[مشاركة لمسابقة الافطار الصباحي العائلي] بيض بالطماطم [الشكشوكة] من مطبخ لوبا

[luba]

السلام عليكم ورحمة الله


طبيحة الدحي او ( البيض بالطماطم )







نضع في طاجين او طنجرة زيت زيتون و ثلاث فص توم مهروس

نقلي التوم تم نضيف عليه فلفل اخضر مقطع مكعبات

ونخليه شوية يقلي



تم نضيف حبتين طماطم اخضر وحدة مقشرة

والاخري بدون تقشير و تقطع مكعبات



تم نضيف عليهم ربع ملعقة صغيرة كروية

وكمون حوت نصف ملعقة صغيرة وملح حسب الرغبة

زرشة فلفل اسود وربع ملعقة فلفل احمر بودرة

ورشة كركم و نصف ملعقة صغيرة طماطم معجون

نحركهم كويس ويقلوا شوية مع بعضهم



نضيف عليهم قليل من الماء حوالي ربع كوب

ونخليهم يغلوا لحد ما يختتر وتتسبك




نصيف لها البيضات ومانحركهم هلبه دوب بالسكين نفتح شوية الصفار

في الصورة تم فتح وحدة من البيضات تم نغطيها وتنتركها علي نار

بين هادئة ومتوسطة رقم 4


ادا حبيتي بدون مرقة افتحي الغطاء وخليها لين تتبخر





وهدي طريقتي وكل حد طريقته تختلف في هدا الطبق

وان شاء الله تعجبكم

[sweet nona]

لولو الحلوة

شكشوكة من ايدياتك تاخذ العقل

هادى ليا انى عاد الاولى جيت ورديت

وأكيد حنقيم ناقص انوض انجيب خبزتى بس

تسلم الايادى

[أمـ ساره]

الله على لوبا وعلى شكشوكتها الحلوة

صنتها فايحة واصلة لعندي واني ما عندي روح معاها

سلمت ايدياتك الحلوة على الفطور السمح

وصح كل وحدة وطريقتها وهذه طريقة جديدة علي

وتستاهلي التقييم لو يبي يمشي وأحلى نجيمااااااات

بالهني والعافية على قلوبكم

[ميرولاكى]

ياسلاااااااااااااااااااام شكشوكه تسهههههههههههههف
وصدقتى فى طرق واااااااااااجد للشكشوكه بس بكل الطرق انا نحبها
سلم دياتك وصحتين على قلوبكم

[ام هداية]

ما شاء الله لوبا شكشوكة تشهى بجديات ريقتى سالت هههه حتى انى انحبها وطالعة من ايدياتك روعة ربى يحفظك وتاكلوا بالهناء

[حبيبتهم]

ماشاء الله تسلم ايديك يا لوبا
محلاها الشكشوكة انحبها ولكن طريقتي تختلف عليك
ان شاء الله انديرها وانزلها على فكرة اني اندير فيها بالقديد

لك ولموضوعك احلى تقييم

[نسيبة]

بكل الطرق الشكشوطة طبق سهل و رائع سلم ادياتك حبوبة لوبا

[ام مؤيد]

ما شاء الله عليك وخيتي لوبا شكشوكة اتجي في الخاطر وبالدات في الصقع اتهبل

[بنت الاشراف]

ماشاء الله سلمت يداك موفقة فى المسابقة

[luba]

سوسو وام ساره وميرولاكي

ام هداية وحبيبتهم ونسيبة

ام مؤيد وبنت الاشراف

بارك الله فيكم ونورتوا الموضوع ومشكورين الكل علي الكلام الزين

وحتي اني ندير فيها بالقديد يا حبيبتهم بس لي الاسف الظروف تحكم اخ خاطري فيه