[ مقطع ليبي ] من مطبخ للاهم

[للاهم]

خير يا بنات

هو مقطع

او رشدة

نقولوا مقطع مشرق

عادي قديد وطماطم حب وطماطم معجون وثوم مدقوق وقرون فلفل وشوية بزار وفلفل حمر

والعين ميزان

والخبرة

يتقلى بوه علي خوه

ويتبلل

وبعد تنعدل طبيخته نحط المقطع اللي كنا درناه بماكينة المكرونة من عجينة يابسة

عبارة كيف ما تعرفن دقيق وشوية ملح وشوية امية

بس

المهم نرموا العجينة ومانحركوهش نين تبدا تبكبك

الجديد في مقطعي

انه بدقيق الشعير

صحي عشان جماعة "الهلثي"

وصدقيني يجي مش عادي

وفايح

بس مشكلته مايشربش المية

عشان هكي اضبطن الطبيخة مع مقدار العجينة

الحاجة التانية اللي نزيد فيها غير من شوية حبيبات عدس وحمص وفول اخضر

هي ورق حلبة اميبس نحكه على الطبيخة وقت التقلاي

نشري فيه من هالبلاد البعيدة من محلات الايرانيين

انا منحبش الحلبة الحبوب

مشكلتها تمرر الوكال

وبنتها تطلع ف العرق

مقطعي هذا مش باين فيه القديد لأنه كمل مني وماعنديش اللا دهانه

ما حقينا الشمس من يوم العيد مطر ليه ليه

نحب ديما نحط الجاريفي صحن تقليدي

وعندي صاحبتي تقول ديما: " ما يحلالي ناكل الجاري الا من طنجرة جربة قديمة مدقدقة من ايام القرامللي

وينصب في قصعة لوح والا في قصعة لومينيوم قديمة

واحلى ما في الجاري عندي لما تزرق قشرة طماطم ملفلفة"

امزجة رائعة

ديما تخطر عليا لما ندير الجاري

الله يمسيها بالخير

المهم كلينا منه نين قلنا يانا

شن رايكن

[زينب محمد]

ماشاء الله لا قوة إلا بالله

مقطع جاري يسهف

الله يسلم ايديك و يعطيك الصحة و العافية حبيبتي

صحة و هناء على قلوبكم

ننتظر منك مزيدا من المشاركات و الموضوعات و التطبيقات

دمت في حفظ الرحمن

[نسيم البحر]

ما شاء الله اعليك ياللاهم
ربي يحفظك ان شاء الله رشيده اتجي في الخاطر
وخاصه اقرينات الفلفل

[ام الجميلات]

مشكورة على المقطع

[أمـ ساره]

ماشاء الله للاهم رشيدة تهبل وتجي في الخاطر

هذا وقتها توا في الصقع

والله لي مدة طويلة عليها


سلمت ايدياتك حبيبة

[ليبيا قلبى]

ماشاء الله
تسلم ايدك

[اريناس]

ايممممممممممممممممم

هذاا يبى هااثلج لى عندناااااااااا

صحه صحه

[ام اسر]

ماشاء الله منظره ايهبل خاصة قرينات الفلفل
الله يعطيك الصحه

[حنان]

ماشاء الله لاقوة الا بالله

[خدوج]

سلمت وسلمت وسلمت يمناك
تسهف