[مشاركه فى مسابقة مبدعة المعجنات لعام 2013]افخاذ الدجاج من مطبخ نسمه ليبيه

[نسمه ليبيه]

كيف حالكم جميعا هذا النوع من المعجنات نحبه واجد واجد وعندى

معاه ذكريات لانى قدمته فى بيانى وفى فرحى ونتمنى تعجبكم طريقتى



اولا مقادير العجينه"

2كوب دقيق - بيضه واحده - ربع كوب زيت - ملح - وماء





نعجن المقاديرحتى تتكون عجينه ملساء تقريبا الماء كوب وشوى حسب نوع دقيقك ونترك العجينه ترتاح







الحشوه

عباره اصابع بطاطا مقليه و صدر دجاجه مسلوق فى ماء ولما ينضج نفتته باليد

بعديننجيب طاجين ونحط فيه بصل مفروم ونقلبه حتى يذبل ثم نضيف له الدجاج

ونقلبه ونضيف بهارات وملح وثوم ونطفى عليه ونحطه على جنب


نجيبه العجينه ونقطعها قطع صغيره وكل قطعه نفردها فى الة الباستا على رقم 2 ثم 5 ثم 7 ثم 9


ونقطعها لمربعات صغيره










ناخذ مربع من العجينه ونحط فيه قليل من حشو الدجاج واصبع بطاطا مقليه ونلفها على هيئة فخذ دجاج








ونغطسها فى بيض وخبزه مرحيه ونقليها لى نار هاديه مش عاليه

وتفضلووووووووووووووووووا

[رميساء]

وعليكم السلام ورحمة الله

واواواواواواواوا على أفخاذ الدجاج بالعجينة
تسلمي يا نسمه
روووووووووووعه
شكلها رائعة
صحتين عليكم
جاري التقييم
ممتازة

[حبيبتهم]

حلوة تسلم ايديك يا نسومة وربي يعطيك الصحة
اني نحبها لكن زوجي مايحبهاش لذلك مانديرش فيها ديمه

جاري التقييم
وهذي حصتي

[luba]

تسلم الايادي مااااشاااء الله

سهفتيني فيهم ليا هلبه هلبه عليهم

ربي يعطيك الصحه

تم التقييم ليك وللموضوع

[أم خديجه]

تسلم ايديك
ما شاء الله عليك متفكرة شنو درتوا في بيانك وفي العرس
شكلك حصلتي فيهم بروحك هههههه لهذا مخزنات في الذاكرة
عمري ما جربتهن باذن الله بنجرب طريقتك فيها
سؤال
العجينه اطيب وتقعد مقرمشه او تمص الزيت

بارك الله فيك نسومه
تم التقييم

[ميرولاكى]

ماشااااااااااااااااء الله افخاذ يسهفن
حتى انا نحبهن شكلهن حلو ولذيذات
الله يسلم دياتك على المشاركه الحلووووووووه
ان شاء الله نجربهن بطريقتك فى العجينه
صحتين وعافيه

[الصابرة]

ماشاءالله تبارك الرحمن
تعرفي انحبهن وليا زمان مادرتها فكرتيني بيها
وشكل عجينتك احلى
سلم دياتك ويعطيك الصحة
لك احلى نجوم

[نسمه ليبيه]

الله يسلمكن جميعا على المرور الطيب

ام خديجه هى تكون رقيقه العجينه زمان كنت ندير فيها بعجينه فيها خميره فتنتفخ اثناء القلى لكن لما تعلمت العجينه هذى مافيهش خميره وطلعت احلى

[نسمه ليبيه]

ام خديجه العجينه تطيب بس ماتطلعش مقرمشه واجد وزى ماقلت تبي نار هاديه مش عاليه

وعلى فكره فى فرحى شلت وتاها لصاحبتى ودارتها ليا هى وامها الله يمسيهن بالخير والكلام هذا كان من عشر سنوات

[أم خديجه]

ان شاء الله ربي يهنيك نسومه وبارك الله فيهن صاحبتك وامها
ما نلقوا غير الصاحبات ربي يهنيهن صاحباتي