[تجارب] شنو تستخدمي ؟؟؟؟

[لوتي]

فكرة حلوة ياحبيبتهم جاري التطبيق بإذن الله ممكن إتضيفي علي الموضوع كل وحدة تقول أحسن معطر وأني بنجاوب أني إنحب البخور الليبي لا يعلا علي ريحته خاصتا مع الكانون في الشتي أما المعطرات فعجبني أخر معطر إستعملته إ سمه دلع بنات وهو خليجي ريحته الصراحة هادية وحلوة

[الصابرة]

اني معاك من ناحية البخور بخورنا لا يعلى عليه
واحنا الحمدلله ماما ادير فيه بروحها وريحته الله مانحكيلكمش عليها
بس اني عشان انحافظ على صدري من رجوع الحساسية
نبخر مرة في الاسبوع واذا جاييني ضيوف نكسر في القاعدة

[حبيبتهم]

الصابرة و لوتي ربي ما يحرمني منكن بالنسبة للبخور حتى اني انفضل البخور الليبي متاعنا. لكن مرات نستخدم في العود الكمبودي مع انه ريحته حلوة لكنه فترة شوية تلقيها اختفت الريحة اما البخور الليبي زي ماقالت لوتي بالذات في الشتي تحسيه ايدفي الحوش اما المعطرات انحب معطر متاع فرش نوع تركي اظني اسمه اكات بكرة ان شاء الله انصوره ونزل الصورة ريحته حلوة وتعجب فيا هلبه


وتحياتي ليكن يا حبوبات

[حبيبتهم]

نسيت بنقولك يا الصابرة ردي بالك منه البخور وبالذات الفيسوخ مانعرفش فهمتيني او لا هذاكا المعجون الاسود والله اينوض في الحساسية وحاولي انك تنقصي استعماله او تلغيه بكل اهم شئ الصحة ولو بخرتي ماتقعديش فيه المكان وقت التبخير وديري كمية شوية

[نسمه ليبيه]

السلام عليكم حبيبتهم وكل البنات

موضوعكم حلوو و ان شاء الله حنكتب لكم ماركات الاشياء اللى نستخدم فيهم


وانا عندى بعض الاسئله ياريت تفيدونى

غسيل السجاد شن افضل نوعيه
وافضل نوع خميرة حلويات كثرن فى السوق ومعش عرفنا الافضل


طواجين البايركس كيف تنظف فيهن؟

هل المكوى البخارى تنصحنى بيه ام لا؟ وهل هو يعمل فى الثنيات اللى فى البنطلونات؟ ان شاء الله تكونن فهمتنى


واخيرا ماتضحكنش على سؤالى شن افضل كريم اساس؟شامبو الشعر شن افضل نوع
هههههههههههههه

[حبيبتهم]

اهلين بنسومة الغالية

مافهمتش قصدك بغسيل السجاد ياريت توضحيلي اكثر

اني نوع خميرة الحلويات اللي نستخدم فيه طبعا فهمت انك تقصدي البيكنج بودر هو التونسي اللي لونه ازرق بكرة انزل الصورة

تنظيف طواجين البايركس. بعد مايبرد لو فيه شئ لاصق انصب فيه امية ونخليه يتنقع شوية. ولو في اطرافه زي الحاجات المحروقة انحكه ببودرة التلميع بكرة حتى هي انزل الصورة ليها هي في علبة بلاستك.طويلة وتشبه الصابون التايد لكن هي حرسة زي الرملة ههه وصف مش عادي

مكواة البخار معليشي مانقدرش انفيدك بخصوصها

افضل كريم اساس اني نحبه وهو بس نستخدم فيه كريم ماكس فاكتور.
وافضل شامبو بالنسبة ليا كلير اني من قبل ديمة عندي مشكلة القشرة لكن من لما استعملت كلير نسيت حاجة اسمها قشرة
بكرة انزلك صورة الشامبو والكريم الاساس كله بكرة هههه ماهو توا. بنرقد غير مش جايني نوم ونرد عليك من التليفون

سلامات يا حبوبة وان شاءالله البنات ايفيدنك اكثر بتجاربهن ونراجرا منك تكتبي لنا تجاربك

[نسمه ليبيه]

اهلين بحبيبتنا كلنا
غسيل السجاد نقصد سائل الغسيل اللى يضاف لالة غسيل السجاد

وبالنسبه لحاجاتى حاض بكره نوريهملك

[الصابرة]

حبيبتهم
سلمها يارب ونجيها اللي خايفة عليا
اني اندير في اللي قلتي عليه كله واللي قلتي لا نحبه ونطيقه وكان شميته حشاك نقعد انرجع

