السلام عليكم ورحمة الله وبركاته
هبلتني لوبا أمس لما شفت تطبيقها لزينب محمد في الرشدة المبكبكة
واني ماعندي الروح معاها حتى كل يوم ناكلها
بس مشكلتي كانت ما عندي قديد لأني ما ناكله بس نطيب بيه عادي
المهم اليوم كنت ناوية نديرها ولما الليبية تنوي الحاجة تخترع وتتفنن
عندي طريف لحمة من الشاكلات (الضلوع) داستها للمحشي والشربة العربية
حطيتها على النار مع المية خليتها تغلي وبعدين صفيتها وحطيت لها شوية زيت
وخليتها تنقلى في الزيت ونزلت دهانها وبعدها ضفتها لطنجرة الطبيخة متاع الرشدة
وبصراحة اعطت بنة القرقوش في الرشدة وجت مش عادية
بس ناقصها رويس فلفل أخضر وحبق وشبت وتجي على كيف الكيف
وبعد المحاضرة الطويلة
هذا رابط زوبة
[ الرشدة المبكبكة ] من المطبخ الليبي لزينب محمد
وشوفوا صور تطبيقي
وهذه أول مرة نديره في حوشي
قبل ديمة ناكل فيه في حوش أهلي من ايدين أختي
وان شاء الله تطبيقي المتواضع يعجبكم
وربي يبارك في زوبة ويعطيها ما تتمنى
ويفتح دروب الخير قدامها يارب
المفضلات