[ مشاركة تشجيعية في مسابقة تجهيزاتك المطبخية لشهر رمضان والعيد] تجهيز الخبزة المرحية (البقسماط) من مطبخ أمـ ساره

[أمـ ساره]

السلام عليكم ورحمة الله وبركاته






هذه طريقتي في تجهيز الخبزة المرحية (البقسماط)

ما فيه حاجات جديدة بس حبيت نشارك معاكم


أول شيء نحب نديرها واني مقعمزة مش واقفة في الكوجينة






نيبس في الخبزة في الظل مش في الشمس وغالباً داخل البيت

ونحطها في كيس من القماش حتى تقعد نظيفة أو في صندوق الخبز المغلق بدون كيسة

وبعدها نحطها شوي في الفرن الساخن حوالي 5 او 7 دقائق

لنتأكد انها جفت من الداخل



وبعدها نحطلها في كيسة قماش

(( الكيسة هذه خيطتها لي جدة زوجي للخبزة وعاجبتني جداً ))

ندخل فيها الخبزة ونسكرها ونضربها بحلة العجين أو عمود المهراس لو توفر






وبعدها نحطها في ست البيت ونضربها لحد ما تترحى كويس





ثم نغربلها بغربال الدقيق أو صفاي فتحاته ضيقة شوي






تنزل الخبزة الرقيقة والي تقعد في الصفاي نحطها في حافظة بروحها للتغليف

والثانية للطاجين والكفتة والحاجات المعروفة






وهكي لين تكمل الكمية كلها

ونحطها في حافظات بلاستيك تتحمل البرودة

ومن ثم في الفريز أفضل شيء للتخزين في الصيف

أما في الشتاء عادي خارج الفريز





ولما بنستخدمها للسكالوب أو تغليف أي شيء للقلي نتبلها حسب الرغبة

كل مرة تتبيلة شكل وحسب نوع اللحم ونضيفلها معدنوس أخضر أو مجفف

ونغلف بيها بعد وضع اللحم (الدجاج - اللحم - السمك ) في البيض





وربي يتقبل منا ومنكم يارب

وربي يبلغنا رمضان لا فاقدين ولا مفقودين

[بنت حواء]

الله ياأم ساره محلاها التقعميزة جو تهدريز ههههههه
عندك حق والله أحسن من الوقوف
وماشاء الله الحافضات يهبلو
والتتبيلة متاع الخبزة حلوة
تسلم يديك وصحتين على قلوبكم
لك مني أحلى نجوووووم

[ام ساره وعبدالعزيز]

سلم يديك وكل سنة وانتى طيبة

[نسمه ليبيه]

يسلموا ام سرو

[أم خديجه]

بارك الله فيك
نفس طريقتي
لكن بديت نشري فيها جاهزة من السوق
في الي يبشر الخبزة ما تكون ناعمه وبعدين يجففه ويبسه

[الصابرة]

تسلم الايادي
وحلوة فكرة التتبيل
بارك الله فيك

[زوبة الطيوبة الحبوبة]

يسلموا ايديك ام سرو ... وفكرة التتبيل حلوة وقنينة.. يعطيك الصحة ..

[المصراتيه]

ماشاءالله يعطيك الصحه ياحلوة الحلوات
طريقتك رائعه نفس طريقة عيالي لكن اني نيبس فيها في الكوشه علي طول
تسلم الايادي وبارك الله فيك وزمضان كريم ان شاءالله

[أمـ ساره]

الله يسلمكن ويبارك فيكن وخياتي

ويهنيكم يارب ويبلغنا رمضان لا فاقدين ولا مفقودين

شكراً لمروركن العطر والحلو

[ميرولاكى]

الله يسلم ديااااااااااااتك
بصراحه شريتها جاهزه لانها هنا حلوووووووه
وكل عام وانت بالف خير