[كيكة في ماكينة التوست] من مطبخ ام عبسي

**ام عبسي** · 09-05-2013, 12:52 AM

السلام عليكم ورحمة الله وبركاته

كيف حالكن ياحلوات
اليوم جايبتلكن طريقة سريعة جدا لتتطييب الكيكة ما تستغر ق منكن وقت والاحلى انها ماتستني الكيكة لين تبرد وتقصصيها وتزينيها
ومش عارفة اذا كان حد منزلها من قبل في المنتدى والا لا المهم الكيكة هذي مرة مشيت لبيت هلي واختي قدمتها ليا ونحسابها توست عادي ولما ذوقت الطعمة
لقيتها حلوة فنحسابها طريقة جديدة لنوع حلو فقالتلي انها كيكة عادية بس اطيبيها في ماكبنة التوست بصراحة استغربت طريقتها وجديدة عليا وقلت انزلها لوخياتي
نبدا بالمقادير بعد هالقصة الطويلة..بسم الله

3بيضات
ظرف بيكنج بودر
علبتين زبادي ا ي نكهة
كوبين دقيق
نص كوب زيت
كوب الاربع سكر او اقل لان الزبادي حلو
ملعقتين كاكاو سادة
الطريقة
اني عن نفسي نخلط المقادير السابقة مع بعض بدون تدريج..هنا قسمت المقدار قسمين وحطيت في واحد منهن كاكاو

وبعدين نسخن ماكينة التوست وماتخليها تسخن واجد زي مادرت اني لانها طابت مني بزيادة حطي مقدار الكيكة وسكري الماكينة

وهذا شكلها شفتو طابت مني واجد لاني سخنتها واجد بدون تعليق لوسمحتو

وهذا شكلها من داخل يعني مش نية(قولولي بعد هالحرقة مازال تبيها تقعد نية) وعلى فكرة طيابها ياخد اقل من خمس دقايق

وهنا بعد ماخبينا العيوب

ولكي الاختيار والتفنن في التزيين واني انقول تقدري تستعملي حتى ماكينة الدونات او المعمول اني هذين ما عندي شن رايكن انديرها في الشواية لان هذي اللي عندي ههههههههههههههههه والله ضاربة في راسي

وصحتين وعافية

**ام عبسي** · 09-05-2013, 02:24 AM

معليش يابنات ع المنظر المخجل والله درتها ع السريع
باذن الله المرة الجايةتكون مرتبة اكثر وانديرها على رواق وحنزلها في نفس الموضوع

**أم خديجه** · 09-05-2013, 09:59 AM

تسلم ايديك وفكرة ماكينه التوست ابداع
بارك الله فيك المهم الطعم
تم التقييم

**نسيبة** · 09-05-2013, 03:31 PM

بارك الله فيك

**ام عبسي** · 09-05-2013, 10:24 PM

المشاركة الأصلية كتبت بواسطة أم خديجه

تسلم ايديك وفكرة ماكينه التوست ابداع
بارك الله فيك المهم الطعم
تم التقييم

تسلمي يام خديجة كلك ذوق
هي الطعم طيبة لكن غلبتني في طيابها كنت بنغطيها بالشكلاطة لكن ما لقيت عندي
اهو مشي حالها
وتسلمي ياغالية مرة تانية على مرورك الحلو

**ام عبسي** · 09-05-2013, 10:25 PM

المشاركة الأصلية كتبت بواسطة نسيبة

بارك الله فيك

وفيك بارك الله يانسيبة
اسعدني مرورك ياغالية

**الصابرة** · 09-06-2013, 04:23 AM

ماشاءالله عليك يا ام الافكار
فعلا مش عادية وسريعى في نفس الوقت
تنضج بسرعة وتبرد بسرعة وتزيينها باي شئ
يعني تنفع لضيف فجاءة
ان شاءالله التطبيق قريبا
سلم دياتك ويعطيك الف صحة وربي مايحرمنا من ابداعك
والمنظر حلو مافيشي عيب ياعسل
لك احلى نجوم واحلى تقييم