[مشاركة في مسابقة الافطار الصباحي العائلي] فول مدمس من مطبخ أم ساره

**أمـ ساره** · 10-01-2012, 12:45 AM

السلام عليكم ورحمة الله وبركاته

هذه طريقتة من طرقي في الفول المدمس واني نستخدم في الجاهز بصراحة

لأني ما نعرف انديره في الحوش وياريت الي تعرف طريقته ما تحرمنا منها وتفيدنا بيها

المقادير

علبة فول مدمس

بصلة صغيرة مفرومة

ويفضل استخدام الطماطم الاخضر حوالي حبتين

بس ما كان متوفر عندي

التوابل حسب الرغبة

ملح

رشة فلفل أسود

ملعقة صغيرة كركم

2 ملعقة صغيرة كمون حوت

ملعقة طعام طماطم معجون (الحكة )

زيت زيتون

الطريقة

نضع الزيت في طاوة على النار ونضيف البصل المفروم وشوية ملح حتى يذبل البصل ويصفر لونه

ثم نضيف له التوابل ونحمصها شوي مع البصل

وبعدها نضيف الطماطم لو كان متوفر واني اضفت الماء وخليته يغلي شوي حوالي 5 دقائق

ثم نضيف له علبة الفول ونخليها تغلي شوي حتى تتنكه بالتوابل وأيضا يتبخر الماء شوي

ثم نهرسها بالشوكة أو ممكن في ست البيت لو حبيتي بس الهرس باليد أفضل بصراحة

ثم توضع في صينية التقديم وتزين حسب الرغبة أو حتى تقدميها زي ما هي

وما تنسي رشة زيت الزيتون فوقها

وهذه مع سفرة الفطور

وجربوا كولوها مع الجبن الابيض أي نوع

اني خلطت معاها كيري وبصراحة اتهبل اتهبل

وطبعاً ممكن تقدم حتى في العشاء وهذا حسب الذوق

وان شاء الله تعجبكم طريقتي وخلينا نشوفوا ابداعاتكم في الافطار يا حلوات

**حبيبتهم** · 10-01-2012, 01:02 AM

ماشاء الله فول مدمس ياخذ العقل تسلم ايديك وصحتين عليكم ولك ولموضوعك احلي تقييم
علي فكرة طريقتي مختلفة علي طريقتك لو حصلت وقت انديره ونزلها

**luba** · 10-01-2012, 03:36 AM

ماشاء الله ام ساره يهبل وطريقتي تختلف عليك

بس منظره تحفة تحفة مش عادي بكل

اخ خاطري فيه ان شاء الله نلقاه وحنطبق طريقتك

عجبني شكلة وماتنسيش عصرة الليمون مع زيت الزيتون واو

لين حسيت بقشعريرة وين ندكر اليم هههه

اكيد لي التقييم

**المصراتيه** · 10-01-2012, 05:02 AM

لوبا غريبــــــه شكلك شبعانه ..صحتين
ماشاءالله علي فطور الامراء
انمووووووووووووت فيه وطريقتك تهبببببل ولكن راجلي ميحباش
حنجربها بادن الله وناكلها اني وبنوتي خخخ
يعطيك الصحه ويسلم يدياتك
وماشاءالله علي الجبنه بانواعها
تستاهلي احلي تقيــــم
وموفقه يارب

**barney** · 10-01-2012, 05:05 AM

ماشاء الله لا قوة الا بالله
تبارك الرحمن ع لمدمس اللي من ايدياتك
ان شاء الله بالتوفيق في المسابقه
لك تقييمي كان مشي

**أمـ ساره** · 10-01-2012, 06:47 AM

بارك الله فيكم على المرور الحلو وخياتي

وعلى ردودكم الأحلى والمشجعة

وياريت كل وحدة تنزل طريقتها خلي نستفيدوا

لوبا

لو كانك جنبي راهو نبعث لك صونية معتبرة

**أم عبدالرحمن** · 10-01-2012, 02:07 PM

يسلموووا هاليدين اللى يتقلوا بالذهب

اعصابي بازت عالاخر .... ربي يستر عالرجيم

طريقتى تختلف عليك شوية

فى ست البيت نضرب بصل وثومة وفلفل أخضر وطماطم أخضر

ونحطهم عالنار ونضيف ليهم ملح وكمون وفلفل اسود لعند ماتتسبك الصلصة على رأى اخواتنا المصريين

وبعدين نضيف عليهم الفول ونبدأ نهرس فيه بالشوكة بس أنا منهرسش فيه هلبا

وبعدين نضبف له شوية زيت زيتون وعصرة ليم ورشة كمون

بس مجربتاش قبل بالجبنة أكيد يكون طعمه الذ وألذ