[ مشاركة تشجيعية في مسابقة تجهيزاتك المطبخية لشهر رمضان والعيد] تجفيف الكسبر الاخضر من مطبخ لوبا

[luba]

السلام عليكم ورحمة الله وبركاته




تجفيف الكسبر الاخضر







من قبل نزلت طريقة تجفيفه في الفرن

واعدت التجربه في الطقس العادي

والحرارة عندنا متوسطه مش كيفكم

والنتيجة جدا جدا رائعة احلي من نتيجة الفرن

ومرات اللي في الفرن تنحرق منك الورقات فادير بنه

مش حلوة يبي هلبه الواحد ياخد حذره

وسبب تجفيفي فيه انه المجفف في السوق

مش نفسه نوع كسبرنا في ليبيا وكدلك عندي

نوع كسبرنا الليبي غير متوفر دائما وفي بنته مافيش كسبر كيفه

عالعموم


ناخد نغسل الاوراق ممكن تاخدي معاهم الاغصان الرقيقة اللي بين كل ورقتين عادي

و نصفوهم من المية كويس خلوهم في الصفاي







بعدين افرشيهم علي فوطة كبيرة او حسب كميتك

وخليهم لين تلقيهم جافات علي طاولة المطبخ






بعدين حطيهم في سفره ودائما سفر الستيل

تجفف اسرع من البلاستيك لانه تمص في الحرارة وتصير ساخنه

وتحطوها في الظل في مكان ساخن وقلبيهم بعد ساعات وكل مرة بعد وقت قلبيهم

يعني في ليبيا حيجف من تاني يوم

بس اهم شي تجففوه يوم يكون الجو مش تراب او يكون في دار الخزين

في اللايدة يعني طول اليوم هيا ساخنه الدار







وبعدين تشوفيها بايديك ان كان يبست او لا


يمكن ترحيها في الرحاي ادا تبيهم بودرة

ويمكن ترحيهم بيدك ادا تبيهم غليظ شوية


استعمالاته واجدة

من ميمي تعلمت نحطه مع بعض العجائن


و كدلك نستعملوه في الشربة والمكرونه الجارية والمقطع والرز المبكبك

و العصبان وطواجين الحوت والدجاج وووووو


ان شاء الله ماتقلت عليكم وتلقوا الفائدة فيها

[رميساء]

وعليكم السلام ورحمة الله
ماشاء الله عليك يا لووووبا
فكرة مذهلة
والشرح والمعلومات والصور رائعة
دائماً متميزة
جاري التقييم لكِ والموضوع

[الصابرة]

ماشاء الله عليك يا لوبا
فكرة حلوة
وخصوصا افكار لاستخدامه
ربي يعطيك الصحة ويفتحها في وجهك يارب
لك احلى نجوم وتقييم لو مشى

[المصراتيه]

بسم الله ماشاءالله
بارك الله فيك ويرحم ولديك علي الطريقه الاكتر من رائعه
بادن الله جااااري تطبيقها ودائما معتمده
تسلمي يا احلي لبونه
والتقيم ليك وللموضوع

[أم عبادة الليبية]

ماشاء الله طريق حلوة وسهلة ...

نفس الطريقة انديروا فيها في تجفيف النعناع...

بس احني في طرابلس وضواحيها تقريبا استخدامنا للمعدنوس أكثر من الكسبر وبالذات في الشربة منديروش في الكسبر طبعا هذا على حد معرفتي ...

وإن شاء الله انجربه في شربة رمضان ...

وربي يسلمك لوبا ويبلغك رمضان إنتي وعائلتك بأمن وسلام .....

[أمـ ساره]

ماشاء الله لوبا على الشرح والتوضيح والصور الواضحة

ربي يسلم ايدياتك وعويناتك يارب

نفس طريقتي اني ما نحب ننشر في الشمي حتى ما يسود لونه

بس طبعا نجفف في النعناع لكن الكسبر استخدامته قليلة عندي

وزي ما قالت أم عبادة أغلب الطرابلسية يديروا في المعدنوس والنعناع الجاف


لك أحلى نجيمات والتقييم لو مشي وان شاء الله يمسي يارب

[بنت حواء]

ماشاء الله طريقة حلوة
تسلم يديك وربي يبارك فيك
لك مني 5 نجووووووووم

[أم عدى]

بارك الله فيك
فكره حلوة

[ميرولاكى]

ماشاااااااااااء الله
تسلم دياتك على الطرق والافكار الحلووووووووووووه

[زوبة الطيوبة الحبوبة]

ماشاء الله ... يسلموا ايديك على هالفكرة الرائعة والمفيدة ... ولك احلى تقييم..