كيف اطبق بعض الطرق؟

[معتزة بديني]

السلام عليكم ورحمة الله وبركاته
انا من اشد المعجبات بهذا الموقع وحقيقة استفدت منه كثيرا
ولكن بعض الطرق تعجبنى ولما نحاول نعملها ماتطلع معى وهذا يسبب لى الانزعاج ونبطل انديرها لعند ما قعدت بس متفرجة ومعجبة (مثلا لف المعجنات بشكل الوردة ابدا ما زبطت معى )ارجو الافادة لانني فعلا انحب انتعلم ونسعد اسرتى وشكرا

[رميساء]

وعليكم السلام ورحمة الله وبركاته
اختاه عادي ولا يهمك كلنا مرينا بمثل هذه التجارب من قبل
وفي بداية تعلِمنا الطبخ مرت بنا هذه المرحلة
أختاه أقدم لك بعض النصائح
(أولاً )حضور النيه وربي يبارك لك في الشئ الذي تعملين وإن شاء الله تزبط معك المرة القادمه
وتكوني متفوقه علينا في المنتدي
وأنت لا تحكمي علي نفسك بالفشل فأنتي في بداية الطريق
أنت إستمري في التطبيق واستعيني بالله أولا ًولا تنسي إستشارة من تثيقين فيه
لكي تكوني في الطريق الصحيح
(ثانياً )عندما تريدين تطبيق أي وصفه لازم يكون في بالك أنها مش طبق الاصل كلنا يحدث معنا هذا
والاسباب كثيرة عزيزيتي منها علي سبيل المثال لا الحصر نوع الدقيق ونوع الكريم والاجبان
ونوع الأفران ونوع الطواجين لهم دور في النضج
(ثالثا) عند تطبيق أي وصفه حاولي إنك تنقصي المقادير لأنك أول مرة لك وتجربه وكان نجحت معك التطبيق
طبقيها بالمقادير التي تناسب أُسراتكِ
(اختاه) انت مبدئيا ما شاء
الله عليك لأنك عندك نيه وبأذن الله تكوني طباخه ماهرة
توة ابدي بالحاجات الخفيفة مثل السلطات والعصائر وزيدي من ابتكاراتك
وما تشغليش بالك لانه الخبرة في الطبخ لها دورها خلي عندك ثقه بنفسك
انك تنجحي في أي وصفه وهي توة نبي نشوفك معنا ونحن نشجعوك
والاخوات المشرفات في المنتدي يساعدوك في تنسيق المشاركة

[luba]

اهلين عزيزتي اسعدنا وجودك معانا وبارك الله في رميساء كفت ووفت

شوفي كنت زيك لا نعرف نطبخ ونكره المطبخ ويا رميت وياما حرقت وياما كلوا الحاجة المالحة والحامضة

عين تبكي وعين تضحك

صدقيني لازم من الفشل لتكوني خبيرة في الطبخ وحتتعودي بعدين بدون حتي الالتزام الكامل بالوصفة

وزي ماقالت رميساء وسعي بالك واحضري النية و اللي تغلطي فيها اسألي عليها في موضوعها انك طبقتيها ومانجحت وشن

سبب عدم نجاحها ولو تحضر معاك الصورة افضل

واللي ماترد نزليها في القسم المجرب واللي مجربها غيرك يرد عليها لانه ممكن انت تجربي وصفات لاخوات غير موجودات معانا حاليا في المنتدي

وان شاء الله انت تبدي واحني معاك وزي ماوقفوا معانا الاخوات الكل اهني ربي يبارك فيهم وفي وقتهم وجهدهم

ان شاء الله تكوني من اروع واهم الطباخات علي مستوي العائلة والمدينة في انتظارك ماتنسي

[أم عبادة الليبية]

ربي يوفقك حبيبة معانا وانشوفوك أحسن طباخة , وشكرا لرميساء ولوبا كفوا ووفوا .

[معتزة بديني]

الشكر الجزيل لكن جميعا وانحس في روحى المعنوية ارتفعت وانشا الله انكون على قد التوقعات
والسلام عليكم ورحمة الله وبركاته

[زهرة الحبق]

انا نؤيد الاخوات في الكلام وبالتوفيق مافي واحد نزل من بطن امه متعلم والناس كلها تتعلم من بعضها ومن التلفزيون من برامج الطبخ

[أمـ ساره]

مراحب حبوبة

ماشاء الله الاخوات ما قصروا بارك الله فيهم

ولعلمك أختي اني لحد الآن نتعلم ونطبق من الاخوات

مرة تنجح ومرة لا لكن نقعد فترة وبعدها نحاول من جديد نطبق ونزيد ونقص

ونضيف حاجات ونقص حاجات حسب رغبة العيلة طبعاً


لهذا ما تفشلي ولا تخلي الاحباط يتغلب عليك اقعدي حاولي وجربي واسألي

لحد ما تتعلمي ان شاء الله وتنجح معاك أغلب الوصفات


وهي ابدي وتشجعي وخلينا نشوفوا ابداعاتك معانا

[الصابرة]

ماشاءالله الوخيات ماقصروا
نضيف عليهن مثل كان بابا يقولي فيه ديمة خصوصا كان الحاجة جت ماتنفعش
يقولي [ اللي اديره العمشة ياكلوه ضناها ]
وكان يوقلي كان مافشلتيش مستحيل تعرفي طعم النجاح
والحق اول ماتعلمت المكرونة المبكبة ممكن تقولوا اسهل حاجة لكن تصدقي اخر شئ اتقنته ولحد الان مرات تجي مش حلوة
لما كنت انتعلم فيها مرة يابسة ومرة معجنة ومرة بزارها هلبة ومرة بيضا ومرة حمراء وحامضة
لكن الاصرار هو اللي خلاني انتعلم
ولازم يكون عندك معلومة ديمة قوليها لروحك طالما غيري دارها مش صعبة عليا انديرها هذه عبارتي من اني في 6 ابتدائي
فالحمدلله ومازالت انتعلم

[بنت حواء]

أختي معتزة
واضح أنك مجتهدة وعندك نية وهذا أهم شيئ
وطبعا كلنا لما نجربو الحاجة أول مرة وتاني مرة بنغلطو
لكن لازم الاستمرار نين تجي مزبوطة
بس بنقولك حاجة لو تبدي في تطبيق الحاجات الساهلة أحسن
عشان تتشجعي وبعدين خشي على لف المعجنات بشوية
وحتلقيه أصبح ساهل بإذن الله
في انتظار مشاركاتك وتطبيقاتك وتفاعلك معنا
وأهلا بك