[ سلاطة شهية ] من مطبخ للاهم

[للاهم]

خير يا بنات كلكن
هي السلاطة حاجة عادية ومن اللي ما يعرف يدير سلاطة
بس تحتاج يكون شكلها منظم ومشهي
وطعمتها شهية
مش هي مفتتح الاكل؟
مش نحدروا بيها وجبة الغداء او العشاء؟
ونوازنو بيها حصتنا الغذائة اليومية اللي يحتاجها الجسم؟
ومش هي( بلّ الالب) = بلل القلب باللهجة الشامية علي راي جدة امي
مهمة السلاطة + السلطة بالنسبة لي
ومن احسن ما نتقن في مطبخي اعداد السلاطات باشكالها
وتزيينها
زمان قبل اغترابي خذيت فيها شوط كبير من التعلم والتجريب وتوجت بيها بوفيهات حفلاتنا العائلية ومناسبات الاصدقاء
ومع الوقت توا ننزل انواع اخرى اكثر شغل وتصوير
المهم سلاطة اليوم عادية
خس وطماطم وخيار وبصل احمر وكسبر مقرض و زيتون اسود
زيت زيتون وملح وخل وليمون وسماق ونعناع يابس محكوك
نقرض الخس متوسط ونخلطه بنص كمية الكسبر المقرض ونفرشه في الصحن
نقرض الطماطم شرائح رفيعة ونفرشها فوق الخس
نقرض الخيار شرائح رفيعة ونرتبه فوق الطماطم
ونقرض البصل شرائح رفيعة ونفركه بالملح وشوية من السماق والنعناع
ونزين بحبات الزيتزن الاسود المكرمش ( من قطفي وصنع ايديا)
بعدين نرش الملح والخل والليمون على الصحن بتوزيع عادل حول الصحن وحسب الذوق
انا نحب الخل والليمون زايدين
ونحب الزيت واجد بس توا نخفف فيه لظروف صحية
ونرش النعناع والسماق على وجه السلاطة
ونصب الزيت بالدور داير

مرات - مش في هالمرة اللي صورتها - نفتح حكة سردينة او سمك مدخن وشوية كبّار ونحطهن مع السلاطة
مش عادية
صحية
مشبعة
وزهو للناظرين

صحتين مقدما

[أمـ ساره]

ماشاء الله لاقوة الا بالله

سليطة تهبل للاهم

سلمت ايدياتك وبالهني يارب

[طمطم]

ماشاء الله ... تسيّل اللعاب وخاصة الزيتون المكرمش ..يجنن ... أعطيني شوية للاهم... اني راهو مجنونة زيتون (نقولوله غامي) وكل أقاربنا يعرفوني... ليا حصة في فازو كل جيرانا....

زيدينا بالله سلطات
يسلمو يدياتك

على فكرة... طريقة تصويرك فنية ...مش عادية

[للاهم]

تسلمي ام سارة مشكورة خيتي

[للاهم]

طمطم وان اكثر هبال منك - نموت فيه
لو ريتيني وانا مدرسة سيارتي ونازلة نلم فيه من تحت شجر الزيتون اللي يزينوا بيه في الشوارع هنا ويخلوه يطيح محد يلمه
حرام النعمة
ماخليتها تمشي بلاش
جبت شكايري
وما عدلت علي حد جيت انا وصاحبتي (ل ي )اللي دارت السمان المشوي شوفيه في قسم الاطباق العربية
المهم لمينا واجد نين انقصمن ضهورنا ونحنا فاطسات علي روحنا من الضحك نقولوا اكيد اللي هالبين يبحتوا فينا حتى ان واحد كاوبوي جانا وقاللنا وروني كيف يندار
قلناله مغير راجي
كيف نبو نشرحولك توا
طير
وزيادة كاميرة البنك اللي في حديقته الزيتون تصور فينا
على الله ما ينسرق ويجيبونا من ياقاتنا ونطلعو ف النشرة
المهم كيف ما تعرفي رقدته ف الملح وما طولش لأنه هبرته واجدة وطايب عالاخر مفيهش مرورة واجد
وغسلته وولمعته بالزيت وشوية خل تحسبا للبكتيريا لو فيه هكي واللاهكي
وحطيته فازوات ووزعته عالاصحاب والاحباب
ولك فازو افتراضي وين ما كنتي

[زينب محمد]

ماشاء الله لا قوة إلا بالله

سلطة في منتهى الروعة

تستاهل التقييم

الله يسلم ايديك و عينيك و يديم عليك صحتك و عافيتك حبيبتي

صحتين و هناء على قلوبكم

ننتظر منك مزيدا من المشاركات و الموضوعات و التطبيقات

و لحفظ حقوقك اكتبي اسمك على الصور حبيبتي

دمت في حفظ الرحمن

[أم أيوب]

تسلم ايديك للاهم

مكوناتها بسيطة ومنظرها مرتب وحلو

[فضااوي]

سلطة روووووعه واجي في الخاطر

تسلم الايااادي يالغلا

[ليبيا قلبى]

اممممممممم
تسلم ايدك

[ام اسر]

تسلم ايدك يارب
ةماشاء الله الصوره طالعه اتهبل فنانه تسلمي يارب