اشغال واستفسارات المشاركات بدورة الكروشيه

[المصراتيه]

ايوه صبوره
حتي اني نقولك كيف كلام لوبا كان تكملينا الغرز احسن وبعدين تعطينا الباقي لان

وشنو يا لوبا غرزه الفيشاره والاماميه والخلفيه اشيه نحسابه هدا حدا اني هههههه العمود والسلسله والمنزله وو وخلاص
معناها كل يوم درسين ويادوب انلحقو
صبوره ان شاءالله مافيش اي ازعاج وانتي اللي تفهمي اكتر

[حبيبتهم]

الصابرة ربي يوفقك وتعلمينا احلى شغل

لوبا عرز الكروشيه مش شوية بيش تبي تتعلميهن كلهن
ولكن هلبه غرز تلقيهن يعتمن على فكرة تشبه فكرة غرزة البريد



انيي نحاول الايام الجاية ناخد الادوات ونتبع معاكم الشغل ههههه حي كان نطلع ناسية كيف انشد الابرة هههه

[الصابرة]

ماشاءالله عليك حبيبتهم ربي يوفقك يارب
ولا ماتخافيش مجرد ماتمسك ايدك الابرة تفتكري كل شئ

لوبا / المصراتية
حاضر اني تحت امركم المهم انكن التعلمن ماهو انتن حيرتني لقيتكن مستعجلا

مع ان فكرتي تتعلمن الغرز ونشتغل حاجة معينة مثلا لنوضيح كلامي
اللي في الصورة غرزة البريد الامامية والخلفية لما نبي نشرحها لكم كنت بندير بيها مساكة اواني كمثال
منها تتعلمن الغرز ومنها تشتغلن شئ هذا اقتراحاي وشوفن رايكن



بما اني ماعنديش غير لوبا والمصراتية يتعلمن وحبيبتهم للمساعدة فانتظر رايكن على فكرة شرحي
واذا تريدن ان اشرح الغرز في الاول وبعدين الشغل ماعنديش مشكلة

[luba]

اسمعي صبورة نبوا زي ماقلتي كل الغرز
وكل ماتعطينا غرزة انت اديرينا شغل منك بايدياتك
او من النت لو حبيتي ومش فاضيه
وكل غرزة وتطبيقها وشرحها مانبوش باترونات
ومربعات لين نكملوا الغرزات
لو ما تعلمت كل الغرز اللي في الجدول
شن فايدت دخولي للدورة

[الصابرة]

خلاص لوبا اصلا هذا المفروض يصير
بيش تضربن عصفورين بحجر واحد

نستنى المصراتية بلكي عندها وجهة نظر

[المصراتيه]

زين الكلام
اني هكي مدا بيا
وكل شي تعطيهنا انطبقوه ونورهلك
وبلاش استعجال يالوبا معاش تخليني نجري نعايب فيك هههههههههه

[ام ميرال]

هلا بالغاليات
المصراتيه ولوبا ماشااااااااااااااااااااااااااااااااااء الله عليكم
شغلكم روووووعه وحماسكم وتنافسكم اروع
ربي يعطيكن الصحه
والله قريت الردود وضحكت من قلبي خاصة ع شخشير المصراتيه(اللي بنعتبروه شخشير رغم انف الكروشيه) بدايه خطيرة ردي بالك يا لوبا راهي منافسه قويه
تمنيت ان باقي البنات اللي بيشاركن يبدن معاكن فعلا حتى يزيد التفاعل والجو
بس ان شاء الله لما صبورة توصل في المربع والدائرة حنبدا معاكن من باب التشجيع
وربي يعطيها الصحه هي وحبيبتهم ع مجهودهن الرائع وعجبني اقتراح حبيبتهم متاع كل غرزة ااتعلموها اتديرو بيهاحاجه (شغل) منها ترسخ ومنها تحسي بقيمة اللي تعلمتيه
لوبا ميمي استمرن في حلقات المسلسل انا من المتابعين والمشجعين

[المصراتيه]

ام ميرو
بارك الله فيك علي كلامك الحلو وتشجيعك
وردي بالك تفوت عليك حلقه رانك معاش تفهمي باقي المسلسل ههه فلهدا خليك معانا
اها عجبك الشخشير هههههههههه والله وحده ابتهبل تبي تتعلم بالسيف
تسلمي يا حلوه

[منار]

أختى الصابرة متابعة معاكم أعتبرينى إحدى طالباتك متحمسة جدا ونشجع رأى لوبا على تطبيق كل غرزة من شغل من إيديك

نبى نغلب لوبا والمصراتية المنافسة قوية إن شاء الله ربى يفتح عليهم أدعولى تنحل مشكلة جهازى موفقين باءذن الله

[الصابرة]

اذا متفقين المصراتية

ام ميرال اسعدني وجودك ومتابعتك

منار ان شاءالله تنحل مشكلة جهازك
وامتى ماتنحل نزلي شغلك حبيبة ولا يهمك
انعدك طالبة صايرتلها ظروف ومش حتضر وبعد ماتحضر اتجيب في واجباتها كلهن مع بعض
هههه رديتكم للمدرسة