[ زيتون منزلي في 15 يوم ] من مطبخ الصابرة

**الصابرة** · 01-06-2013, 03:06 PM

السلام عليكم

مع هذه الطريقة ودعا للانتظار الطويل لنضج الزيتون
او شراء الزيتون الجاهز
الحمدلله تجعلك تأكلي زيتون من دياتك في 15 يوم فقط
لكن لزيتون الذي حبته كبيرة يأخذ 21 يوم تقريبا

الطريقة

ناخذ الزيتون ونغسله جيدا بالماء بعد تنظيفه من الروس والاوراق
هذا زيتون مزرعة اهلي
ونسكب عليه ماء ونتركه 3 ايام

بعد 3 ايام نغير الماء ونضيف ماء جديد ونتركه 3 ايام اخرى
بعد 3 ايام نغير الماء ونضيف ماء جديد ونتركه 3 ايام اخرى
هكذا اصبحنا 9 ايام
اما اذا الزيتون حبته كبيرة نعمل 3 ايام اخرى لتغيير الماء
و3 ايام اخرى

بعدها نسكب عليه كمية معقولة من الملح على حسب كمية الزيتون
وبدون ماء يترك 3 ايام

وهكذا شكله بعد 3 ايام

بعد 3 ايام نغسله من الملح لكن لانغسله جيدا
ثم نسكب عليه ماء ونتركه 3 ايام
بعد 3 ايام كلي احلى زيتون من دياتك واذا وجدتيه مالح غيري الماء فقط
ثم يوضع في فازو ويحفظ في الثلاجة اذا خففتي الملح هلبة
لكن اذا ملحه معتدل لاتخافي من بقائه خارج الثلاجة

نصيحة

طبعا نحن معروف عندنا اننا نضع الزيتون في زجاجات الماء الكبيرة او الصغيرة
لكن نصيحتي اذا تبي تجربي طريقتي يفضل وضعه في حافظة او سطل
لسهولة تبديل الماء

**نسمه ليبيه** · 01-06-2013, 04:54 PM

جزاك الله عنا كل خير

من كم يوم جيت لاهلى لقيت امى زعلانه

قالت درت زيتون اسود وللاسف بعد انتظار الشهر طلع مر جدا

ياتري السبب فى المراره هى نوع الزيتون مثلا.

وهل طريقتك هذى هى نفسها طريقة الزيتون الاسود؟

وانت ماتفتحيش فى الحبه او تدقيها؟

**بنت حواء** · 01-06-2013, 05:09 PM

ماشااااااااااااء الله زيتون يجننننننننننن
تعرفي أنا ماعنديش حظ مع الزيتون
المدة اللي فاتت شريت زيتون أسود وحبته كبيرة
قعد شهر في المية والملح والخل ونبدل فيه كل يومين شن صار؟؟
قعد تقول مسلوق رطب هللللبة
وعليه زي البقع تقول فاسد درهلي كبدي ولوحته
لكن طريقتك هذي ان شاء الله نجربها وتزبط معاي
لأني نمووووووووووت في الزيتون المنزلي
تسلم يديك ياصبورة وصحة وهنا على قلبك
ولك أحلى نجوووووووووووم

**حبيبتهم** · 01-06-2013, 05:21 PM

ماشاء الله صبورة عالزيتونات

بس اعترفي هههه هذا اكيد ليه فترة امدايرتيه لان توا الزيتون الصغير هذا لونه اسود كامل

جاري التقييم لصبورة وزيتوناتها الحلوات

**أم خديجه** · 01-06-2013, 05:37 PM

ما شاء الله لا قوة الا بالله

بارك الله فيك علي الطريقه وعلي الشرح

اموت في شئ اسمه زيتون

تسلمي

**الصابرة** · 01-06-2013, 06:01 PM

نسمة ليبية

حبيبتي طريقتي تمشي مع اي زيتون والاسود اسهل من الاخضر
وماديقتش ولا فتحت الحبة
وتعرفي قولي لامك الله يطول في عمرها ادير طريقتي وتبدا فيه من جديد
كانها جايبة الزيتون توا وشوفي النتيجة

بنت حواء
الله يسمك ان شاءالله تجربيها وحتشوفي النتيجة
غير ان الحبة الكبيرة تأخذ وقت اطول شوي 21يوم

تعرفي من نجاح تطييب الزيتون انه لايوضع له ملح في البداية
ويغير مائه باستمرار
والخل هو اللي خلاه مهبز (رطب)
لان المحلات راهو يحطوا في الخل ليه بعد النضج
لانهم يريدون الربح السريع ونحن يغر فينا الشكل
زيتون السوق اللي شكله يسهف يطيبوا فيه بالجير

حبيبتهم
اسعدني مرورك
صح ليه هلبة حتى سطلي قريب يكمل
لكن اللي صارلي في البداية النت ضعيف ومرات مفصول وبعدها
كل يوم انقول انزله مايسخرش الحال واهو نزلته اليوم

ام خديجة
الله يسلمك حبيبة واسعدني مرورك

**أمـ ساره** · 01-06-2013, 06:01 PM

ماشاء الله لاقوة الا بالله

زيتونات يجوا في الخاطر صبورة

وشكلهم ينادي يقول كولوني

طريقة حلوة وبسيطة وساهلة

بنسألك هل تجي حتى مع الزيتون الأخضر ؟

بالهني والعافية على قلوبكم

وتستاهلي أحلى نجوووووم والتقييم لو مشي

**أمـ ساره** · 01-06-2013, 06:07 PM

الحمد لله التقييم مشي

تستاهلي أكثر والله

**الصابرة** · 01-06-2013, 06:08 PM

ام سارة

اسعدني مرورك وكلماتك الحلوة
ايه حبيبة يجي مع الزيتون الاخضر غير انه بياخذ وقت زيه زي الحبة الكبيرة لو زيتونك حبته صغيرة
ام اذا حبته كبيرة ياخذ وقت اطول من الحبة الكبيرة السودا
واذا رغبتي انه ايطيب زيه زي اي زيتون شقيه