[ المثرودة ] من مطبخ الصابرة

[الصابرة]

السلام عليكم

اليوم جيت وجبت معاي اكلة تعز عليا ومعروفة في المنطقة الشرقية اكثر شئ
وحبيت اليوم اقدمها لكم على حسب ماتعلمتها
وطبعا درتها واحنا في مزرعة اهلي وحبيت اجيب معاي ليكم صور من المشية اللي كانت تهبل

..... الطريقة .....

نحضر فطير مشلتت



طريقة اعداده هنا

نأخذ ونفتته قطع صغيرة
ثم نفركه بقليل من السمن او الزبدة الذائبة
ونضعها في كسكاس ونتركها حتى تبوخ ياذوب ترطاب



ثم نقوم بقلي لوز وتعصيد تمر ونكوره كور صغيرة
واذا احببتي ممكن اضافة انواع اخرى من المكسرات



نضع المثرودة في صحن تقديم ونخلطها بقليل من السكر البودر





ثم نزينه بالتمر واللوز ورشة جوز هند



ونرش عليها سكر بودر او يقدم معها في صحن جانبي وممكن عند التقديم يقدم معها عسل



اتمنى ان تنال اعجابكم


وهذه بعض من صور المزرعة وكانت عندنا الة ربط الصفصفة تربط الصفصفة بعد حصادها















طبعا مانسيناش الشاي الاخضر والاحمر على الفحيمات

[om_adnan]

وعليك السلام الصابره...ماشاء الله ,تبارك الرحمن,لا حول ولا قوه الا بالله.انا لما شفت موضوعك اتذكرت المثروده,وكنت نبى نحكى لك عليها,امتاعك ميه الميه ولكن اعتقد بعد ما تنزليها من الكساس تضيفى شويه حليب,بس بصراحه مش متذكره مزبوط,اللى ما يعرفش المثروده ,يعتبر فايته واجد,تستاهل تتعبى عليها,زى العسل,تشعرى انها من اكل زمان زمان هلبه,توا انجوا الى لمتكم,ربى يحفظكم ويبارك لكم فى رزقكم,والله تمنيت نكون معاكم,الصابره تمتعى بكل دقيقه مع بعض وخصوصا فى مثل هذا الجو,مش عارفه شنو نكتب,الاهم نحجز صحنى.

[الصابرة]

اسعدني مرورك وخيتي ام عدنان
دائما كلامك الرائع يشعر فيا بالخجل
وخيتي ام عدنان اللي ينضاف لها الحليب بتاعت الخبزة لكن بتاعت الفطيرة مايضيفوش ليها

[luba]

ماشاءالله واول مرة نعرفها المترودة صحتين عليكم وربي يعطيهم الصحة وطول العمر والديك وخوتك وخواتك واديسكوا اللي عليه الشاهي دكرتوني بايامي في زرادي اهلي ربي يناولك اللي في بالك وحسيت بروحي معاكم في هالزردة و اكيد تقييم ليك ولو مامشاش راجعتله وللموضوع

[ام غيداء]

ماشا الله تبارك الرحمن رووووووووووووعه ذكرتيني بايام المزرعه

[الصابرة]

لوبا الله يفتحها عليك يارب
غير تعالي انديرلك احلى زردة وبما ان احنا من نفس المدينة اكيد عندكم زيها المزرعة تعالي وانديروها بالدور مرة عندك ومرة عندي
اسعدني مرورك اختي ام غيداء

[شروق الشمس]

اممممممممممممم
الله يعطيك يلي في بالك و حقق امنياتك

[بنت حواء]

ماشاء الله مثرودة تشههههههههي
والجو يجنن في المزرعة
(المفروض كتبتي من مطبخ أهلي) هههههههه
ربي يونسكم ببعض
وسلم يدياتك
وصحة وهنا

[مغتربة 7]

ماشاء الله لاقوة الابالله
رووووووووووووووعة ياصابرة المثرودة تاخد العقل خاطري فيها الصراحة
والمزرعة الله اكبر تجنن محلاها الاجواء ربي يباركلكم فيها يارب
ولا الشاهي يميييييييييي
احلى تقييييييييم ليك ولموضوعك الرااااااااااائع

[barney]

ماشاء الله لاقوة الا بالله عالمثرودة وعالمزرعه وع اللمه
حسني ابنبكي ذكرتيني بمزرعتنا واللمه وخبزة الجمر يا نييييييييييييي يا الصابرة
زمان كانت عندي صاحبتي فالهندسه شرقاويه دارتهللي اتهبل ناكل منها مانشبع
سلم ايدياتك احني ما انديروش فيها لكن الطعمه تقتل مش عادية



اه ع ايامات المركاب والنار اتلهلب ليش عليك يالصابرة ليش
شن درنالك يا حبيبتي
ليك احلى تقييييييييييييييييييم