[ رشدة كسكاس ] من مطبخ حبيبتهم

[حبيبتهم]

السلام عليكم

اليوم جايبتلكم رشدة كسكاس من مطبخي


المكونات والطريقة

لحم حسب العدد
بصل مقطع جوانح
حمص منقع
زيت انا دائما استخدم زيت الزيتون
ملح
فلفل احمر \ بزار \ حرارات \ معجون طماطم


نحط البصل والحمص والزيت في طنجرة عالنار ونقليه





بعد مايتقلى ويذبل نحط معاه اللحم و الملح والفلفل والبزار والحرارات والطماطم ونقلبه مع بعض






نصب عليه ماء الى ان يتغطى اللحم





ونخليها تغلي ونجهز العجينة

مكونات العجينة اللي في الصور
2 كوب دقيق
1\4 ملعقة كبيرة ملح
بيضة
ملعقتين زيت ذرة

نخلطهم مع بعض





ونعجن بالماء وتكون عجينة متماسكة ويابسة مش رطبة ونقطعها الى اقراص





ونفتحها بالماكينة من اول رقم الى اخر رقم















وبعدها انخليها تجف شوية ونقطعها بالجهة الرقيقة






ونحط الكسكاس عالطنجرة وندهنه بالزيت بيش ماتلصق فيه الرشدة وكل مرة انحط كمية صغيرة ونراجي لوين يطلع منها البخار ثم نحط كمية تانية الى الاخير










وبعد انخليها شوية عالبخار لوين يتغير لون العجينة وتجف


ثم نصبها في صحن كبير وناخذ كمية من دهان الطبيخة وسمن وطني وشوية قرفة نخلطهم مع بعض ونصبه عالرشدة ونحركها فيها لوين تتلون كلها














وبعدها انرجعها للكسكاس مرة اخرى ونخليها عالبخار ونحط بطاطا في الطبيخة







بعد ماتطيب البطاطا والرشدة

انحط كمية رشدة في صحن ونسقيها بالطبيخة

وهكي تكون






وهذي الصونية لـ luba

[مغتربة 7]

باهي ياحبيبتهم هكي ما تعزميش عليا
لكن من كثر ما سهفت خديت الصونية الثانية وخليت متع لوبا الله غالب


يمييييييييييييييييييييييييييييييييي
ماشاء الله لاقوة الابالله
رشيدة تهببببببببببببببببل بنة وصنة
تسلم الايادي الى تلتف بالحرير
احلى تقييييييييييييييم لعيونك

[om_adnan]

وعليك السلام حبيبتهم....نبى انسميك حبيبتى الكل لانى لا اعرف من يكون -هم-,رشده اتجى فى الخاطر,وسلم اللى تجبر بخاطر لوبا ونحب انفرحك لعله قريبا لوبا اتطبق طريقتك- والا شنو رايك لوبا-,انا حنأكل مع مغتربه,عندى سؤال انى نعرف الرشده من غير دحى,طريقتك انحس انها اقرب للمكرونه ,مش عارفه انتى قوليلى.

[luba]

الحمد لله محسوبة في وحدة ومن ليبيا مسمية عليا رووووروووريييي والله خاطري فيها

وتو بنشري الماكينه من هني سلم ام عدنان خبرتني علي مكانها ونحسبك فيها انت وام عدنان و من تطبيقك

يعطيك الصحة وراحة البال وربي يناولك ماتتمني

رشدة وشرح كافي ووافي كعادتك كريمة فيه وفي الصحون اكيد التقييم لي حبيبتنا و رشدتها اللي تهبل



وووه ام عدنان تحت نشوف فيها غير ان شاء الله ماتاخد الصونية اسمعوا مانيش عازمه حد من الاخير

[مغتربة 7]

باهي يالوبا بروحك ومن الاخير شن درنالك ياحبيبتي
انتظريني راح تحسبني حبيبتهم المرة الجاية ومش مقسمة معاك اه اه اه

[sweet nona]

مممممممممممم

رشدة اتهبل حبيبتنا

تسلم ايديك اختي ديما ادير فيها قبل ما وتتزوج

بس عمري ماجربتها ديما ناخدو فيها واتية

لالا حتى اني بنقعمز مع مغتربة وتوا اتجي لبنى وتلحق هههه

[زينب محمد]

ماشاء الله

رشيدة تسهف وتستحق التقييم

الله يسلم ايديك ويعطيك الصحة والعافية حبيبتي

صحة وهناء على قلوبكم

ننتظر منك المزيد بكل تأكيد

[حبيبتهم]

السلام عليكم

مغتربة

اهلا بك وتسلمي على مرورك الحلو
معليشي المرة هذي درت صونية خصيصا للوبا لانها حرام وجعتني على ماخاطرها في الرشدة
المرة الجاية بكل تأكيد ليك انتي وصحتين عليك الصونية الثانية




ام عدنان


اهلا بك وتسلمي على مرورك
وتبي تعرفي (هم ) منو يكونوا (هم ) هذيما ضمير متصل يعود على كل من يحبني ==== >>> دايرة روحي نفهم في النحو هههه
اما قصة الدحي هذي مانعرفش ليش لكن اني نمشي عالثوابت اللي متعلمتها من امي هي اللي يمشي معاي ومانغيرهاش بس لكن اعتقد ان الفرق في ( معررفتش التعبير اللي يمشي مع اللي بنقوله ) القوام او مش عارفة المهم ماتكونش الرشدة مرخية وماعندهاش حيل لما اتطيب المهم مش كيف الرشدة الجاهزة اللي لما تسقيها كان مش طبيختها خاترة هلبه تقعد معجنة



لوبا
اهلا بك وتسلمي على مرورك وكان نقدر نبعتهلك من هنا الرشدة والماكينة نبعتهم طول
وان شاء الله تحصلي الماكينة وتشبعي بالرشدة

[دانية]

سلم ايديك واللهي حسيت روحي شميت بنتها ياسلاااام ..

نحن في الشرق ما انديروش فيها بس انا واكلتها عند ناس من غريان اصحاب زوجي ..اتهببببل

[ام جنى]

تصدقى انا ام زوجى ادير فيها بس عمرها ما درتها لنا
تصدقى سمعت انها ادير فيها السنه الماضيه من مرت خوها
هى كل ما تمشى لعيت خوها ادير فيها غادى
وفى خاطرى انذوقها
ان شاء الله انجرب طريقتك