[مشاركة في المسابقة المفتوحة للمقبلات الرمضانية ] بطاطا بيوريه بالدجاج والبشاميل من مطبخ أم أيوب

[أم أيوب]

السلام عليكم ورحمة الله وبركاته

هالأكلة اعتقد انها فرنسية ومن المقبلات اللي نحبوها ولازم نقدموها كم مرة طول رمضان

ممكن تستعملي عصاج مفروم او دجاج وبالدجاج طعمتها ألذ

المكونات :

بطاطا مسلوقة ومقشرة ومهروسة متبلة بما يلي ( فلفل أكحل + رشة زنجبيل مطحون + رشة حبهان + فلفل أحمر مطحون أو هريسة عربية + ملح )

ملعقتين زبدة للبطاطا + بيض + بقسماط أو أرز مطحون والأفضل الأرز المطحون

للعصاج :

صدور دجاج مفرومة في ست البيت + توابل مشكلة ( حرارات + فلفل أكحل + شيبة مطحونة رشة بسيطة منها + ملح )

نص ربطة كسبر وكيفها معدنوس + نص ملعقة طماطم معجون + ثلاث فصوص ثوم مهروس + بصلة كبيرة مفرومة + زيت

البشاميل استعملت الجاهز اللي في الباكو وممكن تديريه حسب طريقتك المعتمدة

الطريقة :

نخلط مكونات العصاج ما عدا الثوم نضيفه بعد ما العصاج يطيب ونخليها عالنار لغاية ما ينشف ويكون طايب



نخلط البطاطا مع توابلها والزبدة والبيض والرز المطحون او الخبزة المرحية وبالرز أفضل تجيك خفيفة ومتماسكة



ندهن طاجين تيفال بالزيت ونرشه بالخبزة المرحية ونفرد فيه البطاطا المهروسة

نفرد عليها العصاج ونغطيها بالبشاميل



ندخلها لفرن ساخن ونشغله من فوق وتحت لعند ما تلقي الحواف متحمرة معناها من تحت تمام

ويتحمر الوجه وقتها حطي عليه الجبنة اللي تحبيها وهنا استعملت شيدر بس شرائح



وهدي من قريب



جربوها والله طعمتها تجنن

في أمان الله

[الصابرة]

الله يعطيك السلامة
الحال حال صيام شكلها يهبل واكيد الطعمة غير
سلم دياتك واحلى تقييم ونجوم لعيونك

[مغتربة 7]

يمييييييييييييييييي
ماشاء الله بطاطا تشهي وبنة البشاميل يم يم
تسلم الايادي وصحتين على قلوبكم
احلى تقييم لعيونك

[شروق الشمس]

ماشاء الله
شكله طاجين ايهبل الحق
الله ايسلم ايدياتك

[luba]

تسلم الايادي ام ايوب ماشاء الله

شكله يهبل ومكوناته كلها لديدة

جاري التقييم عزيزتي

[تعزيز]

تسلم ايدك شكله يمممممم روعة روعة
صحة وعافية

[بنت حواء]

ماشاء الله بيوريه يممممممم يشهي
سلم يدياتك
وصحة وهنا

[المصراتيه]

ماشاءالله لا قوه إلا بالله
تهبببببببل محلاها
خساره ماشبحتهاش إلا توا فاتت عليا في رمضان
اول مره نعرفها جديده عليا
يعطيك الصحه وتسلم يدياتك وليك أحلي تقيم

[نسمه ليبيه]

سهفتينا الله يجازيك خير


ان شاء الله جارى التطبيق

[نسيبة]

تسلم الايادي غالية طبق المفضل بس هي ادير فيه بالكيما اللحم المفروم العصاج