[ براك كرنب وفلفلة وتلات طماطمات ] لراس ورويس من مطبخ للاهم

[للاهم]

خير يا بنات
الحكاية مش مستاهلة شطحة العنوان ، كل ما في الامر اني جتني عالبراك وانا نطبق في المكرونة المسقية بالبصلة لزينب محمد حليت التلاجة لقيت كورة كرنب بادية تنصفر وراس فلفل حشو الوحيد اللي جاباته شجيرته ف جناني ناسيته ف التلاجة ماني عارفة شن دير بيه ما نحبشه ف السلاطة ولا عالبيتسا ولا ف الفاهيتا ما نحبه الا محشي ليبي معنقر تقلب بنته الشارع وتجيبكن من وين
معناها اضربن القرين في راس الكرنب في 3 طماطمات روما مافيها الا محيشي في طنيجرة دوب الدوب يجي عالجنب مع المكرونة
باهي ما هو انا حايسة في المكرونة وسريبها الطويل ومانيش سريعة واجد في الشغل امهل من المهل نسحن اللي يتفرج عليا
حليت الدولاب بحتت في ست البيت بعين وحدة لوحدة كان تشوفها امها توريها على الكسل وتقوللها خسارة تعليمي فيك
دفيت كلام امي من الطريق وطلعت ست البيت رفيقة البايرات والمستعجلات والموظفات وحضرة جنابي وحشيت فيها البصل الحويل والمعدنوس والشبت وقرن فلفل خضر وعلقتها وحاولت قدر الامكان يجي كانه مقرض باليد المسقمة
وهاتن فضيته في قصعة وقرضت فوق طماطم حب وشوية طماطم معجون ورز وحرارات وملح وبزار حكة نعناع يابس وانا ما نستعملش في الفلفل الاكحل في وكالي ولا عندي حتى ف الدولاب لأسباب صحية تخص صاحب بيتي
الحصيل صبيت عليه زيت زيتون وخلطت الحشو كويس
وكنت حالة قرين الفلفل والطميطمات وموتية ورق الكرنب بعد سلقته في مية فيها شوية ملح وشوية كمون حوت حاشا عيونكن عشان ما يديرش نفخة ووو
بس عمك الكرنب ورقه كان مش ما تمنيت ناعم ورطب واملس
كان من النوع اللي معرق واجد ومكرمش
ما علينا ماني نويته استمريت فيه المهم الطعمة
وعاد ستفت اللي فضل منه والعروق اللي فصلتهن في قاع الطنجرة
وستفت لبراكات والفلفلة والطميطمات

وكنت لما كملت من ست البيت غسلتها وحطيت فيها فصوص ثوم وملح وطحنتهن
وبعدين عصرت عليهن ليمونة خذيتهن وسقيت بيهن المحيشي اللي قاعد توا عالنار
بلكي تستغربن الثوم
بس هذي طريقتي ماخوذة عن جدتي لأمي
اللي واخذتها من امها جدة امي
براك الكرنب لازم له الثوم والشبت ينحط بين الطبقات
ويلزم له الليمون
طبعا انامغير طنيجرة صغيرة ما طقت تدير طبقة وحدة فصبيت الخليط من فوق
وحطيت شوية ورق نعناع زيادة فوح
ولاحظن ان ابراك الكرنب يبي مية زايدة يطيب فيها
لما طاب رتبته في الصونية كيف مانكن شايفات

شكله ناقص شويه لأن ورق الكرنب ماكانش حاجة
الفلفلة والطميطمات زيادة مني عادة الكرنب يندار بروحه
نحب ننتقد اكلي بيش نفطن للأخطاء في المرات الجاية
رد بالكن تطحن الخضرة في ستك البيت افندي
يا محلا التقريض

[سحابه صيف]

مشكورة حبوبه

[للاهم]

تسلمي خيتي

[زينب محمد]

هههههههههههههه

يعطيك الهني و السلامة ياللاهم

اسلوب كتابتك يهبل

و محشياتك قنينات لو ما طيبتهن مع بعضهن

اكيد التقريض باليد احلى من التقريض بالالات و ابن

ربي يسلم هالايديات حبيبة و يعطيك الصحة و العافية

صحتين و هناء على قلوبكم مطرح ما يسري يمري

نستنوا منك اطباق جديدة و تهدريزات جديدة ياحنا

وان شاء الله ما نفقدوك و لا نفقدوا طلتك و اطباقك الحلوة ياودة

دمت في وديعة الرحمن

[للاهم]

ههه شكرا زوبة ما نتريح نين نلاقك معلقة علي طبخاتي
بكرة كاااان فضيت ننزل تطبيقي لمكرونتك على طريقتي الاستعجالية بالوقت اللي يبقالي من كثرة القعاد في مطبخك الليبي
مدام اونلاين : اسمي الجديد اللي يناديني بيه راجلي

[نوارة ليبيا]

ماشاء الله والله يجي في الخاطر ^_^

واسلوبك يشد ويخلي الواحد ينسجم ويقرا وهو مبتسم

ماشاء الله عليك معلقة طبخ ممتازه هههه

^_^

[طمطم]

هههههههههههههههههههههههههههههههه الله يعطيك السلامة يارب على هالاسلوب
تجنني ياللاهم
بس بنقولك حاجة ..... حاسة عندك مدونة وتكتبي فيها في يومياتك؟ بالله عليك تعطيني وصلة لو عندك

إن شاء الله غير مش كراسة مانلقو كيف نوصلوها.... لو عندك حاجة عالنت
عندك أسلوب يجنن ممتع في الكتابة
الله يهنيك

[ام الجميلات]

يسلموووا على خفة دمك

[فضااوي]

ههههههههههههههههههههههههههه
يعطيك الخير ياللاهم
انتخيل فيك وانتي حايسة بين المكرونه والمحشي هههههههه
بس كنتي صورتي الكوجينه عشان تكمل ههههههههههههههه

تسلم ايدياتك يالغلا

[ليبيا قلبى]

اممممممممم
منظرها ايجنن
والاكيد الطعم احله
تسلم ايدك