[نصيحه] مكنسة الباي

[نسمه ليبيه]

السلام عليكم

مش عارفه الاسم الاصلى لهذا النوع من المكانس اللى اظن مافيش بيت ليبي تخلو منه على اختلاف المسميات فيه من يسميها الباى وايضا


الكركوبه.والحطمه.ومكنسة الباير.


المهم:افضل نوع هو اللى يحتوى على مجموعة ريش واحده مش صفين من الريش او الثلاثه
لان اللى تتكون من مجموعه وحده تتحكمى بيها اكثر وتنظف اكثر والنصيحه هذى من صاحب محل


وهذى المكنسه اللى نقصدها وكل وحده تقولنا شن تسمى فيها



:




http://<a href="http://www.0zz0.com/...&#91;/img]</a>

[luba]

جو عليك يانسومة تخطر عليك حاجات تنقيب في دولاب المطبخ
هادي مكنستك ؟مغريه للصغار منها يلعبوا ويمسحوا مكانهم

بالنسبه ليا نقوللها الباي باي

وفي ناس نعرفهم يقولولها اللقاطه بشد القاف

وحتي في كندا اهني لقيت متاع ريش وحدة بس وتفاجأت لما لقيتها

لانه في بريطانيا ماشفتهاش لافي محلات العرب ولا الاجانب مع انه في غادي حتي محلات ليبيين

[الصابرة]

الله يعطيك السلامة نسومة

احنا انقولوها نسناسة

[لوتي]

فعلا نسومة فيه من صغار ايحبو يلعبو بيها وحتى أني لاحظت إنا النوع اللي فيه صف واحد ينظف أحسن من الصفين فيه من يسمي فيها النسرافة وفيه الفالحة شكرا علي النصيحة

[بنت الاشراف]

نسموا فيها اللمامة

[أم خديجه]

نسموا فيها القاطه ذكرتيني بقصه صارت لاختي مع اسم المكنسه هذه

ماشيين عند اصحاب ابي وهي ظل ابي يعني مقمعزه معاهم وصاحب بويا قاللها عدي جيبي {العزوز الفالحه} المهم جت قمعزت بجنب امي
وقالتلها عمي قالي جيبي العزوز الفالحه وعلامه استفهام كبيره فوق راسها الصراحه حتي انا استغرب في الاسم امي قالتلها عليها وعدت لزوجته وعطتلها ورفهتها للمربوعه بعد فتره طوليله وبعدها كل ما يتلاقا وياها قوللها عرفتيها العزوز الفالحه سامحوني طولت عليكم بس لنا ريت الموضوع شدني الاسم حتي انا صارلي زي اختي
الصراحه ما نستغناش عليها قداش تنظف ما تخليش في شئ وراها اهم شئ انها تلقط في الشعر الي في الفرش

[نسمه ليبيه]

اه لوبا شن رايك فى تنقيب الدولاب؟ وهذى مكنستى(شكرا لمرورك>

الصابره اسم جديد النسناسه شن معناها المرخيه؟(شكرالمرورك)

بنت الاشراف(شكرا لمرورك

لوتى وصح كلامك صف واحد يلقط اكثر(شكرا لمرورك
ام خديجه ههههههه ضحكتنى اختك هى شابه فالحه بصراحه مش عزوز(اسعدنى مرورك)

[حبيبتهم]

حتى اني نقولها اللقاطة

وكيف ماقالت ام خديجة احسن شئ فيها تلقط في الشعر

[نسمه ليبيه]

شكلها هالمكينسه الصغيره بنديروا لها موسوعة اسماء