصحة وراحة البال

**أمـ ساره** · 08-02-2012, 05:00 PM

ماشاء الله على الرزيزة المقومة والي تقيم القلب

سلمت ايدياتك المدبعة لوبا

بالرغم من طريقتك تختلف عن طرقي الي نعرفها

لكن شكلها ونتيجتها رووووعه

بالهني والعافية على قلوبكم

وتستاهلي أحلى نجيمات