السلام عليكم
كيف حالكن يا خواتي إن شاء الله تكونوا جميعا بخير.....والله ليكم ولهذا المنتدي الرائع وحشه كبـــــــــــــيرة جدا ....وسامحوني علي تقصيري بعدم الدخول والمشاركة لفترات طويلة لكـــــــن والله لا أخفي عنكم اني كنت مشغولة بالدراسة والإمتحانات ...خاصة هذا العام كان عام مضغوط علينا منهج مرصوص وقراية في الصيف كله بيش يعوضونا بالعام يلي فات عليناالمهم سامحوني طولت عليكم .....اليوم جايبتلكم نوع جديد من العسلة إسمها
(دبلة لسان العصفور)
نبدوا بالمقادير:
3 أكواب دقيق
نص كوب زبدة
نص كوب ماء زهر
رشة ملح
ملعقة فانيليا
ماء بارد على حسب العجن
وعسل بيش تتعسل
الطريقة
نحط الزبدة مع الدقيق بعد ما رشة الملح ونحلطهم مع بعض ...يعني كأنك تبسسي فيهم مش عارفة وصلت او لا وللتسهيل إستخدمي المبشرة
بعدها نضيف ماء الزهر والفانيليا ونعجنهم بالماء البارد لحد ما تكون عندي كورة بهذا الشكل
توا نقسموها كور صغيرات بحجم البيضة ونخلوها ترتاح لمدة نصف ساعة تقريبا
المقدار هذا لو بتستخدمي الكوب الكبير يديرلك 12 كورة تقريباالمهم بعدين نفرد كل كورة علي حدا بعد ما ترتاح بالنشا لو ما عندك نشا تقدري
مريها بالدقيق بس النشا يخليها مقرمشة أكثر
بعد ما تنفرد كويس بالنشابة لين تولي رقيقة زين ناخد نحطوها علي طاوة ساخنة لعدة ثواني (انا إستخدمت طجين البيتزا الكهربائي)ديري بالك انها ما
تيبسش منك أو يتغير لونها
كل ما تنضج حبة نغطيها كويس و نضيف عليها الحبة الي بعدها و هكدابعدين نلفها بدون ما نضغط علي اللفة يعني ارخي يدك وإنتي تلفي
وبعدين بسكين حادة تقصيها بشكل مائل ...كما في الصورة
وبعدين نقليها في زيت ساخن وعزير ...ونخرجها من الزيت الي العسل
وهذا هو الشكــــــــــــــل النهائي لها...تكون مرشوشة بلوز مرحي او سمس
وبالهناء والصحة
نتمني إنكم تجربوها يا بنات وتقولولي رايكم فيها وشكرا شكرا جزيلا لأنكم حليتولي مشكلة الصور
المفضلات