[ فتات ] من مطبخ حبيبتهم

[حبيبتهم]

السلام عليكم

اليوم جايبتلكم طريقتنا في الفتات اكيد الاغلب بتكون غريبة عليهم الطريقة
ولكن الطعم مش عادية
افكرة في طريقتنا للفتات انك بتجهزي مكرونة امبكبكة وتكون المكرونة اسباقيتي ورقيقة رقم (1) وجارية
وتقطعي الفطيرة الى قطع صغيرة وبعدها اتديري لها دهان من الطبيخة وسمن وقرفة وتحركيها

وهذي الطريقة

بتجهزي فطيرة لاستعمالها للفتات
اني مش امصورة طريقة الفطيرة ولكن هي الطريقة العادية
اللي بتعجني عجينة متكونة من دقيق وملح وماء وبتقطعيها الى كرات صغيرة ثم تخليها ترتاح
وبعدها تلصقي كل كرتين بخليطم من الدقيق وزيت الزيتون وتخليها ترتاح وبعدها تفرديها رقيقة واتطيبيها عالنار

طريقة الفتات
اولا الطبيخة

بصلة متوسطة مقطعة مكعبات صغيرة
زيت وتكون الكمية اكثر من المعتاد استعماله بشوية لانه نبوا الدهان متاع الطبيخة بعدين للفطيرة
ملح فلفل احمر بزار وحرارات ومعجون طماطم
لحم قطع حسب العدد

نقطع البصل ونحطه مع الزيت في طنجرة ونخليه يذبل
ثم نضيف عليه الملح والفلفل وابزار والحرارات والطماطم







بعدها انضيف اللحم ونقلب





نضيف ماء ونخلي اللحم الى ان ينضج



هذي المكرونة اللي استعملتها سبيقة رقم 1 اسباقيتي






هذي الفطيرة قطعتها الى قطع صغيرة






وبعدها ناخد دهان من الطبيخة ونحط له سمن وطني






نرش الفطيرة بالقرفة ونرشها بالدهان مع السمن





نقشر بطاطا ونقطعها بالطول الى قطعتين
ونحطها في المرقة ونخليها اتطيب

بعدها انطلع اللحم والبطاطا من الطنجرة ونحط المكرونة بعد تكسيرها ونخليها اتطيب وتكون جارية ومش ملتصقة في بعضها


في الاخير
نضع طبقة من الفطيرة في صحن التقديم وطبقة مكرونة





ثم طبقة ثانية من الفطيرة وطبقة مكرونة






وبعدها انحط اللحم والبطاطا عالوجه ونرش عليها شوية دهان وقرفة





ونسيت البيضة في الاخير تفكرتها
البيضة تكون مسلوقة ومقشرة ونغطسها في الدهان






وهذي طريقتنا وياربي تعجبكم

[أم ميوسة]

ما شاء الله فتات يأخذ العقل

والطريقة بالمكرونة جديدة اول مرة نسمع بيها

حبيبتهم الطريقة هادي من وين ؟؟

موضوع يستحق التقييم ووالنجيمات

تسلم ايدياتك حبيببة

[luba]

ماشاء الله طالع من ايديك يهبل شوفتيني فيها
تو بنديرها وطبعا زي طريقتك الا القرفه مش معانا ههههه
دكرتيني بطبق امي الغالية في عاشوراء ربي يحفظها
وربي يعطيك الصحه
وهدي الطريقه يا ام ميوسه لمدينه
مابين الخمس ومصراته ههههه فضحنا حبيبتهم
تم التقييم وجاري التطبيق لاعادة الذكريات الحلووووووة

[الصابرة]

ماشاءالله
فكرة حلوة وشكل طعمتها لذلذ
وعمري ماسمعت بها رغم اني من الغرب وعشت عمري في الشرق
لكن اول مرة تمر عليا
سلم دياتك
لك تقييمي

[أمـ ساره]

ماشاء الله حبيبتهم فتات يجي في الخاطر

وطريقة زي ما قلتي أول مرة نسمع بيها

مشكورة علىها حبيبة

بالهني والعافية على قلوبكم

وتستاهلي كل النجوووووم

[ترهونيه حره]

تسلم الايادى وأول مره نسمع بيها

[همسة حنان]

الحق ياربي طريقة جديدة عليا واول مرة نشبحها تسلم ايديك اختي

[حبيبتهم]

ام ميوسة
اهلين بك وكيف ماقالتلك لوبا عالمكان لكن مش كل الناس ايديروا فيه يمكن جهة معينة فيها بس


لوبا
اهلا بك نورتي يا غالية وربي يسلملك امك ويحفظها
ونراجي في الفتات اللي بتديريه اكيد بيطلع ايهبل من تحت ايديك الحلوة


الصابرة وام سارة وترهونية حرة وهمسة حنان
اهلا بكن وتسلمن على مروركن وتعيشن وتشوفن ان شاء الله

[نسمه ليبيه]

ماشاء الله هذا طبق 4فى 1
فطيره وطبيخه ومكرونه وبيضه مسلوقه

يسلموا ايديك وصحتين

[بنت حواء]

ماشاااااااااء الله فتات يشهههههي
حتى أنا أول مرة نسمع بالمكرونة جاري التجريب ان شاء الله
سلم يديك ياحبيبتنا وصحة وهنا على قلبك
ولك أحلى نجووووووووووم