[بيتزا] من مطبخ ام عبسي

**ام عبسي** · 11-26-2012, 03:34 AM

السلام عليكم

كيف حالكم ان شاء الله الجميع اتكونوا بألف خير
وسامحوني ع الانقطاع المتكرر لأن العمل فارض علي هكي
جايبتلكم طريقتي في البيتزا بشكل مختلف وطيب وخاصة لمحبي الجبنة

العجينة

اي طريقة معتمدة عندك ولكن خليها متماسكة شوي علشان التشكيل
طبعا بالنسبة لعجينتي
دقيق تقريبا تلات اكواب
ملعقة ونصف كبيرة خميرة فورية
ملعقة كبيرة سكر
ملعقة صغيرة ملح
3 او4 ملاعق حليب نيدو بودرة اونصف كوب لبن (حسب المتوفر) اني عن نفسي نحب نعجنها باللبن
وكمون اسود او زعتر مطحون(اختياري)
وماء دافئ للعجن

وبعدين نحضر الصلصة(زيت ع النار ونحط فيه بصل مبشور +
ثوم مفروم+طماطم حب مبشور+نص ملعقة كبيرة طماطم معجون+كركم+ملح قليل+حراراتك اللي تحبيها )
تشويحة بسيطة وفي الاخير نحط المعدنوس المفروم ونطفي عليها

ونحضر مكونات البيتزا من فوق(جبن مبشور وافضل الانواع بالنسبة ليا جبنة الشمع الاحمر
+الموزاريلا ونبشر النوع الاول بشر رقيق والنوع الثاني بشر اكبر شوي+طماطم شرائح
+فلفل اخضرحلو شرائح في الصورة حاطة خيار لان الفلفل ماكان متوفرعلشان الصورةبس+زيتون+تن)

ونبدا في تقريص العجينة الى قرصين او تلات اقراص دائريةكبيرة وبعدين نقص
العجينة من الخارج الى الداخل بدون مانكمل القص الى الداخل (مثل قص البيتزا العادية الى متلتات)
والصورة توضح اكثر ومن ثم نحط في كل نهايةللمتلت الخارجي جبنة مثلتات
(او اي فكرة تخطر علي بالك للحشوة )واني في الصورة درت تشكيلتين
وحدةكأنك تسكري في سمبوسة يعني تلاقي الطرفين مع بعض والتانية
زي القمع يعني تسكري طرف واحد ( اني ما نعرف نشرح مزبوط لكن ان شاء الله تكون الصورة وضحت اللي انقول فيه)

وبعدين نحط مكونات البيتزا العادية الصلصة والتن والزيتون والفلفل
والطماطم وندخلها الفرن وبعد ما اطيب نحط الجبنة المبشورة وعلى طول ع الفرن الساخن اندوب الجبنة بس

وهنا لما قصيتها شفتو لوين نبي نوصل لما تقصي البيتزا يطلع
في نهاية كل طرف بيتزا متلت اوقمع محشي جبنة ومطيبها لما
تكون سااااااخنة والاحلى لما تكملي طرف البيتزا وتوصلي في
الجزء هذا

وهذي بيتزا عادية درتها في يوم تاني غرقتها بالجبنةوعجبتني وديتكن بيها هي تفضلن صحتين

وهذا لأول وحدة ترد

ودومتن في حفظ الرحمن

**luba** · 11-26-2012, 04:53 AM

ماشاء الله لاقوة الا بالله
افكار حلوة بارك الله فيك
وربي يوفقكم في عملك وبيتك ووقتك
وعجبتني واليوم كان عشاي بيتزا كمهادا عيطت
جاري التقييم اكيد

**بنت حواء** · 11-26-2012, 10:58 AM

ماشااااااااء الله ياأم عبسي بيتزا تشههههههي
تسلم يديك وصحة وهنا على قلبك
لك مني 5 نجووووووووم

**مغتربة 7** · 11-26-2012, 04:12 PM

باهي لحقت حتى اني
يميييييييييييييييييييييييي
شن ها الرعايش ياحبيبتي
بيتزا تهببببببببببببببببببببل ماشاء الله
وانواع الجبنة فيها يم يم
تسلم الايادي المبدعة
جاررررررررررررري التقيييييييييم
وربي يعينك يارب