[تجارب] شنو تستخدمي ؟؟؟؟

**حبيبتهم** · 09-02-2012, 07:17 PM

السلام عليكم

حبيت نستفيدوا من بعض في الحاجات الخاصة بالمطبخ خصوصا والمنزل عموما

يعني اني بنسألكن اسئلة وكل واحدة تحاول انها تجاوب بيش نستفيدوا من بعض واي شئ يخطر في بالكن اكتبنه هنا

شنو تستخدمي فرن غاز ام فرن كهرباء واين افضل برأيك

شنو تستخدمي منظف للدهون واحسن نوع استعملتيه ( طبعا نعرف ان في فرق بين هنا في ليبيا وبين برا )

شنو تستخدمي نوع صابون سائل

شنو تستخدمي انواع قهوة وشاي

وشنو تستخدمي لتنظيف وازالة الروائح من الثلاجة

وشنو تستخدمي ؟؟؟؟

هذا اللي في بالي حاليا

نتمنى منكن جميعا تشاركن بيش نستفيدوا من بعض

معليشي يا مشرفات لو مكان موضوعي غلط غيروه
ولو مكرر احذفوه

**حبيبتهم** · 09-02-2012, 07:31 PM

اني طبعا اول واحدة بنجاوب

اني نستخدم في الفرن الغازي ونحس فيه اسرع واريح من الفرن الكهربائي

بالنسبة لمنظف الدهون اني جربت انواع هلبه وفي منهم كويسات لكن هذا لقيته اقوى نوع وفي من الشركة هذي منظفات متعددة لعيون الغاز الذهبية وللفضة وللستانليس ستيل وغيرها

الصابون السائل نحب نستخدم فيري او silk

لتنظيف الثلاجة وازالة الروائح منها

طبعا لما بنظف الثلاجة انطلع كل شئ منها
ونغسل القطع اللي فيها بالماء والصابون والكلوركس ونخليهم ايجفوا في الشمس وانظف الثلاجة من داخل حتى هي بماء وصابون وكلوركس باستعمال اسفنجة

ونرجع قطعها وارففها والحاجات اللي بنحطها فيها
اندير في خلطة تخلي ريحة الثلاجة حلوة
ناخد فحم الصغير متاع الارقيلة والبخور اندقه شوية ونخليه مفترش ونحط عليه في شوية قرفة وشوية قهوة عربية ونخلطه ونحط ه في صحن في الثلاجة او في اكياس قماش صغيرة ونوزعهن في الثلاجة

ولما نتفكر حاجة ثانية نكتبها

**مغتربة 7** · 09-02-2012, 08:18 PM

موضوعك تحفة حبيبتي حبيبتهم
لي عودة

**om_adnan** · 09-02-2012, 08:44 PM

وعليك السلام حبيببتهم....موضوع هايل....
مافيش شك الفرن بالغاز اسرع ,مع ان اللى عندى كهربائى,يعتمد ذلك على البلد ,انقول الفرن مفضل كهربائى.
المنظفات كلهم كويسات ولكن الافضل تقللى استعمالهم لانهم مواد كيمائيه وخطييير جدا خلطهم,وذلك لان ضررهم على المدى البعيد,نفضل اى شئ من lysol,تنظيف الثلاجه عجبتنى فكرتك الاخيره ويجب الحرص عند وضع اللحوم النيه,عندى سؤال
ماهو أبرد رف فى الثلاجه؟

**حبيبتهم** · 09-02-2012, 10:14 PM

السلام عليكم

مغتربة
اهلا بك وتسلمي يا غالية ونراجي في اضافاتك

ام عدنان

اهلا بك
تسلمي يا غالية

اكيد كل شخص بستعمل الموجود في المكان اللي هو فيه
والمنظفات صح عندك الحق كثرتهم مضرة وخلط انواع مع بعض مضرة اكثر من منظف نلقى مكتوب عليهن لا يخلط مع مواد كيميائية او منظفات اخرى

واعتقد ان ابرد رف في الثلاجة هو العلوي
بالنسبة للحوم النية لا احب اني نحطها في الثلاجة لازم على طول اول ماتوصل للبيت نقسمها حسب الوجبات ونحطها في اكياس نايلون وعالفريز مباشرة وجهة اللحوم تكون تحت في الفريز بيش حتى لو صار تسرب من الاكياس لاي سوائل ماينزل على شئ تحته

ونراجي في البنات يشاركوا معاناا

**sweet nona** · 09-02-2012, 10:47 PM

موضوع روووعة

حبيبتهم...رااااجعة

**مغتربة 7** · 09-02-2012, 11:59 PM

السلام عليكم

حبيبة موضوعك رااااااائع
وان شاء الله نفيدوا بعض من هذا الموضوع

بالنسبة لسؤالك الاول نستخدم فى فرن كهربائي بحكم المكان الى اني فيه زي ماقالت ام عدنان

وبالنسبة لسؤالك الثاني لو تقصدي دهون الفرن نفسه نستخدم فى منظف اسمه ايزي اوف رووووووعة يرجعلي فى الفرن جديد بس قوي جدا حتى على اليدين وهذه صورته

والسؤال الثالث
صابون اليدين مرات نغير لكن اغلب صابون داون

وبالنسبة للقوة والشاهي انجيب فيهم من ليبيا عندك قهوة عصام فى طرابلس تجنن

وبالنسبة لروائح الثلاجة تستخدمي بيكربونات الصوديم

وان شاء الله لي عودة لوضع بعض الاسئلة

**حبيبتهم** · 09-03-2012, 12:42 AM

السلام عليكم
سويتي الحلوة اهلابك ونورتي ونراجي في مشاركتك معانا

مغتربة
تسلمي علي اهتمامك
طبعا منتجات التظيف تختلف من بلاد لاخرى وان شاء الله البنات اللي في كندا يستفيدوا من اقتراحاتك
بالنسبة ليا اني عالشاي والقهوة الشاي نحب نشرب شاهي خفيف اكثر شئ ناخد في شاهي ليبتون اكياس والقهوة مانشربش فيها هلبه ولكن المفضلة عندي اللي يطحنوا فيها مباشرة وتكون نوعية كويسة كيف البن البرازيلي

يا بنات اللي تحب اتضيفلنا معلومة او تسأل اي سؤال تتفضل انتم اهل الحوش مش لازم عزومة

سؤال اخر
شنو نوع الطناجر المفضلة ستانليس ستيل او تيفال اوماذا
اجابتي اني نحب الستانليس ستيل اكثر شئ التيفال نحب نستخدمهم في حاجات معينة مثل الارز الابيض او المقطع ههه في الشتي اندير فيه هلبه

نراجي في مشاركاتكن
وسلامي ليكن جميعا

**ترهونيه حره** · 09-03-2012, 01:22 AM

موضوع جميل ومفيد بالنسبه للفرن
نستخدم فى الفرن الكهربائى وفرن
الغاز عند هروب الضى هههههههه
والافضل للكيكات الفرن الكهربائى
اما بالنسبه للمعجنات وخاصه البيتزا
تطلع تهبل فى فرن الغاز وبالنسبه
للمنظفات الدهون كل مره نستخدم
نوع بس اخر نوع اريكساكا وماشاء الله
اما القهوه قهوه عصام او اليمن او قهوه
من سوق المهارى اللى يطحنو فيها قدامك
والصابون كل مره نوع بس فيرى مش عادى
سهل علينا الشغل فى رمضان انصحكم بيه