اشغال واستفسارات المشاركات بدورة الكروشيه

**حبيبتهم** · 10-16-2012, 02:31 PM

السلام عليكم

يا مصراتية ديريها ليك الكندرة وخلاص تنفعك جايك الصقع توا هههه

الحق شغلك يعتبر كويس لانك كيف بديتي تتعلمي واني زمان تعلمت محسوبك ابلتنا في الاعدادي بتعلمنا عليه وماعلمتناش تمام علمتني مرت عمي شوية حتى هي مش اوي بعدها خشيت عالمجلات وتعلمت من شرح المجلات وبعدها من النت

اني بنقولك اسهل شئ ليك انتي توا في المفارش تشتغلي الشغل اللي اسمه كروشيه فيليه
هذا يعتمد عالسلسلة والعمود بس مع تتبيع الباترون ومن اسهل الباترونات

وتفضلي اسألي اللي تبيه بعد موافقة الصابرة طبعا

**المصراتيه** · 10-16-2012, 02:42 PM

وعليكم السلام
اهلين حبوبتنا
عندك الحق هيا كنضره جحا ههههههه تجي علي لوبا
باهي والله حسك فرحتيني باني كويسه كبدايه يعني نقولو ان يصير مني بعدين

هدا الباترون ..... مستحيييييييييييييل نحلم اني نتعلمه كانه ماكينه سبحان الله وماشاءالله ربي يحغظلك ايدياتك يارب
وبارك الله فيك
توا بكرا ابنسال عندي اسذله اكيد ولكن توا الساعه ٣ الا في نص الليل

**الصابرة** · 10-16-2012, 02:59 PM

خودي راحتك حبيبتهم
غير اني قبل نبي نعلمهن وحدة وحدة
الدائرة والمربع واساس شغلهن بيش يزبطن بعدين كل حاجة لكن بسلامتهن مستعجلات
فعادي حبيبتهم المهم انهن يتعلمن

**الصابرة** · 10-16-2012, 03:04 PM

اه نسيت المصراتية فردة الحذاء هيا ماشي حالها كمبتدأ
لكن ماشاءالله يصير منك
وسلم دياتك حبيبتهم وربي يعطيك الصحة شغل متقن ومرتب

**حبيبتهم** · 10-16-2012, 04:46 PM

السلام عليكم
عذرا مصراتية والصابرة المفرش الاخير اللي نزلته بالباترون مش شغلي هذي صورة من النت
اني اشتغلت مفرش هكي برسمة تختلف لكن توا ماعنديش الباترون عندي المفرش بس

ويالصابرة عرفت انهن مستعجلات بيش ايديرن حاجة يفرحن بيها واني نقترح عليك بعد مانزلتي الدرس الاول اتنزلي باترون فيه عرز الدرس بس وتوضحي شغله كيف وكيف طريقة قراءة الباترون بيش يحس اللي بيشارك انه دار حاجة

**الصابرة** · 10-16-2012, 10:32 PM

ان شاءالله حبيبتهم
اصلا اني نزلت درس ثاني فيه كيفية قراءة الرموز اللي في الباترون
وبعد يسجلنهن عندهن انخشوا على المربع والدائرة لانهن يعتبرن من الاساسيات كان ماعرفنهنش فكل حاجة بتصبح صعبة عندهن
ومشكورة حبيبتهم على وقفة معاي والمتابعة اول باول

**luba** · 10-17-2012, 02:02 AM

ههههههههههههههههههههه

قوية اللقطة سلمها يارب وسلم هالبنوته الحلوة ربي يحفظها من كل شر

ماشاء الله عليها وطمعوها في الشوز شكله بديره لي بنتها

ماضارش داراته لي روحها ههههه دايرتيه ليك هكي كبر رجلك مش منك من ايكال الكيكات

قداش المقاس اكيد يعطي في 44 ربي يعين الراجل علي تدوير الكنادر

واني نقول عليش توصي في حاجتها من الهند للعرس المقاس مش طبيعي ههههه

البنية اللي لابسه الكندرة هادي تعطيها مني بوسه خفيفة علي خدها وبعدين نتشه في يدها وبعدين بوسه قوية

