[مشاركة في مسابقة تجهيزاتك المطبخية لشهر رمضان والعيد] تجهيز المعدنوس(البقدونس) من مطبخ أمـ ساره

[أمـ ساره]

السلام عليكم ورحمة الله وبركاته



مشاركة متأخرة سامحوني لكن الظروف والنت التاعب عندي



نبدأ بسم الله

من الحاجات المتعبة جداً بالنسبة لي والي تاخذ وقت طويل

هي تنظيف المعدنوس وتجهيزيه ويوم الخضرة نخمم فيه

لأني لازم نقعمز عليه ونوازيه كويس موسوسة منه هلبة المعدنوس

لما تكون عندي منه كمية كبيرة





نوازيه ونقضه ونغسلة كويس وبعدين نفرزه

أو مرات انظفه بدون غسل خاصة لو بنستعمله ثاني يوم

ونحطع في كيس نايلون العادي او الخاص بالتبريد الي يكون سهل الفتح والتغلق

نحط فيه المعدنوس ونفرغ منه الهواء ونسكره ونحطه في الثلاجة ويقعد حتى اسبوع

لونه أخضر وطازج مافيه شيء لمهم من دون غسل أو لو غسلتيه جففيه كويس من الماء واحفظيه



طريقة اليوم خاصة بالتفريز وهي طريقتين بصراحة

الاولى

بعد ما انظفه ونقرضه ونغسله نخليه يجف شوي من الماء




ونحطه في اكياي ونفرغ منه الهواء كويس ونطرحه في الكيس

زي ما واضح في الصورة





وكل ما نحتاج نكسر منه شوي ونرجع الباقي

يقعد لونه أخضر وحتى بنته حلوة المهم ما يقعد برا الفريز هلبة حتى ما يذبل ويتغير لونه



والثانية

نعرفها من قبل لكن ما جربتها اول مرة وفكرت فيها للشربة

وهي نستخدم في مكعبات الثلج نحط فيها حوالي 2 ملعقة صغيرة معدنوس مفروم في كل مكعب

وبعدها نصب عليها مية ولم بنستخدمها ناخذ مكعب او 2 حسب الرغبة






وهذه طرقي في المعدنوس وتقدري تستخدميها مع الكسبر

بس الحبق نحسه صعب شوي لأنه يسود لونه

وان شاء الله تعجبكم مشاركتي البسيطة