تفضلي بالدخول وشاركيني باقتراح من فضلك

[barney]

السلام عليكم ورحمة الله وبركاته

الموضوع مش موضوع طبخ

لكن حايرة ونبيكن اتشاركني باقتراحاتكن لو سمحتن

ان شاء الله زوجي بيتخرج دكتوراة وحايرة شن نهديه نبي حاجه مميزة لان المناسبه مميزة

ممكن اتشاركني باقتراحاتكن بس بشرط مانبيش حد يقترح

ساعه

نظارة

عطر

او قلم

نبي اقتراحات احلى

بالله ماتهملن رسالتي والميزانيه مش مشكله انتن اعطني اقتراحات واني نحسبها بالميزانيه اللي عندي

ومش مستعجله لانه مازال 5 شهور بإذن الله

وكتبتلكن بالوسع بيش تعطني اقتراحات حلوة

والسلام عليكن ورحمة الله وبركاته

[luba]

اهلين بارني اسعدنا وجودك ان شاء الله ربي يكمله علي خير

والف الف مبروك مقدما

علي حسب زوجك شنو يحب لو هو من اللي يلبسوا في القمصان

بالقرواطة تختاري الوان القميص ساده والقرواطه قريبه منها

او ..... حذاء ... او ..... توته راقية ممكن حتي يطلع يلعب رياضه فيها او يمشي فيها

في سهريه ليل بين اصحابه او زردة

او ماكينة حلاقة شحن في انواع صغيرة وخاصه باللحية فقط لا يستغنون عنها ابدا

وهدا اللي جي علي بالي حاليا

طبعا ابدا ماتنسي باقة الورد حتي لو ما يحبه هلبه

ولو في كيف تقدري تشري او تصنعي كيكه علي حسب نوع تخصصه اللي في مجاله

بعجينة الفوندان او اللوز وتتجمعي عليها انت وعويلتك للاحتفال حاجات لاتنسي من داكرتهم

بالتوفيق ان شاء الله ليك وليه

[دانية]

ألفين مبرووووك يابارني.... العقبالي ياربي قولن آآآآمين...

انا نقترح عليك مصحف فخم ... ومعاه لبسة عربية سمحة ..بصدق انحب اللبس العربي الليبي بالأخص الرجالي ..

شن رايك ... وياريت باقي العضوات ايفيدوك اكثر..

[barney]

بارك الله فيكن لوبا ودانية ان شاء الله ربي يجبر بخاطركن كيف ماجبرتن بخاطري
والافكار اقنينه لكن يا لوبا اني مش فالحه في الحلو مانعرفش انشكل ع حسب تخصصه مع انها عجبتني الفكرة
دانيه وين ابنوصل فيها البدله العربيه السمحه وان شاء الله العقبالك ياربي

[الصابرة]

قرات على السريع لي عودة ان شاءالله
والف مباروك ليه

[زوبة الطيوبة الحبوبة]

ربي يوفقه ويتممله على خير ان شاء الله وتفرحي بيه يابريني
انا ممكن نقدم لك اقتراح ونحاول نساعدك أن شاء الله
مثلاً
تعزميه في مكان راقي ومميز أو تهديه هاتف نقال مميز أو عدة حلاقة مميزة
وربي يساعده ان شاء الله

[barney]

بارك الله فيك يا زوبه يا طيوبه يا حبوبه ع الاقتراح
حناخده بعين الاعتبار مشكورة ما قصرتي
وينك يا الصابره مش ليك عودة او خلاص غيرتي رأيك؟؟؟

[نسمه ليبيه]

حتى انا من رأيي موبايل فخم
او ايباد

الف مبروك لراجلك يارب

[أم عبادة الليبية]

ألف ألف مبروك مسبقا وربي ينفع بكم البلاد والعباد , وأنا مع رأي نسمة آيباد أو موبايل موديل جديد .

وإنتي حاولي تجسي نبضه شن الحاجة اللي خاطره فيها ونيته بيشريها وفاجئيه إنتي بيها , وأهم شئ تكون التغليفة حلوة ويكون فيها كرت حلو , وربي يسرلكم أموركم حبوبة .

[المصراتيه]

الف الف الف مبروووووووووووووك
الله محلاااااها اللحظه هدي حتي اني نراجي فيها
اول شي قولينا شن تخصصه لان في هدايا حلوه علي قرايته
وبالنسبه لقتراحي لان هدا اللي بنديره ان شاءالله هيا بدله التخرج
انك انتي تهديه بدلة تخرجه وباقه الورد اكيد هدي هههه
وان شاءالله ربي يوفقه في علمه وعمله وربي يفتح عليكم جميع ابواب الخير