[مشاركة في مسابقة مبدعة المعجنات2012] معجناتي من مطبخ sweet nona

**sweet nona** · 04-03-2012, 12:36 AM

السلام عليكم

مشاركة في مسابقة مبدعة المعجنات
ومغتربة7 الله يسامحها معاش خلتنا نطلعو من الكوجينا
ههه
انشالله غير مانبدا انخش بالجنب
ههه
المهم ياحلوات ياغاليات

*طريقة العجينة*

بيضة
3دقيق+م ملح+م خميرة خبزة
نص كوب زيت+كوب حليب بودرة+كوب ماء

*طريقة الحشوة*

صدر دجاج مقطع+جوانح بصل+3فص ثوم مدقوق
نص م معجون طماطم+ملح+جبنة مبشورة
[نشوح الدجاج ونضيف البصل والثوم وبعد شوي
انضيف طماطم والملح والفلفل الاكحل مع كوب ماء لين ايطيب]
ونبدا:

بعد اتصحصح العجينة

نجهز بيض وحليب باش ندهن بيه العجينة
وناخذ قطعة ونفردها بالطول وندهنها

اضيف الحشوة ونوزعها بالكامل على شكل العجينة

والجبنة المشورة الي طعمتها مع الدجاج ممممممم

نلف العجينة وانصكرها وندهنها مرة تانية

ونبدا نشكلها زي الحلزونة وندهنها ونرشها بالسمسم

وهكي شكلها

والشكل الثاني

انكور قطع من العجينة على حسب حجم الطاجين
الي بديري فيه ونحشيها جبنة ونفرد عجينة تانية
وانحطها فالطاجين بعد مادهنته ونبدا الصقها في بعضها
وانضيف الحشوة في الوسط وانرشها بالجبنة ونرشها بشوية سمسم بهد مادهنتها طبعا

ويلا اتفضلو غدانا كسكي

وضيفولي انجيمات زي هادو
*******
ههه

**المصراتيه** · 04-03-2012, 02:12 AM

قصدك السفره هدي كلها ليا
ماشاءالله تبارك الرحمن عليك معجنات تهبل تستاهلي ميه نجمه
هدا خاشه من التانويه امالا كان قبلها كيف امدايره في المطبخ..راهي المطبخ لزاتك
تسلمي يدياتك وبالتوفيق في المسابقه ان شاءالله يا حبوبه

**مغتربة 7** · 04-03-2012, 03:39 AM

شن ها الجمااااااااااااااااال تبارك الرحمن

ماشاء الله عليك ياسويت
عيوني طلعوا فى سفرتك ياريتها حق قدامي
ماشاء الله معجنات اتجي فى الخاطر
تسلم الايادي الى تلتف بالحرير
مشاركة تجنن وتستاهل التقييييييييم
موفقة

**sweet nona** · 04-03-2012, 09:36 AM

المصراتية
شكرا للرد الحلو ياودي مابنجو شي
بحداك
مغتربة7 عيونك الحلوة
شكراا لتقييمكم

**بنت طبرق** · 04-03-2012, 11:03 AM

ماشاء الله الله اكبر
سفرة مقومة والمعجنات ايسهفوا
تسلم ايديك ومية نجمة ليك

**بنت حواء** · 04-03-2012, 11:33 AM

الله الله ياسويت خليلنا مكان في المسابقة علاش الدعاك؟؟؟؟؟!!!!!!!
مشاااااااااء الله على المعجنات أول حاجة والسفرة اللي تسهف
وأنا اللي ليا شهر ماكليتش كسكسي بنننننننننجننننننننن عليه
سلم يدياتك (وصويبعاتك)
موفقة في المسابقة وماعندي مانديرلك إلا 5 نجوم

**أمـ ساره** · 04-03-2012, 03:56 PM

ماشاء الله لاقوة الا بالله

معجنات اتهبل وخاصة حشوة الدجاج يميميمييمممممممم

بدوا يطلعوا الابداعات يا سويت وين كنتي داستيه

مشاركة مميزة حبوبة وسفرة اتهبل

بالتوفيق في المسابقة