[ بريوش ] من مطبخ حبيبتهم

**حبيبتهم** · 11-03-2012, 11:11 PM

السلام عليكم

اليوم جايبتلكم بريوش
العجينة اني درتها من راسي حسب تقنية عجينة البريوش مع اضافة الزبادي مني اني
وطلع خفيف وهش مش عادي

العجينة

5 اكوب دقيق
كوب سكر
ملعقة كبيرة ونصف خميرة فورية
فانيليا
كوب زبادي (120 مل )
بيضة واحدة كبيرة
نصف كوب زبدة بحرارة الغرفة مقطع الى مكعبات
حليب مكثف دافئ للعجن تقريبا كوب كامل

الطريقة

نخلط المواد الجافة مع بعض

نضيف الزبادي والبيضة ونخلط جيدا

نضيف الحليب بالتدريج لوين نتحصل على عجينة متماسكة ومتوسطة الليونة وتعجن حتى تصبح ناعمة

نضيف مكعبات الزبدة بالتدريج مع العجن المستمر حتى نحصل على عجينة ناعمة جدا

وطرية لو حسيتي العجينة مازال لينة هلبة ضيفي قليل من الدقيق

تترك لتختمر (تحتاج فترة طويلة للتخمير )

بعد التخمير هذا شكلها

هذي الفاكهة المجففة والزبيب للحشو

بعد ماتختمر العجينة نضغط عليها باليد ليخرج منها الهواء ونبدا في تشكيلها حسب الرغبة

اني شكلتها كيف الصور

قطعت العجينة الى كرات صغيرة وفتحت كل كرة باليد مثل الصورة ورشيت عليها فاكهة مجففة وزبيب

ثم سكرتها على بعضها وبرمتها طويلة

ثم لفيتها على بعضها (مثل لفة الصنوبرة عذرا مافيش صورة للخطوة هذي ) توا تشوفوا الشكل في الصور الاخرى

رشيتها بسكرو وخليتها تختمر مرة ثانية

ثم ذوبت حليب بودرة مع قليل من الماء حتى يكون ثقيل مثل الصورة

ودهنتها بيه ورشيت عليها سكر مرة اخرى ( الاحجام مش متساوية لان ولدي هبلني في الشغل يبي ايدير معاي وقعد ايحط في الزبيب عالعجينة من فوق ) واني كثرت السكر فوقها نحبه يكون هلبه

وتخبز في الفرن في الرف الاوسط على حرارة 180 وتحمر من الاعلى

وهذا الشكل الاخير

وهذي جهة مافيهاش سكر هلبه

هذي صور جديدة باقي العجينة دسيته في الثلاجة وثاني يوم طلعته من الثلاجة واشتغلت بيه مباشرة

فردت العجينة برشة دقيق على شكل مستطيل ورشيت عليها زبيب وفاكهة مجففة
ولفيتها من الجهة القصيرة مثل السويس رول وقطعتها شرائح بسمك سنتيمتر تقريبا

وخليتها تختمر وبعدها دهنتها ببيض مخفوق مع حليب وعالفرن

وتحياتي

وان شاء الله يعجبكم

**المصراتيه** · 11-03-2012, 11:40 PM

هدا الطرف ليا
ماشاءالله لا قوه الا بالله
بريوش مش عادي منظر وشكله حلو
فكرت الزبادي في العجينه عجبتني
خصوصا مع طويسه شاهي في العشيه
يعطيك الصحه وتسلم يدياتك
وعجبني برواز الصور
تستاهلي احلي تقييييييم

**رميساء** · 11-03-2012, 11:52 PM

السلام عليكم
ما شاء الله
مشكورة علي الشرح والصور
جاري التقييم

**مغتربة 7** · 11-04-2012, 12:50 AM

اشيه ماشاء الله على الابتكار
واضح من الصورة ان العجينة ريشة
بريوش ياااااااااااااااخد العقل حبيبة
تسلم الايادي الى تلتف بالحرير
الى التقييييييييييييييم طول
جاري التطبيق

**الصابرة** · 11-04-2012, 02:51 AM

ماشاءالله حبيبتهم
بريوش يهبل
سلم دياتك وشكل العجينة خفيفة وهشة
وجاري التطبيق ان شاءالله
وليك احلى نجمات كان مشو

**luba** · 11-04-2012, 03:22 AM

ماشاء الله تسلم الايادي
رووووووووووووعه وشكلها خفيفة وظريفه
وسلم اللي يعاون فيك عطيه مني نتشات وبوسات
تم التقييم ليك وللموضوع

**حبيبتهم** · 11-04-2012, 04:27 PM

اهلا بكن اخواتي الغاليات وتسلمن عالمرور
ويا لوبا اللي يعاون فيا بيهبل عالعجينة غير جيبي سيرتها بحداه
امس درت طرفين علي شكل ظفيرة تلفتت نولع الفرن لقيته امعجنهن بيده ومغير شكلهن ويحط عليهن في الزبيب ويقول حلو يا ماما

**دانية** · 11-04-2012, 05:16 PM

ربي يسلملك اوليدك ويفرحك بيه يارب .... ايجنن البريوش اشقر لونه عجبني .. وهاذي نبي انعصر بيها انا واعويلتي

**نسمه ليبيه** · 11-04-2012, 05:39 PM

الله يهبل المره الجايه ديري حسابى فى بريوشايه بالنيوتيلا نموت فيها

**حبيبتهم** · 11-05-2012, 07:19 PM

السلام عليكم

اهلين بيكن يا غاليات وتسلمولي عالردود الحلوة

هذي صور جديدة باقي العجينة دسيته في الثلاجة وثاني يوم طلعته من الثلاجة واشتغلت بيه مباشرة

فردت العجينة برشة دقيق على شكل مستطيل ورشيت عليها زبيب وفاكهة مجففة
ولفيتها من الجهة القصيرة مثل السويس رول وقطعتها شرائح بسمك سنتيمتر تقريبا

وخليتها تختمر وبعدها دهنتها ببيض مخفوق مع حليب وعالفرن

وتحياتي

الموضوع: [ بريوش ] من مطبخ حبيبتهم

أدوات الموضوع

عرض

[ بريوش ] من مطبخ حبيبتهم

معلومات الموضوع

الأعضاء الذين يشاهدون هذا الموضوع

المفضلات

المفضلات

ضوابط المشاركة