[ مشاركة في مسابقة أطباقنا في عيد الأضحى] العصبان من مطبخ لوبا

[luba]

السلام عليكم ورحمة الله

العصبــــــــــــــان








تنظيف الكرشة ( البطن ) والمصارين ( الامعاء )

خرط بالسكين و غسل بالصابون التايد والماء ومن تم الليم والخل والملح

ومن تم بالماء جيدا ونفصل البطن باعواد سل النخيل او اعواد الاسنان








الحشو :

2 بصله متوسطه مفرومه ناعم - 3 حبات طماطم اخضر مقطعه مربعات ونهرسها باليد
مع البصل

بطاطا مقطعه مكعبات حجم متوسط - كوب ارز مصري مغسول كويس

لحم وكبدة وقلب ورية وشحم من الرداء اللي تلف علي البطن والامعاء

مقطعه مكعبات صغيرة - كسبر مفروم مخلط بشوية معدنوس


2 ملعقة كبيرة هلبه طماطم حكه - ملعقة كبيرة فلفل احمر بودرة

ملعقة صغيرة بزار - ملعقة كبيرة ملح - ملعقة ونصف كبيرة نعناع مرحي

نصف ملعقة صغيرة فلفل اسود

نصف ملعقة كبيرة بهارات مشكله و

ملعقتين كبار كسبر مرحي لو مش متوفر عندك الاخضر


اكتر من نصف كوب زيت زيتون ونصب وخلاص ماعندي مقدار

هو كله ماعندي مقدار غير شديهلكم ليكم واني نعصر في راسي في المقادير







تم نضيف الاعشاب المتوفرة عندك بس اني افضل العصبان بالكسبر فقط







ونخلط كويس وتشوفي لو محتاج زيادة طماطم حكه او ملح
او زيت






نبدي بحشي البطن والمصارين

ونغلقهم بالسل او الخياطة او اعواد الاسنان

هنا استعملت السل اللي حضرهلي والدي ربي يمد في عمره بالصحة وجبتهم معاي







وبهدي الطريقة نحشي المصارين الرقيقه بالقمع وانت تحشي تحطي عنق القمع
وهو داخل فيه المصران بين داخل اضابعك زي مايمسكوا بعض الناس فس كاسات العصير بيش
مايهرب المصران وانت تضغطي






بعد نتم الحشي ويكون الكل مش معبي كويس
حتي الكرشه مانحبها يكون حجمها كبير ومعبية لين تبزع منها الحشو واني ناكلها

( ندير فيهم هرود صغيرة بالسله ) الكل البطن والمصارين






نحط الكرشه في مية سخونه علي النار فيها

طماطم حكة وزيت وملح وبزار وفلفل احمر بودرة






ونحط المصارين في الكسكاس فوق الطنجرة ونغطيهم
ونخليهم حوالي الساعه




بعد طاب نحطهم في سفرة حتي يبردوا

ومانحولش السل لين تبرد الكرشة شوية عشان ماتفتح معاك






وحطيت في مرقة الكرشة ( الطبيخة ) مكرونه وجت مكرونه جارية بالعصبان

وهيا تفضلوا وكل عام وانتن بخير

[دانية]

ماشاء الله شنو هالأبداع في الشرح والعرض واكيدة في الطعم .. مش عارفة عندي احساس انه حــــــــــــــــــــــار ... اممممممم ياسلام

[om_adnan]

وعليك السلام لوبا...ماشاء الله,غير المرقه بروحها اتسهف,فعلا ماقصرتى فى الشرح,سلم إيديك,صحتين وعافيه.

[نسمه ليبيه]

سلم ايدياتك كل وحده لها لمساتها الخاصه فى العصبان مية هنا

[بنت حواء]

سلمها يارب مكترة الصواني وحاسبتنا وأنا خذيت حصتي
ماشااااااااااء الله عصبان يجننننننننن والشرح وافي عيشتينا في الجو
قريب مديت يدي وبديت نخيط هههههههههه
سلم يدياتك يالوبا وصحة وهنا على قلوبكم
ولك أحلى نجووووووووووم

[luba]

دندونه اهلين بيك نورتي العصبان حار بس المكرونه مش حارة وديرتها كلها علي خاطر الصغار


ام عدنان ربي يسلمك علي المرور نور موضوعي

نسومه صح كلامك والمرة الجاية بنجرب لمسات البنات ان شاء الله
الا في القرفه مش حنجرب هههه منحبوهاش
الا في المسقي بس و نورتي يا قلبي


بنوته منورة بتعليقك السمح بارك الله فيك علي التقييم
صحة ماخديتي والمرة الجاية اناديك اتمدي ايدك معاي
ربي يناولك مافي بالك يارب

[أمـ ساره]

شنو هالرعايش يا لوبا خيرك عليا يا بنت

ماشاء الله لاقوة الا بالله

عصبان ايهبل ويجي في الخاطر والله

وخاصة المصارين الرقيقة مش عادية نحبها

أما الكرشة يقسموها البنات بالهني عليهم

ربي يبارك فيك وفي وقتك وجهدك ويعطيك ما تتمني

منظره ينادي تعالوا كولوني

تستاهلي التقيييم والنجوووووم كلهم

[الصابرة]

الله الله عصبان يسهف
وخصوصا الكرشة مع اني ماناكلش فيها
شكلها يهبل ومقطعتيها تقول بمسطرة
ماشاءالله تبارك الرحمن
صحيحة على من كلاه
ربي يبارك في طعامكم
احلى نجوووووووووووووم لو مشو

[حبيبتهم]

ماشاء الله عصبان روعة تسلم ايديك وربي يعطيك الصحة
نفس طريقتي تماما
وحصلت منك فكرة شنو اندير لولدي لما اندير عصبان لان هو مايحباش
وربي يخليك الوالد ويطول في عمره
تم التقييم

[رميساء]

السلام عليكم
عيدك مبارك
ماشاءالله عليك يالوبا
بالهناء والعافية عليكم العصبان
مشكورة جاري التقييم