هذي طريقتي في تجهيز ورق السلك لرمضان
والحق ندير فيها كل سنة والسبب؟؟
لأن أصعب حاجة عندي لما بندير (البراك/الضولمة)
هيا تقطيع وغسل وطبخ السلك على النار
فأنا نجهز فيه باش نرتاح من الخطوات هذي في رمضان
وفي سبب تاني واللي يخلي فيا ندير فيها حتى في غير رمضان مرات
أن الخضروات الخضراء بالعموم تفقد هلبة من فوائدها لما تطبخ على النار ويتغير لونها
ولهذا الطريقة هذي تخلي السلك محتفظ بفائدته بإذن الله
سامحوني طولت عليكم وهيا نخشو للموضوع
تابعو الصور:
نقطع الورقة الصغيرة على 2 والورقة الكبيرة على 4
الجزء الممزق من الورق نقطعه رقيق
هذي ورقات السلك بعد التقطيع:
نغسلها بالورقة ونصفيها ونحطها على مفرش نظيف
والورق المقطع رقيق نغسله في صفاي ونخليه نين يجف
وبعدين نبدا في التكييس
طبعا أنا استعملت النايلو اللاصق متاع حفظ الأطعمة الجاهزة
نفرد النايلو ونحط في الوسط مجموعة ورقات مرتبة فوق بعضها
نلفها مع شوية ضغط ونسكر الجوانب
وكل لفة من اللفات هذي نحطها في كيس عادي متاع فريز
ويمكن من البداية ينحط في كيس عادي
والورق اللي قطعته رقيق وجف من اميته
نحطه في كيس في الفريز نخليه للحشوات والمعجنات اللي بالسلك
ولأني متعودة نفرش للبراك في الطنجرة العروق متاع السلك
فحبيت حتى توا نغسلهم ونقطعهم ونفرزهم
(بدون تعليق)
وهذا السلك في الفريز جاهز للحشو
وبعد يثلج ونطلعه يفتر نلقاه طري ومايحتاجش طبخ
يعني نلفه طول
ان شاء الله تعجبكم الفكرة وتلقو فيها الفايدة
وكل عام وأنتم بخير
سلااااااااااااام
المفضلات