[أرز بالجمبري والمكسرات] من مطبخ أم خديجه

[أم خديجه]

السلام عليكم ورحمة الله وبركاته

مرحبا باحلي عضوات وعاشقات اكل البحربات

اليوم كان غدائنا أرز بالجمبري والمكسرات

ان شاء الله يعجبكم




المكونات لطبقنا اليوم

1- كيلو جمبري منظف وبعد ذلك نتبله (ملح - بزار - كمون حوت -

عصير ليمون -فلفل احمر بودره -القليل من الماء لتخفيف التتبيله) ونخلطه ونتركه يتشرب التتبيله

2- مكسرات وهي لوز - زبيب - كاجو

3- كوبان أرز نطيبه نص تطييبه


4- سلفر
5- طنجره بالكسكاس نضع فيها ماء ونتركها يغلي هذه صورة الجمبري قبل التنظيف




وهنا بعد تنظيفه



وهذه المكسرات




نأتي الان لطريقة لفه وطهيه

نقص قطعة السلفر ونفرده ثم نضع ارز تقريبا ملعقتان كبار ثم قطع الجمبري

بعد ذلك نضع فوقه القليل من اللوز والكاجو والزبيب ثم نضع ارز مره اخري ومن

تم ملعقه او اكثر من تتبيلت الجمبري ثمه نلفه ونغلق من الجوانب ونضغط عليه ونلفوا حتي تنتهي قطعة السلفر

اترككم مع الصور لطريقة اللف
















وبعد ما انكمل كمية الارز نضعه في الكسكاس كما في الصورة

وننتظر ساعه الا ربع حتي ينضج الارز


وهنا بعد ما جهز






وهنا شكله بعد ما حولته من السلفر







وهنا خلطه مع بعض





وهذه الصوره بعد ما برد جربته يمكن اني نقدمه قطع

وهذه النتيجه





وهذه مني لكل من تدخل وتكتب تعليقها





في امان الله وحفظه

[حبيبتهم]

ام خديجة تعالي جاي

صورة الجمبري اللي مش منظف رعشتني تعرفي كان يجيبوهلي في الحوش نتخيل في روحي مانقدرش انمسه بكل هههههههه
اني مانحبهمش البحريات كلهن والصونية اللي قلتي اللي بتخش وبتعلق اني مسامحة فيها اللي تبيها تاخدها هههه

لكن فكرتك حلوة وجديدة بالك نفكر شي مرة نجربها بدجاج او لحم

وتسلم ايديك وصحتين عليكم

جاري التقييم

[الصابرة]

ماشاءالله شكله يهبل
يعطيك الصحة لكن اني انجربه يستر الله
واظني لو جربته انبدل الجمبري بالدجاج يجي زعمك
سلم دياتك ويفتحها في وجهك يارب
فكرة حلوة على العموم
لك تقييمي

[أم خديجه]

بارك الله فيك حبيبتهم وتسلمي علي المرور

ان شاء الله نعوضها لك في موضوع اخر باذن الله


كنت زيك في الاول بس بعدين خديت علي تنظيفه

خدوجه ساعدتني في تنظيفه وكانت منسجمه دارتلي جو

[أم خديجه]

مرحبا صبورة نورتي

حبيبتي هذه تاني مرة انديره مازلت مش خبره في اكلات الجمبري طعمته روعه تغيير عن الدجاج واللحم

ان شاء الله انجربه بالدجاج مره اخري وانقولك النتيجه

[ميرولاكى]

الله الله يجننننننننننننننننن خيااااااااااااااال
وفكرة اللفه خطرتنى بالسوشى الصينى
الله يسلم دياتك شكل جديد وطريقه حلووووووووووووه
صحتين والف عافيه

[om_adnan]

وعليك السلام ام خديجه...جمبرى درجه اولى,سلم إيديك طريقه جديده,انا نموت فى الاكلات البحريه,شوفى نصيبى بعد البنات ما ردوا.ايجنن.

[لوتي]

فكرة حلوة وجديدة أم خديجة تسلم إيدك وتستاهلي 5نجوووم

[أمـ ساره]

ماشاء الله يا أم الافكار أم دوجة

الفكرة اتهبل والشكل رووووعه

بس حتى اني ما ناكل غير السمك بس

لكن نحسها تجي حلوة بالدجاج

سلمت ايدياتك المبدعة وتستاهل التقييم والنجوم كلهم

[أم خديجه]

بارك الله فيك ميرولاكي ايه حتي لما انلف فيه خطر عليا السوشي

ام عدنان مرحبا بيك مشاركتك الادمان علي البحريات وعندي علي تجريبهن امس كان يوم بحريات 4 انوع سمك وجمبري كان نوعين

لوتي مشكوره حبيبتي

*ام ساره نورتي ننصحك تجربيه فيه فوائد ليك وللبيبي

الصغار مادورش الارز جمبري الاول بنوتي عمرها سنه تاكل فيه

شرفتن موضوعي والله يسلمكن ولا يحرمني طلتكن وتعبيراتكن