دعوة عامة للدبدوبات (السمينات)

[خدوج]

السلام عليكم
دعوتى عامة لكل الدبدوبات اصحاب القلوب الطيبة
واتمنى فضااوى تدخل لانى سمعت انها تعمل ريجيم
اقصد قرات ذلك فى احد مواضيعها
بس اللى عندها تجربة مع الريجيم او اللى تعمل ريجيم تخبرنا عن نفسها وعزيمتها وريجيمها
ام عن نفسى اتبهدلت مع الريجيم اسبوع وتتهدم العزيمة
فيارب نشد بايدينا ونشجع بعض
وزيادة من لما انفتح المطبخ الليبيى هربت كل العزيمة
خوفا من الصواريخ المستمرة من الاكلات الليبية والعالميةالاكلات التى لم تتوقف
مع حبى لكم

[التا ئبه لله]

هههههههههههههه يعطيك الهنى
يا خدوج بس بلا رجيم بلا بطيخ هههههههههههه

خليك سبور انبصر عليك الله يفكنى منه

[فضااوي]

هههههههههههههههههه

الله يعطيك الخير خدوووج

اي والله انا في صرااع مع الرجيم منذقديم الازل
يعني تقدري تقولي زي حرب الباسوس او حرب داحس والغبرااء هههههههه

شوفي العزيمة صراحة حديد وانا انحاول نمشي مع نظام بس ناكل من الاكل البيتي مع بعض التغييرات في الطبخة
يعني اللي فيهاا سمنة نغيرهاا بزبدة مرجريتاا لانهاا زيوت مهدرجة وبهاا الاومقاا ثري

يعني تقدري اتقولي ناكل في 5 او 6 وجباات مقننة

نعطيك مثال

الصبح ناخذ كوب نسكافه بحليب خالي الدسم ((هذا رأسي كل صبح))

مرات ناخذ معاه 4 بسكويت دايت
واوقات 2 توست وجبنة لايت
ومرات 2 توست وملعقة مربي
يعني انوع

والوجبة الخفيفة اللي قبل الغداء

مرات تفاحه او برتقاله مع فنجان قهوة
واذا كنت جيعانه ناخذ شريحة توست وحده مع جبنة لايت

الغداء من غداي العادي
بس اذا رز ناخذ 8 ملاعق مع السلطه واللحمة
واذا مكرونه ناخذ 10 ملاعق مع اللحمة والسلطة
واذا طبايخ اذا معاهن رز تكون نفس الكميه السابق واذا بالخبز ناخذ نصف صمونة صغيره

المغرب ناخذ قهوة او شاهي مع تفاحة او برتقالة او موزه انوع

العشاء دائماا خفيف
اما سلطة فواكة مع زبادي
او 2 توست مع جبنة لايت وكوب عصير
او 2 توست مع كمية تن وعصير

وهذا صراعي مع السمنة
واذا انفتح قسم الدايت راح اتحفكم بأكلات للدايت ومنخفضة السعرات

[نعومي نت]

السلام عليكم اني عندي قصة مع الرجيم
لما كنت بنت وزني 48 مش إكثر نعتبر ضعيفة قررت أني نسمن حشاكم ما خليت حاجة قالولي عليها ما درتهاش المهم زاد وزني لين أصبح 55 هدا طبعاً بعد رحلة كفاح طويييييييييييييييييييلة
المهم بعد ما تزوجت سمنت حشاكم زدت 10 كيلو وزوجي ميحبش السمن
وبدي عاد شني هدا وإنتم النساوين ديما هكي وما إديروش في كنترول علي نفسكم بعد ما تتزوجوا وبري عاد من ها لكلام المهم قررت أني لازم العشرة كيلو إنزلهم وبالفعل نزلتهم طبعاً الخبزة اللي كانت عقلي قريب الكسكسي ناكله بالخبزة باي باي و المعجنات حتى هما في الباي شديتها علي الفاكهة و الخضروات واهم حاجة الميزان لازم يكمن عندك ميزان في الحوش كل ما إنزل قرامات إنزيد نتشجع وخلاص توا تابتة علي 53 كيلو مع إن طولي متر و60 كويس الحمد لله

[ليبيا قلبى]

شوفى حبيبتى حتى انا ديما صارع مع الرجيم والرياضه
اول ماتزوجت وزنى كان تقريبآ فى 54 و53
وطولى متر و66 طويله اشويه
جسمى تمام تمام
نين انسافر وطبعآ اكل المطاعم عشاء وغداء
سمنت اشويه
روحت ليبيا
دخلت النادى الرياضى طبعآ كنت متاعبه مع دكتوره تغديه
قعدت فيها تقريبآ 3 شهور
جسمى قعد ايجنن احل من قبل رياضى يعنى هاهاهاها
وبعدها حملت زاد لدرجه غريبه
والله وصلت لعند 88 كيلووو
طبعآ زوجى حبطنى حبطنى
وانا نفستى تعبت ولدت قيصرى وجبت بنت عاشت اسبوع
وبعدين توفت
كرهت الاكل
ومقدرتش اندير رياضه بسبب العمليه
قعدت 3 شهور وبعدين بديت بشويه بشويه فى رياضه
خفيفه فى الحوش
كنت نتمنه انخش النادى بس النادى كان رياضه صعبه وخفت العمليه تنفتح
خذيت الاله رياضيه من جارتى 150 دينار
مستعمله استعمال نظيف
كيف هذى بس انا بدون كرسى



نقصت عليه وصلت تقريبآ لعند 60 كيلو
ودرت رجيم من راسى يعنى خففت الاكل
يعنى بسكويت دايت دايجستف
حليب دايت
خبزة شعير فى اليوم نصف فرده
صدر داجاجه مشويه سمك مشوى
حاجه فيها دهون تركتها

تمام تمام

نين حملت مره تانيه
هاهاهاهاها
وطبعآ الحمل والجوع الرهيب
وصلت اخر مره لعند 79
وبعدها حلفت انى مانقيس وزنى إلا بعد الولاده
انشاء الله بعد الولاده بس ادعوالى ايكون من نصيبي
ناويه اندير رجيم ونخش للنادى


وسلام دوختلكم روسكم
هاهاهاها

[فضااوي]

شنوو يابناات مفيش الا ثلاث دبدوباات في المنتدى كلة هههههههههههههههه

اقص اذراعي اذا بعد هالاكل كلة وانتن رشيقات هههههههههههههه

يالله نريد تفاعل

[فضااوي]

ليبيا قلبي الله يجعل حملك من نصيبك ويرزقك الذرية
الصالحة المعافاه

[ليبيا قلبى]

الله يسلمك يافضاوى

امغير شكل البنات متحشمات
هاهاهاهاها
خشو يابنات عادى

[المستعينة بالله]

ههههههههههههههه ضحكتوني يااحلي ذبوبات

بصراحة انا وزني65 وطولي 170 طويلة شوي قولوا ماشاء الله

ودائما 5 كيلو زيادة او نقصان

رغم اني انحب المطبخ لكن معظم الاكل صحي

زي فضااوي تقريبا مع المشي يوميا والنادي مرتان اسبوعيا

علي فكرة وزني قبل الزواج 60 كيلوا

[omsuma65]

السلام عليكم ورحمة الله
ههههههههههههههههه
جتكم الدبدوبه
وتعبانه من وزنها
ييييييه
وزني مجنني

والميزان كرهني
وانواع الرجييم جربتهم بس بصدق العزيمه ناقصه
وعموما خوتي اينادولي يادبدوبه
والله كنت رشاقه مش عاديه
عندي ريجييم مش عادي للي عندها عزيمه
توا انحطه ان شاء الله