[كيكه العسل الروسيه ] من مطبخ المصراتيه

[المصراتيه]

السلام عليكم ورحمه الله

*المقاديـر:

العجــــــيـنه:::
كوب سكر
2 بيض
نص كوب زبده
2 ملعقه كبيره عسل
1 ملعقه كبيره فانيليا
2 ملعقه صغيره خميره بيكنج بودر
2.5 الي 3 اكواب دقيق
رشه صغييره ملح

الكريـــــــمه:::
كوب حليب نستله محلي
نص كوب زبذه
2 ملاعق كبيره عسل
3 ملاعق كبيره قشطه

الطريقـــــه ::

توضع الزبده علي حمام مائي فوق نار هاديه.

نضيف عليه السكر والعسل ونخلط كويس لعند مايدوب السكر.

نخلط البيض والفانيليا مع بعضهن .

ونضيفهن علي باقي المكونات ونحرك....

نضيف نصف كميه الدقيق ونحرك لعند ما تبيدا عندي عجينه رطبه شويا.

نحول الخليط من علي النار ونحط عليه باقي الدقيق والخميره ورشه الملح
زياده الدقيق بشويا عي حسب العجينه ماتتماسك
اول ماتتكون عندي عجينه نحطها علي طاوله ونقسمها لي 8 اجزاء

نفرد العجينه او نفطحها باليد علي الطاجين مدهون بالزبده وتكون طبقه رقيقه.

بالنسبه لحجم الطاجين صغير مقاسه 20 سم تقريبا يعني كبري المقدار علي حسب العيله لو تبيها كبيره

ندخلها الفرن مطولش تقريبا 5 دقايق.
اول ما اطلعي الطبقه من الفرن تقصي اطرافها علي طول قبل ماتيبس متلا بغطاء طنجره "حاده" كيف مادرت اني تكون مساحتها اصغر من كبر الطبقه بشويييا وخلي الاطراف علي جنب ماترميهنش
ان شاءالله فهمتو قصدي وهدي صورتها

وهكدا لعند منكمل الطبقات كلها.

نحط الطبقات علي جنب ونبدا نجهز الكريمه
نخلط جميع مكونات الكريمه مع بعضهن

نبدا ندهن بالطبقه كيف الصوره

نحط الطبقات فوق بعظهن ونضغط عليهن ضغطه خفيييييييييفه ردي بالك منها ساهل تكسيرها لانها كيف البشكوطي بالزبط.

ندهنها من الجنب
نجو للاطراف اللي حولتيهن نرحيهن رحي غليظ
شويا ونغطي بيها الكيكه.

ونخلوها تمتص شرابها بشواش وبعدين نتمتعو في ايكالها وصحتييييين

وحلاوتها اكتر في اليوم التاني..

ملاحظه.... تقدري اضيفي اي نوع من المكسرات مع التغطيه يزيد البنه او بشكوطي عادي ادا نقصت عليك الاطراف..
والملاحظه التانيه الافضل انك تخليها برا التلاجه عشان تكون هشه تقعد حتي اكتر من يوم عااادي جدا ..
الحق تعبها واجد ولكن طعمتها والله بجد حلوه
وهدا شكلها من داخل..

وصحتين وان شاءالله تعجبكم

[نسيبة]

اختك نسيبة اول وحدة وصلت ماشاء الله غالية المصرايته
كيكة مقومة من ادياتك ليا الصونية راهو

عجبوني الطبقات الرقيقة روعة
لعيونك احلى تقييم يا متميزة
تحياتي

[حاملة الورد]

أني ثاني وحدة نبي حصتي ههههههههه
سلمت يداكي كيكة حلوة

[بنت الاشراف]

ماشاء الله سلمت يداك لك تقييمى

[المصراتيه]

اقتباس:
المشاركة الأصلية كتبت بواسطة نسيبة
اختك نسيبة اول وحدة وصلت ماشاء الله غالية المصرايته
كيكة مقومة من ادياتك ليا الصونية راهو

عجبوني الطبقات الرقيقة روعة
لعيونك احلى تقييم يا متميزة
تحياتي


صحتين يا نوسه غير كمليها لانها دسمه شويا
بارك الله فيك علي تقيمك يا حلوه

[المصراتيه]

اقتباس:
المشاركة الأصلية كتبت بواسطة حاملة الورد
أني ثاني وحدة نبي حصتي ههههههههه
سلمت يداكي كيكة حلوة

الله يسلمك يارب
تفضلي حصتك غير ماتزعليش منا بس

[المصراتيه]

اقتباس:
المشاركة الأصلية كتبت بواسطة بنت الاشراف
ماشاء الله سلمت يداك لك تقييمى


تسلمي حبوبتي وصحيتي علي تقيمك الحلو

[ام هداية]

بسم الله ماشاء الله ابداع ربى يحفظك الكيكة حلوة وجديدة عليا والصور ما شاء الله تنسيق ونظام وخطوة بخطوة منورة على الوصفة اكثر من رائعة

حتى انى نبى حصتى فى الكيكة اتجى فى الخاطر يسلم ايدياتك

[زهرة البنفسج]

ماشاء الله خسارة مالحقتش لاكن ان شاء الله مرة تانية ومني افضل تقييم

[ام سحر]

ما شاء الله عليك
كيكة رائعة جدا..وطريقة جديدة
الف شكر ..والله يسلم ايديك