[طلب] طريقة الجيلاطي (الآيس كريم) الحار

[سعيدة]

السلام عليكم

اخياتي والله خاطري نعرف طريقة الجيلاطي الحار ذقته عند اصاحب العيلة ومن يومها خاطري نعرفه وما خليت ما درت ...


بالله عليكم اللي تعرف تنزله حلوو هلبة


وصحيتو

[sweet nona]

وعليكم السلام ورحمة الله وبركاته

سعيدة اهلا بيك

انى الحق اول مرة سمعته منك كيف جيلاطى حار يعنى طعمته ولا شكله ولا كيف ههه

تو بالك اتجى وحدة من البنات اتفيدك باش نستفادو معاك

[الصابرة]

اهلين اختي
طريقته اللي اندير فيها

تاخذي صدر دجاج مفروم / بصلة مفرومة ناعم جدا وعصور من الماء / ثوم فص او يمكنك الاستغناء عنه
بهارات ( فلفل اكحل / حرارات /رشة زعتر / ملح )
ثم نخلطهن مع بعض ثم نحاول تشكيله مثل بسكويت الايس كريم
بأن نأخذ كورة من الخليط ونبدا نسحب فيه لتشكل راس القمع
ثم نغطسها في بيض ثم خبز مرحي
ونقلي في زيت حامي
ثم نكون مجهزين فستق مرحي ناعم وجبن سائل ( مثل اللي يجي في فازو )
نخليه يبرد قليلا ثم نغطس الرأس في الجبن ثم الفستق
ونحاول ان نرتبه واقف بعد غطسه في الجبن بحيث تسيل قليلا

اتمنى ان يكون ماسئلتي عنه ولكن هذا اللي اندير فيه
واني جاهزة لاي سؤال

[sweet nona]

طبعا من كتر ماشدنى الاسم ياسعيدة

بحتت عليه فى القوقل وبعد بحت طويل شويا

لقيتله صورة بس مابتش تطلع توا

المهم القيت صورة بس مش طريقة

وتوا بعد قريت طريقة الصابرة اكتملت عندى الصورة

وانقولك انه هالطريقة صح 100% وحتى انى حنجربه ان شاءالله

ومشكوورة صبورة ياكنز انتى

[رميساء]

السلام عليكم

أختي إسمه آيس كريم موجود في ركن المقبلات والسلطات والشوريات والمشروبات الليبية صفحة رقم 5 من weam 2011. اولا ناخد صدر دجاج مخلي العظم وبصلة ونضعهم في محضرة الطعام وسنة ثوم ورشة فلفل اسود ونفرمهم وبعدها نضع الخليط في صحن ونضيف عليه الملح ونضعه في الفريز لمدة نصف ساعة اذا تحبي تعملي حشوة فهي بطاطا مسلوقة ومهروسة مع شوية ملح وزبدة اختياري الحشوة انا اعملها بلا حشوة وبعد ما انطلعها من الفريز نبدا في التشكيل باليد وساااااااااااااااهلة جدا وهي ناخد شوية من الحشوة في راحة اليدونطرحها وناخد شوية من البطاطا ونحطها بشكل طوليماتكتريش ونلف اللحم ونغلق يدي على شكل ايسكرم ومن الأسفل الى الأعلى ونعرض من فوق جهة اصبعي الأبهام وبعد التشكيل نضعها في الفريز مرة اخرى حتى تتماسك ونقدر نلفها في الدقيق والبيض والبقسماط ونقليها وبعد القلي ناخد جبنة الكاسات ومكسرات مجروشة ومن فوق تغمس في الجبنة والمكسرات وتأكل بالهناء والشفاء........مع تحيات أم وئام ملاحظة:أنا مجربته الايس كريم الحار وممكن تستعملي بدل الفستق نعناع جاف أو معدنوس مفروم والسلام عليكم رميساء

[الصابرة]

اختي سعيدة
وهذه طريقة اخرى فيها حشو من الاخت ماجن

http://www.libyan-kitchen.com/kitche...4-%E3%C7%CC%E4

[سعيدة]

السلام عليكم

صحيتو اخيتي

والله نفس اللي ذقته بالضبظ

ندعيلكم من قلبي