[ مبطن السمك ] من مطبخ لوبا

[luba]

السلام عليكم ورحمة الله وبركاته

مبطن السمك


ناخد سمك نقوم بتنظيفة وتقسيمة الي نصفين

متل سمك السردين

اسمه هيرينق

بس يشبه للسردين واااجد في الشكل بس


نضع السمك في التتبيلة :

توم مهروس - عصير ليمون - كمون حوت -
ملح - فلفل اسود- فلفل احمر البابريكا






حشوة السمك :


بصلة صغيرة مفرومة ناعم- فصين توم مهروس - ملعقتين كبار كسبر اخضر

ملعقة صغيرة هريسة ليبية

ملعقة صغيرة كمون و فلفل احمر بودر

ونصف ملعقة صغيرة ملح وربع ملعقة صغيرة فلفل اسود وكركم

وبيضة وملعقة ونصف كبيرة دقيق

نخلطها مع بعضها تكون متماسكة نوعا ما

ادا احتاجت دقيق اضيفي لها بالتدريج











اما ان نضع الحشوة بين كل طرفين من السمك او

نضعها في طرف واحد ونلف عليها الجزءء الاخر من السمكه

اني لانها طويلة غطيتها بالجزء الاخر من السمكه








ونغمسها في الدقيق ويمكنك القلي مباشرة في زيت ساخن

علي حرارة متوسطه اليعض منه غلفته بالدقيق وقليت والبعض منه

غلفته بتغليفة السمك من زينب ♥ شكرا زينب محمد ♥

في هدا الرابط




نتيجتها اكتر من رااائعة واللي حتجربها حتبهرها النتيجة والبنه

اخدنا تتبيلة السمك واضفت عليها عصير ليمون وخففته بالماء

و اضافة الماء حسب رغبتكم واضفت الدقيق وحركناهم كويس وغلفت بيهم السمك

وقليتهم علي طول

[حبيبتهم]

ماشاء الله عليك يا لوبا
وصحتين عليكم اني مانحبش السمك لكن في معلومة نعرفها
ان السمك مايطلعش عليه البصل يعني ايريح طعمته او حاجة هكي مانعرفش بالزبط

وتسلم ايديك وجاري التقييم

[ميرولاكى]

ماشاااااااااااااء الله سهفتينى على السمك
طريقه حلووووووووووووه وعجبتنى
صحتين والف عافيه على قلوبكم

[أمـ ساره]

ماشاء الله على الفكرة الحلوة

عجبتني وان شاء الله مع أول فرصة نجربها

وسهفتيني على السمك المقلي يابنت

بالهني والعافية على قلوبكم

وتستاهلي أحلى تقييم لو مشي

ولك كل النجوووووووووووووووم

[الصابرة]

ماشاءالله .. تبارك الرحمن
اني ماعندي روح مع السمك وفكرته حلوة
سلم دياتك وربي يبارك فيك وفي وقتك وجهدك يارب
احلى تقييم ونجوم لو مشوا

حبيبتهم .. حتى اني سامعتها ان البصل مايجيش مع السمك ويخلي طعمته حلوة كانه به سكر
لكن اني من يوم ماعرفت اني انطيب السمك
واني اندير في البصل مع السمك وعادي مانحسش في فرق بيه او بلاه

[luba]

بارك الله فيكم علي مروركم اللي يسعد
يفرح نورتوا الموضوع

حبيبتهم حتي اني سامعة بيها بس مش كل انواع السمك في نوع
معين والحق مانعرفاش لاني انطيب ديمة في الاسماك اندير شوية منها في الفرن
وشوية قلي واللي عجبني انكمل بيه الباقي
وهو ممكن مع الطبيخة لاني اني حرايمي السمك اندير فيه بدون بصل
علي خاطر هالمعلومة

[بنت حواء]

يمممممممم ماعنديش روح مع السمك
وماشاء الله طريقة جديدة وحلللللللوة
جاري التطبيق في أقرب فرصة بإذن الله
تسلم يديك يالوبا الحبوبة
وصحة وهنا
وأحلى نجوووووووووم

[زوبة الطيوبة الحبوبة]

طريقة حلوة ويسلم هالايديات اختي لوبا وانا نحب السمك هلبا لاني متعلمة جميع الطرق في طبخه من امي
بس عندي ملاحظة وهو ان حشو السمك يظهر كانه جاري شوية
والسمك المحشي يفضل تكون حشوته جافة او شبه يابسة
باش لما نقليه ماتنزلش الحشو متعه ولو في الكوشة مايتزلش هلبا مية
وتقبلي ملاحظتي بكل رحابة صدر
وليك كل حبي واحترامي..

[luba]

شكرا لي مرووركم واسعدني كتيرا

بارك الله فيكم ربي يعطيكن الصحة وراحة البال

عزيزتي زوبة الحبوبة لا عادي تفضلي اعطينا افكارك ونصائحك وكلنا ادان وعيون تري وتسمع

بالنسبة الحشوة مش جارية ومش يابسة وهي متوسطة ومانحبش تكون يابسة بالنسبة ليا لانها هكي مرات اطول في القلي

بس لما تكون اكترها دحي ومش هلبة الدقيق اسرع في القلي

وانه الزيت طلع نطيف مش نازل فيه شي وماطلع مني شي الحمد لله الكل لازم يغير في الوصفات علي دوقة

زي اني توا اضفت ماء علي طريقة زينب لانه مانحبوا بنة الليم هلبه او تبان في الاكل بس فكرتها روووعة وغيرت تغيير بسيط

بس زعلانين منك تعرفي في المطبخ ومتعلمه من امك وما تورينا حتي شوية في انتظار طبخاتك ماتنسيش

[دانية]

الله ايهبل المنظر سلم ايديك والف صحة وهنا