[ارز باللحم]في الفرن من مطبخ ام عبسي

[ام عبسي]

السلام عليكم ورحمة الله وبركاته







اتمنى من الله العلي القدير ان تكونوا في تمام الصحة والعافية

جبتلكم طريقتي في طبخ الرز في الكوشة ان شاء الله تنال الاعجاب واتمنى ان تكون فيها افادة

المكونات

(لحم اي نوع +بصل مقطع مكعبات+طماطم مقطع مكعبات+ثوم مفروم

+زنجبيل مفروم+فلفل اخضر حلو مقطع اجنحة+فلفل اخضرحار

مقطع مكعبات+حبة بطاطا صغيرة مقطعة مكعبات)



في طنجرة على النار نحطوا مقدار ربع كوب زيت ونحمرو البصل

لين يدبل وبعدها نحمرو اللحم (وفي بعض الاحيان نحمر اللحم هو الاول )

ثم البطاطا ومن ثم باقي المكونات وكركم ربع ملعقة مانكثر ونصب عليهم

مقدار لتر ماء ساخن وقبل مانغطي الطنجر ةحطيت عليهم حرارات حب بعد

مالميتهم في قطعة قماش نظيفة وهي(عود لحم +شوش الورد +فلفل اكحل+هيل

+قرفة +زنجبيل يمكن الاستغناء عنه لاني حطيته غي الاول) الملح انضيف فيه فبل مانطفي عالطبيخة بربع ساعة



وهنا المرقة بعد ماطفيت عليها وممكن اضيفي طماطم معجون لوتحبيه الرز احمر



وبعد ماجهزنة المرقة نجهز الرز طبعا حسب عدد افراد الاسرة اني هنا

درت كوبين عسلتهم ونقعتهم في ماء عادي لمدة نصف ساعة اواقل

ويصفى انحمس الرز في الزبدة بمقدار ملعقة

بيش يطلع محبب



اني في وجبتي هذي اضفت لحم مفروم طايب على الرز(وهذا شي اختياري)



وبعدين انحط الرز اللي حمسناه في صينية الفرن ونصب عليه

المرقة مش شرط كل المرقة بس لين يرتفع عن مستوى الارز بمقدار بسيط جدا وانرتب عليه اللحم




ونغطيه بالسلفر ونحطه في الفرن لمدة نصف ساعة او اكثر شوي لين

نلاحظ المرقة جفت والرز طاب ونحول السلفر ونحمرا شو من فوق



وهذي سفرة غدانا اني وشايبي ووليدي الرز بالفرن وسمبوسة باللحم

وسلاطة (بالجبنة والتن والزيتون) وجبنة بوك وهريسة للسمبوسة هي سمو بسم الله



وصحتين وعافية ودمتم في حفظ الرحمن

[ميرولاكى]

ماشاااااااااااااااااء الله
طريقة الرز تجنننننننننننننننن وعجبتنى بكلللللللللللللللللللل
الله يسلم دياتك
وصحتين غداكم

[أم خديجه]

ما شاء الله لا قوة الا بالله
ربي يحفظك عيلتك ويسلم دياتك
ارز ما شاء الله
تم التقييم

[أم عبادة الليبية]

ماشاء الله أم عبسي رز فظيع عجبني هلبا هلبا تسلم ايدك وصحتين على قلوبكم .

[ام ساره وعبدالعزيز]

ماشاءالله صحة وهنا

[الصابرة]

ماشاءالله رزيزة تجي في الخاطر سلم دياتك وربي يحفظك

[luba]

مااااااااااااااشاء الله لاقوة الا بالله سفرة تاخد العقل بالرز اللي فيها
طريقة وشرح وتصوير راااائع تسلم ايديك بارك الله فيك وجاري الحفظ للتطبيق
وشنو شايبي هادي اللي يسمع بيك في الستين
صحة عليكم وربي يجعلكم ديمه ملمومين عالخير
تم التقييم ليك وللموضوع

[لوتي]

أحلى صبية أم عبسي وست بيت درجة أولى طريقة حلوة وسفرة منظمة تسلم إيدك وربي يدوم جمعتكم
5 نجوووم

[رميساء]

السلام عليكم
بالعافيةعليكم
روووووعه السفرة
ربي يحفظكم لبعض
تسلمي
جاري التقييم

[نسمه ليبيه]

صحتين وعافيه على قلبك مانتش مقتنعه بالرز فى الفرن لكن لما شفت طريقتك عجبتنى واجد

بس بنسالك الطاجين اللى تحطى فيه الرز ماتدهنيش؟؟ ومايلصقش الرز؟؟