علي خدها التاني هههههههه فهمتي الدرس والا نعاود

والله كان نلقاها الا مانلبسها وتبقي عندي احلي دكري
اسمعي بنقولك علي حاجة مهمه لما درت كيفك ماهو اني درت فردتين
الاولي فكيتها شينه هيا اللي فيها تعلمت العمدان
انه الغرز عندك مرخيات
يعني الفتحات بينهم كبيرة يعني راخيه ايديك هلبه وتطلعي بالخيط والابرة فوق نشبح فيهم اطوال العمدان قريب ايميلوا
جربي انك ماتكريش هلبه لي فوق وانت اطلعي في الغرزة من العين بالابرة
الاول هكي صارله وبعدين خليته ممسوك ومستف فهمتي عليا والا شنو زعمه ؟؟؟؟

منورة المفرش يهبل كيف درتيه يعطيك السلامة عجبتني تفصيلته تعرفي ينفع انك تحطي عليه
اكوابك علي سفرة الاكل اسمعي
المفرش اللي انت دايرتيه لو اديريه بسلك حبيبتهم يطلع حلو المفارش يبوا اسلاك رقيقة
لقيت منهم لكن المشكلة كلهم كركوبتهم كبيرة هلبه هلبه
منورة هلبه وواااااجد هكي الحماس والا بلالالالاش
صبورة خودي راحتك عارفاتك شارقة هاليومين ربي يعينك
صحيتي حبيبتهم بارك الله فيك زمان وتوه وسامحينا علي تعبك
ااني تعلمت اول خطوات الكروشيه منها ماشاءالله عليها

**المصراتيه** · 10-17-2012, 12:53 PM

لوبا هههههههه ضحكتيني عطك الهني
هدا رقمه 33 ههههه يجي علي دب وليدك
وصلن البوسات والنتشه تسلمي يا حلو علي احلي بوسه
وشكرا باهي عجبك المفرش خلاص معناها في مني شويت امل والي الامام

صبوره بالعكس رانا قاعدين امتابعين معاك غير البدايه ديما طهقه نبو نديرو حاجه كبيره مش دروحنا شاطرين ونرقو في معناوياتنا بس

حبيبتهم ماشاءالله حتي كان مش انتي امدايرتيه المهم امدايره زيه ربي يحفظلك يدياتك

**luba** · 10-17-2012, 12:56 PM

صبورة ماتبديناش في المربع والدائرة لين تكملي شرح كل الغرز علي خاطر في بنات زي لوتي وغيرها يعرفوا اللي شرحتيه هداوممكن يدخلوامعانا في باقي الغرز وياريت تعطينا بالغرزتين علي خاطر الحقوا علي عالم الكروشيه وبعد الغرز نبوا باترونات بالمربع والدائرة وهكي ممكن بعض البنات يغيروا في غرزتهم بالغرزة الجديدة عليهم من اللي اعطيتيه وحتي احني مانبوش عملنا يقتصر علي العمود والحشوةلاني شفت اوشحة وقبعات نسائية تبي غرزة الفيشارة والعمود الاماميه والخلفية رجاءاوليس امرا ان تكملي كل الغرز قبل وكل يوم اتنين وربي يعطيك الصحة ومافي بالك

**المصراتيه** · 10-17-2012, 01:19 PM

ايوه صبوره
حتي اني نقولك كيف كلام لوبا كان تكملينا الغرز احسن وبعدين تعطينا الباقي لان

وشنو يا لوبا غرزه الفيشاره والاماميه والخلفيه اشيه نحسابه هدا حدا اني هههههه العمود والسلسله والمنزله وو وخلاص
معناها كل يوم درسين ويادوب انلحقو
صبوره ان شاءالله مافيش اي ازعاج وانتي اللي تفهمي اكتر

الموضوع: اشغال واستفسارات المشاركات بدورة الكروشيه

أدوات الموضوع

عرض

معلومات الموضوع

الأعضاء الذين يشاهدون هذا الموضوع

المفضلات

المفضلات

ضوابط المشاركة