[بورديم دجاج بس في الكوشة] من مطبخ علياء السلفية

[علياء السلفية]

السلام عليكم ورحمة الله وبركاته,,,

معروف عندنا انه البوردين يجي في حفرة في الارض , بس هدا اسهل يكون في الكوشة وطعمه حلو وصحي


المكونات :

دجاجتين كاملتين او مقطاعت يعتمد على دوقك والطاجين المتوفر عندك

(ادا كان حوافه عاليه تجي فيه الدجاجة كامله وادا كان قصير الحافه قطعي الدجاج)

ملعقه طاعم ونص ملح وطبعا عينك ميزانك, ملعقتين طعام توابل خاصه بالدجاج,

ملعقة طعام فلفل احمر, اكليل , خمس فصوص توم , ربع كوب زيت زيتون

. وادا ماعندكش توابل دجاج استعملي توابلك المفضله

وبالنسبة للرز وتتبيلته :

تحتاجي اربع الى خمس اكواب واكيد حسب حاجتك ,اربع طروف

بصل يابس, قرنين فلفل اخضر او تلاته , بازيليا , تلاته طروف طماطم

اخضر , اربع طروف بطاطا بدون تقشير وكل الخضرا قطعيها دوائر

بالعرض .ونفس التوابل الي حطيناها للدجاج نستعملوا نص الكمية

للرز والخضرا. (وحطي زبيب وعوينة ومشمش مجفف ادا تحبي)

بالنسبه للطريقة :

نبدوا بالدجاج اغسليه بالمية والليم (بدون ما تطبخيه عشان تركب عليه

التوابل كويس) خودي كل الخلطه ماعدا الزيت والتومة خلطيهم في

صونية وبعدها خودي الدجاج وادعكيه بيهم كويس وبعدها صبي زيت

الزيتون في الطاوة (المقلاة) بس ماترفعي الحرارة هلبا لان زيت الزيتون

مايتحملش الحرارة القوية وحطي الدجاج بعد تتبيله كويس بس ماتخليشي

يطلع اميته يعني تكون الحرارة كافيه انه يتحمر من برا بس تشويح فقط بدون

ما يطيب من داخل لانه حيكمل تطييب في الكوشة بس لانه بدون جلد لازم

نحمروه ونعطوه اللون المطلوب والي تحبيه .وبعد ما تكملي تحميره حطي عليه التومة .


طريقة الرز :

خودي الرز حطيله شوية زيت زيتون( وخلطي معاه الفواكه المجففة ادا

تبيها اني ماحطيتهاش ) , تبلي الخضرا كلها وبعدها ستفي البطاطا من

تحت بحيت تبطن الطاجين وبعدها حطي الرز وغطيه بالخضرا كلها وبعدها

ستفي الدجاج وصبي حوالي كباية ونص مية ويعتمد على نوع الرز صبيها

من جيهة الحاشيه متع الطاجين وبعدها غلفي بالسلفر وللكوشة طول .ياخد

ساعه ونص اكتر او اقل عشر دقيق اهم شئ اول ماتفوت ساعه افتحي وشوفي .

[نسمه ليبيه]

طريقتك عجبتنى وفكرتها جديده
بس اختى عليا اتبعى قوانين المنتدى فى انزال الموضوع عشان المشرفات مابحذفوش موضوعك
بانتظار المزيد من اطباقك

[علياء السلفية]

بارك الله فيك وخيتي على مرورك وتعلقيك الطيب , نبهتيني لاني مخالفة شئ بس مافهمتكش ياريت تقوليلي شني هو , او ادا ممكن الادارة يعدلوا الشئ المخالف !!

[رميساء]

السلام عليكم
بارك الله فيك أختي علي الشرح والصور
شرحك ممتاز بالصحة والعافية عليكم
جاري التقييم

[نسمه ليبيه]

من عيونى علياء شوفى الرابط


http://www.libyan-kitchen.com/kitche...E1%E1%ED%C8%ED

[علياء السلفية]

وفيك بارك الله رميساء, وكدلك نسمة ليبيا فهمتك وتقريبا عدلت المطلوب ممكن الصور المفروض يجوا كبار قعدوا صغار .

[مغتربة 7]

حي عليا عيوني طلعوا بجديااااااااااااااااااااات قلبي الصغير لا يتحمل

بسم الله ماشاء الله لاقوة الابالله
يمييييييييييييييييييييييييييييي
دجاج يجنن ورز ياخد العقل
بجد سهفتيييييييييييييييني فى ها الليل
وان شاء الله انجرب طريقتك
تسلم الايادي المبدعة
موضوع رااااااااااااااااااااااااائع ويستحق التقييييييييم والنجوم كلهم


حبيبة ياريت تكتبي اسمك على الصور حفظا لحقوقك
بشوية بشوية راح تتعلمي كل شي على المنتدى
فى انتظار المزيد من ابدااااااااااعاتك

[لوتي]

ماشاء الله تبارك الله عليك علياء رز يفتح النفس ومنظره مش عادي تسلم إيدك وزي ما قالت مغتربة7 إكتبي اسمك واسم المنتدى علي الصور حفظا لحقوقك وتصغري الصور شوي أهلا بيك بينا وليك التقيييم تستحقيه
س- شن هيا بهارات الدجاج يعني من شنو متكونة؟

[علياء السلفية]

الله يسلمك وخيتي مغتربة وبارك الله فيك ع التنبيه ,الله يبارك في وخيتي لوتي وبالنسبه لسؤالك بهارات الدجاج فيها منها انواع اني الي عندي من ايران . بس موجودة في ليبيا في المحلات وهي عبارة عن تتبيله مشكله حسب نوعها يعني فيها كسبر وحبهان وقرنفل وجوزة الطيب وفلفل اسود وشوية كركم حسب نوعها فيه الي تكون خاصة بالبرياني وفيه الي خاصه بصالصه المصاله بس زي ماقتلك ادا ماتوفرتش ديري الفلفل الاحمر وحطي توابلك المتوفره الا كمون الحوت لانه حيغير الطعمة.وتاكلي بالصحة ان شاءالله

[luba]

بسم الله ماشاء الله
ربي يعطيك الصحه علي الطبق اللي مش عادي
ويستحق التجريب ان شاء الله
بس عن جد تحفه طااااالع من ايديك
وتم التقييم ليك وللموضوع
واني معزومه مع مغتربه 7 هلبه فيها هدا هيا وصغارها
والا شنو غي غي يادوب يسد
المهم عزيزتي شكله عندك خلفية مليحه علي البهارات
عندنا موضوع في التجارب والفوائد تصوير والتعريف
بي بهاراتك اللي في بيتك
فياريت تشاركينا ونكون لك من الشاكرين لنستفيد وخاصه في البهارات
ويالوتي لو من طرابلس في سوق التلاتاء الحديت وين مايبيعوا في اللحم
تلقي غادي فازوات صغيره مكتوب عليها بهارات الدجاج الليبيه الهندية
وانواع هلبه جربته وحاجه مش عادية بكل
غير من ريحته ساااااد
ةهدي صونيتي معزومه مع مغتربه وصغارها محد ياكل معانا يادوب