[الغريبة الليبية] من مطبخ ام لبنتين وولد

**ام لبنتين وولد** · 12-25-2010, 10:20 PM

السلام عليكم ورحمة الله وبركاته

هذه الغريبة درتها في حوشنا ومصورتهاش صورت الصورة النهائية بس لان وقتها

منعرفش ننزل الصور وانا درت مقار كبير لان بوي كان في تونس داير عملية

عالمسالك فالناس حال الماشي والجاي

المقادير

علبة سمن {1كيلو}

ربع العلبة زيت مكثرتش زيت

ثلث ارباع العلبة سكر ناعم

ظرف باكينج بودر

2كوب لوز محمص ومجروش

كوب جوز هند مطحون في الخلاط

دقيق مايعجن وانا اخدت مني حوالي كيلو ونص تقريبا

تعجن المقادير واهم شئ للغريبة السبك كويس وخليتها ارتاحت ساعة وبعدين كورتها وحطيت فيها اللوزة اللي حطيتها في الحليب قبل وبعدين حطيتها في الفرن ولعت عليها من فوق الاول وبعدين ولعت عليها من تحت

وهذه صورتها

وهذه مع كعك حلو دارته اختي والمقروض جبناه جاهز وطاسة شاهي حمراء

والمرة الجاية نصورها من الاول ان شاء الله

**ام الجميلات** · 12-25-2010, 10:47 PM

ما شاء الله حلوة
وان شاء الله لباس على الوالد العزيز

**نعومي نت** · 12-25-2010, 10:50 PM

اول حاجة حمد الله علي سلامة أوبيك
تانيا بسم الله ما شاء الله علي الغريبة
يسلموووووووووووووووووا ايدياتك

**أم إيناس3** · 12-25-2010, 10:51 PM

يسامووووووووووووووو

**نعومي نت** · 12-25-2010, 10:51 PM

خسارة سبقتني أم الجميلات قبل نبي نكون اول من يتحمدلك علي سلامة بوك
لكن عادي ما بين الخيرين حساب

**ام عبدالمعز** · 12-25-2010, 11:31 PM

اهلا بك معانا ياغالية

وحمدلله علي سلامة الوالد

ماشاء الله باين ان الغريبة مفتحة وحلوة

يسلمو ايديك وصحتين وعافية يارب

اتمني انك تكتبي الموضوع المرة الجاية بنفس هذه الطريقة

حتي يكون اجمل