نسومة
بالنسبة لاحسن غسيل سجاد زمان اهلي كانوا يشروا في صابون سائل يتعبى مخصص لسجاد يخلي فيه يهبل من بنغازي
وتوا يجيبوا فيه من طرابلس نفس الصابون واذا السجاد عليه بقع يستخدموا في فانش البودرة

وبالنسبة لاحسن كريم اساس اني نستعمل في نوعية ليا 5 سنوات لاني قبل الزواج ما كنتش نحط في مكياج وهو ماركة برجوا نوعية مش عادية وخصوصا اني بشرتي حساسة ودهنية واحلى مافيها ديمة فيها جديد
يعني 5 سنوات واني كل 6 اشهر شئ احدث وافضل والماركة هذه نستعمل منها في البودرة وخليك ديمة مع البودرة الحرة مش عادية تعطيك طلة زي التركيات ماتقوليش حاطة مكياج وروج ومسكرة واحمر خدود وقلم للعين ورسم للعين
وقلم رسم شفايف
صح هيا اسعارها غالية شوي لكن احسن حاجة لبشرتك
وعندك الماكس فاكتر معظم قريباتي يستخدمن فيها ويشكروا فيها

وبالنسبة للشامبو عمري ماقعدت على نوع واحد لان مرة دكتور جلدية قالي الشعر زي المعدة يزهق من اكلة واحدة فقعدت كل 3 شهور انغير نوع ومانكذب عليك ديمة انغير بين 3 انواع بانتين وصانسيلك وفريتز للشعر المصبوغ

ان شاءالله اكون افدتك يانسومة واي سؤال تفضلي

[مغتربة 7]

السلام عليكم
اشيه ماشاء الله على النشاط يابنات ربي يعطيكم الصحة

بالنسبة للبخور الصارحة اني مجنونة بخور مهلوسة يابنات والله العظيم
ونحب جميييييييييييع الانواع خاصة السعودي يجنن واكيد الليبي
ونستخدم فى المعطر متع البخور وبالنسبة للسجاد فى بودر نستخدم فيها انرشها على الفرش تعطي ريحة وتقتل الجراثيم بيكربونات تقعد نص ساعة وبعدين نكنس الفرس بالمكنسة الكهربائية


وبالنسبة لصابون الفرش لما انأجر الماكينة متع الفرش نستخدم فى نوع resolve روعة الصراحة

وكان من غير مكنسة نستخدم فى نفس النوع لكن بخاخ

[luba]

ماشاء الله وبارك الله فيكن

بالنسبه للبخور اني نستعمل في حجر الرقيله الصغير

وطبعا انكمل تبخير هيا ما اتم فناخد نقلب عليها فازوا فارغ

عشان نموت النار ونستعمل الفحمه مرة تانيه وتاليته وعاشرة

وطبعا مهوووسه كيفك في البخور وكان تشوفي ولدي بعد نكملوا الغدي

وهو يجري ماما هيا البخور قريب نهبلوا منه تكريشه عليه بوه ديمه يعلق عليه

مش بعيد بتطلع متاع حضاري ( حضرة ) اللي يديروا فيهم في الجوامع بالبخور ههههه


وبالنسبة لصابون السجاد مانعرفش وناخد في الماكينه بالعاملة متاعها بس شفتهم

يستخدموا نفس اللي منزلاته مغتربه بارك الله فيها واني كيف قايله بسم الله ولكن البودرة صح اللي قالت عليها مغتربه للفرش

دوروها ممكن في غادي وريحتها حلوة كل مرة نوع في اللافندر و زهور الربيع وووو وتحول في البقع لو خليتيها علي البقعه نصف ساعه بدون ماتمسيها بمية

وتشفط بالماكينه الكهربائية


والمكياج اللي دكرتهم حبيبتهم ممتازات والصابرة ماركتها نستعمل في الظلال منها ممتازة وتو نجرب البودرة

اصلا ماندير في كريم بكل حتي في الاعراس ومن افضل واروع البودرات مااااك تهبل تهبل وحتي رسم العيون منها يهبل

وخاصة الشبه صلب اللي بدون فرشاه


والشامبو مااروعك يا سل صن الازرق وداعا للقشرة وهو نوع طبي وفيه بلسم حتي الشعر يقعد ناعم ونستعمل فيه حين عودة القشرة فقط

وزي ماقالت الصابرة ماحد ينصح بالبقاء علي نوع واحد فعندي حوالي 4 انواع وكل دوش بشكل

نسمة ننصحك اكيد بمكواة البخار وخاصة نوع فيليبس الخضرة مش الديجيتال عادي

كانت في ليبيا وقتها 65 دينار من عامين راااائعه جدا جدا جدا