[ مشاركة تشجيعية في مسابقة تجهيزاتك المطبخية لشهر رمضان والعيد] أدوات منوعة من مطبخ أمـ ساره

**أمـ ساره** · 06-23-2013, 03:33 AM

السلام عليكم ورحمة الله وبركاته

بعد غيبة طويلة اتمنى تسامحوني عليها ولكن الظروف أقوى مني

حبيت نشارك معاكم ببعض الحاجات هي بسيطة ولكن حبيت نترك بصمة في المسابقات

مجموعة أدوات عادية جداً لكن نحتاجوها في المطبخ في رمضان وفي سائر الايام طبعاً

بسم الله نبدأ

صفاي بلاستيك عملي ومرات أفضل من الالمنيوم من حيث الصدأ وأيضاً التفاعل

يعني نحط فيه الخضرة واني مطمنة

والادوات من اليمين

مجموعة أقماع عددها 3 وبأحجام مختلفة

وبعدها أقماع للمعجنات عندي قبل 3 وزدت 2 حتى صار عندي 25 قمع

والي بعدها حفارة الفلفل الحلو لنزع اللب تنفع للمحشي

والي بعدها أداة فصل البياض عن الصفار

وآخر شيء فازو (برطمان) بلاستيك للتوابل والبهارات

وعلى فكرة كل الي في الصورة نفس السعر بدينار بس (مش المجموعة كلها القطعة بدينار )

وخيتكم طاحت في محل ياسلام وما قصرت كالعادة لأني من قبل لقيتهم بأسعار أكثر

وهذه أيضاً بدينار وقبل خذيت منهم بس تشكيلة ثانية وبسعر أغلى

وعلى فكرة مش تقول النوعية أو الجودة تفرق بالعكس نفس الشيء غير الاسعار مختلفة

وهذا المترد من نفس المحل لكن سعره 3 ونص دينار

والحاجات الجاية من محل ثاني مش نفس الاول وأسعارها المعروفة

من اليمين

سلتين (سبات) بلاستيك للخبز بس اني خذيتهم لغرض ثاني

وهو وضع فازوات (أوعية) الزيت والخل والحاجات الي نستخدم فيها دائما ونحط فيها جنب الغاز

وبعدها حافظات 3 خذيتهم لصلصة البيتزا والهريسة ولصوصوات بشكل عام

لأن تسكريتهم حلوة ومحكمة ان شاء الله يكونوا واضحات

وبعدها صواني بلاستيك الي لونها وردي خذيت 3 منهم الوحدة بحوالي 2 دينار

وقوالب التارت عددهم 6 يجو مع بعض وسعرهم تقريبا 3ونص أو 4 الا ربع مش متذكرة بالضبط

والي بعدها قوالب الايس كريم عجبوني وخذيت منهم 2 وسعرهم حوالي 3 تقريبا مش متأكدة

والشنتروات الي تحت ان شاء الله يكونوا باينات خذيت منهم 4 وحجمهم متوسط ولنين ذهبي وفضي

وفرشاة صغيرة سيليكون لدهن المعجنات ولحاجات ثانية

وهذه صورة اوضح للسبات والشنتروات

وهذه حافظة للطعام تنفع للكيكات ولبواقي الطعام

تسكريتها محكمة وفيها يد تقدري تمسكيها منها تنفع حتى للطلعات

وسعرها تقريبياً 8 ونص

وان شاء الله لو فيه جديد يكون عندكم أكيد

ويارب حاجاتي المتواضعات تعجبكم

وسامحوني على التقصير

**الصابرة** · 06-23-2013, 12:02 PM

تتهني بيهم ام سرو
الحق عجبوني وقديش الحاجة البسيطة ادير فرق في مطابخنا وديكوراتنا
وعجبوني هلبة استخدامك لسلة البلاستيك حلوة

**زوبة الطيوبة الحبوبة** · 06-23-2013, 12:39 PM

تعيشي وتشري يام سرو وتبيديهم بالهناء
حاجات قنينة وتنفع في المطبخ
وكل عام وانت بالف خير..

**رميساء** · 06-23-2013, 05:31 PM

وعليكم السلام ورحمة الله

بارك الله فيك علي المشاركة
وعجبني (السبات)
مُبارك عليكِ الأدوات الجديدة
مشكورة
تسلمي

**رميساء** · 06-23-2013, 05:33 PM

تم التقييم

**أمـ ساره** · 06-23-2013, 11:16 PM

الله يسلمكن ويبارك فيكن وخياتي

ومشكورة على هلبة على مروركن السمح

وخلونا نشوفوا تجهيزاتكم حتى انتم زي ما عودتونا بالمشاركة

وشكراً على التقييم

**ترهونيه حره** · 06-24-2013, 01:27 AM

حاجات بسيطه ومهمه فى الطبخ
تبيديهم بالصحه والعافيه. وين
حصلتيه محل دينار ؟؟

**أم خديجه** · 06-24-2013, 04:43 AM

ما شاء الله
حاجات عمليه ورائعه
عجبتني حفارت الفلفل
ربي يهنيك ان شاء الله وتبيديهم بالهناء

**luba** · 06-24-2013, 07:06 PM

كالعادة حاجاتك حتي ولو بسيطة قنينة وحلوة
تبيديهم بالهني والصحة
ومشكورة عالمشاركة البسيطة بالنسبة ليك ولكنها مهمه بالنسبة لي
تم التقييم

**أمـ ساره** · 06-25-2013, 02:38 PM

الله يسلمكن ويبارك فيكن وخياتي

وشكراً لمروركن وكلامكن الطيب

ترهونية المحل هذا في مسلاته وتقريباً حتى في الخمس فيه

وشكرا على التقييم

الموضوع: [ مشاركة تشجيعية في مسابقة تجهيزاتك المطبخية لشهر رمضان والعيد] أدوات منوعة من مطبخ أمـ ساره

أدوات الموضوع

عرض

[ مشاركة تشجيعية في مسابقة تجهيزاتك المطبخية لشهر رمضان والعيد] أدوات منوعة من مطبخ أمـ ساره

معلومات الموضوع

الأعضاء الذين يشاهدون هذا الموضوع

المفضلات

المفضلات

ضوابط المشاركة